EVERY year, plenty people wey they disfellowship de come back to Jehovah, and they be precious sheep. Just think-am: Bible talk say ‘heaven really dey happy’ when each of them come back! (Luke 15:7, 10) If they don call you come back, you fit dey sure say Jesus, the angels, and Jehovah de over glad as you don be part of the congregation again. But, as you de fix your friendship with Jehovah, you fit face some things. Wetin be some of this things, and wetin fit help you?

Plenty people still de feel bad even after they don come back to the congregation. Maybe you understand how King David feel. Even after Jehovah don forgive David for e sins, e talk say: “My mistakes don heavy pass me.” (Ps. 40:12; 65:3) After person don come back to Jehovah, the person fit still de shame or e heart fit still de condemn-am for many years. Isabelle wey they disfellowship for more than 20 years, * talk say, “That time, e really dey hard for me to believe say Jehovah fit forgive me.” If your situation make you tire, your friendship with Jehovah fit weak again. (Prov. 24:10) Make you try make that kind thing no happen to you.

Other people feel say the work wey they need to do to be Jehovah friend again, too much. After they call Antoine back, e talk say, “I be feel say I don forget everything about the life wey I de live before as Christian.” Because some people de feel like that, they no de do everything wey they fit do for Jehovah.

For example, if strong breeze scatter person house, the person fit de think about the hard work and the plenty time wey e go use build the house again. For the same way, if serious sin scatter your friendship with Jehovah, you fit de  feel say you go really need to do big work to fix your friendship with Jehovah. But make you no worry, help dey.

Jehovah invite us for Bible say, make we come “settle the matter.” (Isa. 1:18) You don already work hard to “settle the matter.” Jehovah love you as you don try do that one. Just think-am: Because you don come back to Jehovah, e fit use you as example to show say Satan na liar!—Prov. 27:11.

As you don come back to Jehovah, you don already draw near Jehovah, and e promise say e go do the same thing. (Jas. 4:8) E good as other people see say you don come back to congregation again. But you go need to do pass that one. Make you continue to make your love for Jehovah strong, na your Papa and your Friend. How you fit do this one?

Try de make plans wey you fit do. Maybe you still remember the first-first things wey you learn about Jehovah and the things wey e promise about the future. But now, you need to get better plan again to always do things wey concern your Christian life. For example, you go de always preach, de go meeting, and de spend time with your brothers and sisters for congregation. Make we talk about some things wey you fit plan.

De always talk to Jehovah. Your Papa understand say if your heart continue to condemn you for the bad thing wey you do, this one fit make-am hard for you to pray. (Rom. 8:26) Even with that one, make you ‘no tire to pray.’ De tell Jehovah say you really want be e friend. (Rom. 12:12) Andrej remember wetin happen before, e talk say: “My heart really condemn me and shame catch me no be small. But any time wey I pray finish, I no de too feel like that again. I get peace of mind more.” If you no know wetin you go pray for, think about the things wey King David pray about when e repent. This one dey Psalms 51 and 65.

De always study Bible. This one go make you get strong faith and make your love for Jehovah strong more. (Ps. 19:7-11) Felipe talk say: “Because I no be get plan to always read and study my Bible, I come weak and I do wetin pain Jehovah. I no want make the same mistake again, so I decide say I go de do my study to protect myself.” You fit do the same thing. If you need help to choose topics wey you go like to study about, you fit talk to any friend wey get strong friendship with Jehovah make e help you.

Make friend with your brothers and sisters again. Some people wey come back to congregation de worry say other people go de vex for them. Larissa talk say: “I really shame. That time, I feel say I don fail my brothers and sisters for congregation. I continue to feel like that for long time.” Make you know say the elders and other people for congregation dey ready to help you fix your friendship with Jehovah. (Check the box wey the topic na “ Wetin Elders Fit Do?”) They really dey happy say you don come back, and they want make things go well for you!—Prov. 17:17.

Wetin fit help you near people for congregation more? De go all the meetings with your brothers and sisters and de always go preaching with them. How this one go help you? Felix talk say: “The congregation just de wait for me to come back. I feel-am say they love me. They help me see say I don be part of the congregation again, say Jehovah don forgive me, and say I fit continue to serve Jehovah.”—Check the box wey the topic na “ Wetin You Fit Do?”

Satan go continue to bring more problems wey go be like strong breeze, so that e go try to make you weak as you de fix your friendship with Jehovah. (Luke 4:13) So, do wetin go make you and Jehovah tight more-more as friend now. This one go show say you don ready yourself.

Jehovah promise about e sheep them say: “I go find the one wey don loss, the one wey don miss road, I go bring-am back, I go bandage the one wey injure, and the one wey dey weak, I go make-am strong.” (Ezek. 34:16) Jehovah don help plenty other people to be e friend again. Make you know say Jehovah want help you continue to make your friendship with-am de strong more-more.