1. How Jehovah give im servant power for Bible time?

 MANY times, Bible describe people wey hold Jehovah tight as strong people. But no be everytime them feel like that. For example, sometimes, King David feel say e “strong like mountain,” but for some other time, e “start to fear.” (Ps. 30:7) Jehovah give Samson holy spirit wey make-am get power to fit do wonderful things. But e know say if Jehovah no give-am the power, e go just be like any other person. (Judg. 14:5, 6; 16:17) All this servants of Jehovah get power to do the work wey Jehovah give them because Jehovah help them.

2. Why apostle Paul talk say when e dey weak na that time e de get power? (2 Corinthians 12:9, 10)

² Apostle Paul na another person wey know say e need help from Jehovah. (Read 2 Corinthians 12:9, 10.) Just like many of us, apostle Paul suffer because of sickness. (Gal. 4:13, 14) Sometimes, e no easy for-am to do the correct thing. (Rom. 7:18, 19) And some other time, e de worry about wetin fit happen to-am. (2 Cor. 1:8, 9) But when apostle Paul dey weak, na that time e de get power. How? Because Jehovah de give-am the power wey e need to fit endure im problem.

3. Which questions we go answer for this article?

³ Jehovah promise us say e go give us the power wey we need to fit endure. (1 Pet. 5:10) But we must do something to get-am. For example, if you de hungry and person give you  food, you go need to eat-am before the food go fit give you the power wey you need. For the same way, Jehovah ready to give us the power wey we need but we must do something to fit get-am. Wetin Jehovah don give us to help us get power? And wetin we need to do to fit get the power? To fit answer this questions, we go see how Jehovah help prophet Jonah, Mary wey be Jesus mama, and apostle Paul. And we go still see how Jehovah de help us for the same way.

4. Wetin we fit do to get power from Jehovah?

⁴ One way wey Jehovah de give us power na when we pray. When we pray, Jehovah go give us “power wey pass our normal power.” (2 Cor. 4:7) Another thing wey we need to do to fit get power from Jehovah na to study Bible and think deep about wetin we read. (Ps. 86:11) The message wey dey Bible really “get power.” (Heb. 4:12) So when you pray and study Bible, you go get the power wey you need to fit endure, continue to happy or do any work wey Jehovah organization give you. Make we see how Jehovah give prophet Jonah the power wey e need to fit do the work wey E give-am.

5. Why prophet Jonah need to get strong mind?

⁵ Prophet Jonah need strong mind to fit do the work wey Jehovah give-am. Why we talk like that? Jonah no go where Jehovah send-am say make e go because e de fear. Instead, e enter ship go another place. Because of this one, e and the people wey dey inside the ship almost die when strong wind de blow the ship. The people for the ship throw Jonah inside the sea and one big fish swallow-am. How you think say Jonah feel when e dey inside the fish belle? E fit be say, e start to think say e go die for there. And e fit don de feel say Jehovah don leave-am. We dey sure say this one go don really worry Jonah.

6. As e dey Jonah 2:1, 2, 7, wetin help Jonah to dey strong when e dey inside the fish belle?

⁶ When Jonah dey inside the fish belle, wetin e do wey help-am? E pray to Jehovah. (Read Jonah 2:1, 2, 7.) Even though say Jonah no obey Jehovah, e dey sure say Jehovah go answer im prayer because e really regret for wetin e don do. Another thing wey help-am be say e think deep about wetin e don read for Bible before. We know this one because for Jonah chapter 2, e use many word wey resemble wetin dey the book of Psalms. (For example, compare wetin dey Jonah 2:2, 5 with Psalm 69:1; 86:7.) E clear say Jonah know this place for Psalm. So, when e think deep about this verse them, this one make-am dey sure say Jehovah go help-am. Later, the fish vomit Jonah for dry land and na that time e make up im mind to do the work wey Jehovah give-am.—Jonah 2:10–3:4.

7-8. Wetin help one brother from Taiwan to fit dey strong when e de face problem?

⁷ Jonah example fit help us when we de face problems. For example, one brother wey im name na Samuel b from Taiwan, get serious sickness. Ontop this one, some of im family members de suffer-am because e serve Jehovah. But e get the power wey e need to fit endure, from im prayer and personal study. But e talk say: “Sometimes when I de face problem e de worry me sotey I no de fit do my personal study.” But e no let that one make-am tire. E talk say: “The first thing wey I de do na to pray to Jehovah, then I go listen to our songs from my earphone. Sometimes, I de even sing follow the song as e de play, until  my mind calm down. Then, I go start to study Bible.”

⁸ The things wey Brother Samuel learn from im personal Bible study don help-am fit endure im problem. For example, after them do-am one serious operation, one nurse tell-am say them go need to give-am blood because im blood too low. The night before them do-am the operation, e don read the story of one sister wey them do-am the same operation. The sister blood low well-well even pass Brother Samuel own, but the sister no gree take blood and e well. The sister story help Brother Samuel to fit continue to trust Jehovah.

9. If your problem de make you weak, wetin you fit do? (Still check the picture.)

⁹ When you de face problem, e de hard you to tell Jehovah exactly how you de feel? Or e de tire you to study? Remember say Jehovah understand wetin you de face. So even when you pray short prayer, you fit dey sure say Jehovah go give you wetin you need. (Eph. 3:20) If you de feel bad sotey e de hard you to read and study, you fit try to listen to Bible or our book them wey them don record. Another thing wey fit help you na to listen to our song or watch video for jw.org. As you de pray to Jehovah and de look for answer for Bible and from the things wey Jehovah organization don give us, Jehovah go make you strong.

10. How Jehovah fit use our brothers and sisters to encourage us?

¹⁰ Jehovah fit use our brothers and sisters to encourage us. Them fit “really comfort” us when we de face problem or when e no easy for us to fit do the work wey Jehovah organization give us. (Col. 4:10, 11) We really need good friends especially when we de face problem. (Prov. 17:17) When we get problem, our brothers and sisters fit comfort us, help us, and encourage us to fit continue to serve Jehovah. Make we see how other people encourage Mary wey be Jesus mama.

11. Why Mary need strong mind to fit do the work wey Jehovah give-am?

¹¹ Mary need strong mind to fit do the work  wey Jehovah give-am. Mary go don worry well-well when angel Gabriel tell-am the work wey Jehovah want make e do. Mary never marry, but the angel tell-am say e go get belle. E never get pikin before, but the angel tell-am say e go care for the pikin wey go later be the Messiah. And since e never sleep with man before, how e go take explain all this one to Joseph wey go soon become im husband?—Luke 1:26-33.

12. As e dey for Luke 1:39-45, wetin Mary do to get strong mind to fit do the big work wey Jehovah give-am?

¹² Wetin Mary do wey help-am get strong mind to fit do the big work wey Jehovah give-am? E look for help from other people. For example, E ask angel Gabriel make e tell-am more about the work. (Luke 1:34) Small time after Mary talk with the angel, e travel “go one city for Judah for the area wey mountains dey” to visit Elizabeth wey be im relative. E really gain from the visit. Jehovah use Elizabeth tell-am plenty things wey go happen to the pikin and e praise Mary well-well. All this one really encourage-am. (Read Luke 1:39-45.) Mary talk say, Jehovah “don use im hand do powerful things.” (Luke 1:46-51) Jehovah use angel Gabriel and Elizabeth to encourage Mary.

13. Wetin happen when one sister ask brothers and sisters for help?

¹³ Like Mary, you too fit get help from brothers and sisters. E get the time wey one sister from Bolivia wey im name na Dorcas need help from brothers and sisters. When doctor tell-am say im papa get one sickness wey no get cure, Sister Dorcas stay with-am for hospital to care for-am. (1 Tim. 5:4) E no easy for-am that time. E talk say: “Many times I feel like say I no go fit continue to care for-am.” E tell anybody say e need help? For the beginning, e no talk say e need help. E talk say: “I be no want worry the brothers and sisters. I tell myself say ‘na Jehovah go give me the power wey I need.’ But after, I see say na because I no tell brothers and sisters about my problem, na im make I de struggle with-am alone.” (Prov. 18:1) So e decide to write to some of im friends and explain the problem wey e de face. E talk say: “Mouth no fit talk how brothers and sisters encourage me. Them bring me food for hospital and still read some Bible verse them with me. E really sweet me when I see say I no dey alone. We be part of Jehovah family and our brothers and sisters ready to care for us, cry with us, and encourage us to continue to serve Jehovah with them.”

14. Why e good make we accept help from elders?

¹⁴ One way wey Jehovah de give us power na through the elders. Them be gift from Jehovah to help and encourage us. (Isa. 32:1, 2) So, when you get any problem, try tell the elders. And when them help you, accept the help. Jehovah fit use the elders to encourage you.

15. Which hope all servants of Jehovah get?

¹⁵ The hope wey Bible de give us about our future, de make us strong. (Rom. 4:3, 18-20) As servants of Jehovah, we get the hope to live forever for paradise for this earth or for heaven. This one de help us fit endure any problem wey we de face, preach the good news, and do any work wey Jehovah organization give us. (1Thess. 1:3) Na this hope give apostle Paul power.

16. Why apostle Paul be need power to fit endure?

¹⁶ Apostle Paul be need power to fit endure.  For the letter wey e write to the congregation for Corinth, e compare imself to clay container wey fit break. ‘Problems surround-am for every way,’ e “confuse,” ‘them suffer-am,’ and ‘them nack-am for ground.’ In fact, im enemy them, almost kill-am. (2 Cor. 4:8-10) Apostle Paul write all this one when e de travel for im third missionary work. After all this one wey e write, e still face more problems. Plenty people attack-am, them arrest-am, im ship scatter ontop water, and them put-am for prison.

17. As e dey 2 Corinthians 4:16-18, wetin give apostle Paul power to fit endure?

¹⁷ Apostle Paul put mind for the hope wey e get and this one give-am power to fit endure. (Read 2 Corinthians 4:16-18.) E tell the Christians for Corinth say even if im body de weak as time de go, this one no go make-am tire. Apostle Paul put mind for wetin e go gain for future. The hope wey e get really dey special to-am and this one make-am ready to fit endure any problem wey e de face so that e go enjoy wetin e de hope for. Because e continue to think deep about im hope, this one make-am “strong again everyday.”

18. How the hope wey Brother Timothy and im family get help them to fit endure?

¹⁸ The hope wey Brother Timothy from Bulgaria get about the future really help-am fit endure the problem wey e face. Some years ago, im younger brother wey im name na David die for accident. This one pain Brother Timothy well-well. E and im family think deep about the time wey God go bring people wey don die back to life, and this one help them to fit endure. E talk say: “For example, we discuss about where we go meet David, which food we go cook for-am, the people wey we go invite to join us for the party wey we go do to welcome-am, and the things wey we go tell-am about wetin happen before Armageddon.” Brother Timothy talk say because them put mind for the hope wey them get, this one help them fit endure and continue to wait for  the time wey Jehovah go bring im brother back to life.

19. How you fit make your faith for Jehovah promise for future to strong more-more? (Still check the picture.)

¹⁹ How you fit make your faith for Jehovah promise about our future strong more-more? For example, if your hope na to live forever for paradise for this earth, then read Bible verse them wey talk about-am and think deep about them. (Isa. 25:8; 32:16-18) Think deep about how life go be for paradise. See yourself for there. Who you de see? Wetin you de hear? How you de feel? To help you see-am clear for your mind, look pictures wey show paradise for our book them or watch music video like When the New World Don Come, E No Take Long to Happen, or Think of the Time. If we de always think about paradise, we go see say our problem “na only for short time and na small thing.” (2 Cor. 4:17) Your hope go make you strong.

20. When we dey weak, wetin we need to do to get power from Jehovah?

²⁰ When we dey weak, “God go give us power.” (Ps. 108:13) Jehovah don give us everything wey fit help us get the power wey we need. So wetin you go do when you need help to do the work wey Jehovah organization give you, to fit endure problem, or continue to de happy? Pray to Jehovah with all your heart, do your personal study, accept help from brothers and sisters, and always think about the hope wey you get for the future. Then ‘God go give you all the power wey you need to dey strong, so that you go dey patient and de happy as you de endure.’—Col. 1:11.