For the 40 years wey Israel people dey wilderness, na manna be the main food wey them chop. (Ex. 16:35) Another thing be say, Jehovah give them quail two times. (Ex. 16:12, 13; Num. 11:31) But this one no mean say na only quail and manna them chop. Them still chop other food, even though say e no plenty.

For example, sometimes, Jehovah lead im people to where them fit get water and food. (Num. 10:33) One of the place wey e carry them go na Elim. Elim “get 12 place wey water de come out from ground, and 70 palm tree,” wey them de call date palms. (Ex. 15:27) One book wey im name na Plants of the Bible talk say: “This date palm de grow for plenty place and na one of the plant wey de produce food for people for desert, e fit give them oil, and them fit use-am cover theirself from sun or even use-am build house.”

E fit be say Israel people stop for one place wey plenty water dey wey them de call Feiran. This water na part of one long river wey dey for some valley wey them de call Wadi Feiran. This Wadi de get water only when rain fall. a One book wey them de call Discovering the World of the Bible talk say: “The valley long well-well reach 81 miles [130 km] and na im people know pass, na im fine pass and e dey part of the river wey long pass for Sinai area. That place wey Israel people stop wey them de call Feiran, dey for one place for this long valley wey them de call Wadi Feiran. This Feiran long reach 3-mile [4.8 km], the water long reach 28 miles [45 km] from the beginning of the valley. And na about 2,000 feet [610 m] this place take high pass sea level. The place fine well-well sotey them de compare-am with garden of Eden. Date palms full the place and plenty people de come there because of the date palms.”

Another thing be say, when Israel people de comot from Egypt, them carry plenty things comot, like flour wey them don mix wey person fit use make bread, pan wey person fit use mix flour, wheat and even oil. Na true say this things fit no last. Another thing be say, them carry plenty animal, like sheep and cow. (Ex. 12:34-39) Because of the bad condition for wilderness, e fit be say many of the animal die. E fit be say them kill some of them chop and use some do sacrifice, even to lie-lie god. b (Acts 7:39-43) Even with this  one, Israel people still get some animals. We know this one because of wetin Jehovah tell them when them disobey-am. E tell them say: “Una pikin them go be shepherds for wilderness for 40 years.” (Num. 14:33) So, e fit be say them get milk from their animal and sometime, them de kill them chop. But this one no go fit feed three million people for 40 years. c

Where Israel people get food and water to give their animal? d That time e fit be say rain de fall well-well and plenty grass dey for the wilderness. Insight on the Scriptures, Volume 1, talk say about 3,500 years ago, “the water wey dey where Israel people dey that time plenty pass wetin dey there today. We know this one because plenty valley dey there now wey be river before. And this one show say, rain be de fall well-well that time wey form the river.” Even though say water dey the area that time pass the way e dey now, na still dry and dangerous place to stay. (Deut. 8:14-16) If to say Jehovah no use miracle give Israel people and their animals water, all of them for die.—Ex. 15:22-25; 17:1-6; Num. 20:2, 11.

Moses tell Israel people say Jehovah give them manna so that them go know say “no be only food person need to live, but person need every word wey de come from mouth of Jehovah to dey alive.”—Deut. 8:3.