1-2. Wetin be the best way to read and study Bible? Give example.

 IMAGINE say you want buy one house. Wetin you go do before you pay for the house? Na only the picture of the house you go like see? No. The truth be say you go like see the house by yourself and waka round-am, go inside and check everything about the house. We dey sure say you go like see everything about the house wey you want buy.

² We fit do the same thing when we de read and study Bible. One book wey them write about Bible talk say: “The message for Bible be like one house wey tall and the foundation go down well-well.” So, wetin we go do to fit understand Bible well. If you rush read Bible na only “simple things” you go fit learn and you no go gain plenty. (Heb. 5:12) Just as you go do for the house, take time study Bible well. One way to fit study Bible well na to see how the different-different story for Bible connect to each other. Another thing be say, make you try understand wetin you de learn from Bible and why you believe say na the truth.

3. Wetin apostle Paul tell Christians for im time say make them do and why? (Ephesians 3:14-19)

³ To fit really understand Bible well, we need to take time study the deep truth wey dey Bible. Apostle Paul encourage Christians for im time say make them take time study God word. This one go make them fit really understand how  the truth wide, long, high and deep reach. E go make their faith strong and them go fit stand well. (Read Ephesians 3:14-19.) Na the same thing we need to do. Now, make we see how we fit take time study Bible to understand-am well.

4. Wetin we go do to fit near Jehovah more-more? Give example.

⁴ As servant of Jehovah, no be only simple things we de like to learn from Bible. With the help of God spirit, e de sweet us to learn “even the deep things of God.” (1 Cor. 2:9, 10) For your personal study, do research for some topic and e go make your friendship with Jehovah strong more-more. For example, you fit take time study how Jehovah show say e love im servant for Bible time and how this one show say e love you too. You fit study about how Jehovah arrange make Israel people worship-am and compare-am to how we de worship-am today. Or you go fit study about how wetin Bible talk say go happen for Jesus life, happen when e dey this earth.

5. E get any topic wey you go like take time study more about for your personal study?

⁵ Some brothers and sisters wey like to take time study, talk somethings wey them go like to know more about for their personal study. Some of the things wey them talk dey inside the box wey be “ Topics for Personal Study.” You go really enjoy to use Watch Tower Publications Index or Research Guide for Jehovah’s Witnesses, to study this topic them. When you do deep Bible study, e go make your faith strong and help you know God well. (Prov. 2:4, 5) Now, make we talk about some deep Bible truth wey we fit take time study well.

6. (a) How plan dey different from wetin person get for mind to do? (b) Why we fit talk say wetin Jehovah get for mind to do for us go last forever? (Ephesians 3:11)

⁶ Make we talk about wetin Jehovah get for mind to do. To plan how you want do something different from wetin you get for mind to  do. We fit compare plan to the only road wey person fit pass go somewhere. If something block the road, the person no go fit reach where e de go. Wetin person get for mind to do, just be like the place wey the person de go. The person know where e de go but e fit pass different road to fit reach there. So if one road block, e fit pass another road. We happy say, small-small Jehovah de explain to us ‘the everlasting things wey e get for mind to do.’ (Check study note for Ephesians 3:11, for English.) Jehovah fit use different-different way to do wetin e get for mind and e de always succeed because “e don arrange everything so that wetin e want go happen.” (Prov. 16:4) And everything wey Jehovah do go last forever. Wetin Jehovah get for mind to do? And how e don change somethings to fit do wetin e get for mind?

7. After Adam and Eve sin, how Jehovah change how e go do wetin e get for mind to do? (Matthew 25:34)

⁷ When Jehovah make Adam and Eve, e tell them wetin e get for mind for them. E tell them say: “Make una born pikin them, make una plenty and full this earth and de control every animal for the earth.” (Gen. 1:28) When Adam and Eve sin, this one no spoil wetin Jehovah get for mind to do. Instead, Jehovah only change how e go take do-am. How e take do this one? At once, Jehovah decide say e go form one government for heaven wey e go use do wetin e get for mind for us and for the earth. (Read Matthew 25:34.) When the time wey Jehovah don set reach, e send im only special Son to teach us about the Kingdom and die, to save us from sin and death. Jehovah bring Jesus back to live so that e go be King of the Kingdom. But plenty other things dey wey God get for mind to do for us wey we fit think about.

8. (a) Wetin be the message for Bible? (b) As e dey Ephesians 1:8-11, wetin be another thing wey Jehovah get for mind to do? (Check picture for front cover.)

⁸ Jehovah go use im Kingdom wey Jesus be the King to make im name holy and do wetin e get for mind. This na the message for Bible. Nothing fit stop wetin Jehovah get for mind to do. E promise us say e go do everything wey e don talk. (Isa. 46:10, 11, ftns.; Heb. 6:17, 18) Small time, Jehovah go make this earth paradise and all Adam children wey worship Jehovah well go dey perfect and “enjoy life forever.” (Ps. 22:26) But this one no be the only thing wey Jehovah get for mind to do. E go make all im servant for heaven and earth dey together as one. Then everybody for heaven and earth go obey Jehovah as their King. (Read Ephesians 1:8-11.) E really sweet to see the way Jehovah de do wetin e get for mind.

9. When we study Bible, how far we fit know about our future?

⁹ Make we talk about wetin Jehovah talk for the garden of Eden as e dey for Genesis 3:15. b E talk about how e go take make wetin e get for mind happen, even though say many years go pass before e go happen. One of the things wey go make-am happen be say, after many generation, one of Abraham pikin-pikin go born the person wey go be Christ. (Gen. 22:15-18) Then, them go kill Jesus wey be the Christ but Jehovah go bring-am back to life, this one happen for the year 33 C.E. This one just be like say them wound-am for leg just as Bible talk. (Acts 3:13-15) The remaining part of wetin Jehovah talk say go happen wey be to scatter Satan head, go happen  more than 1,000 years from now, when Jesus go destroy Satan forever. (Rev. 20:7-10) Bible tell us more things about how this world wey Satan de control go dey against servants of Jehovah go reach when Armageddon go come.

10. (a) Which things go soon happen? (b) How we fit prepare our heart and mind? (Still check footnote.)

¹⁰ Think about this serious thing wey Bible talk say go happen. First, government for this world go talk say: “Peace don dey and we don dey safe.” (1 Thess. 5:2, 3) Then, them go attack lie-lie religion and great tribulation go start. (Rev. 17:16) After that one, e fit be say people go see some powerful things about “the Son of man . . . for the cloud of heaven with power and big honor.” (Matt. 24:30) Jesus go judge people and separate people wey Bible call sheep from people wey e call goat. (Matt. 25:31-33, 46) As all this one de happen, Satan go still de fight against Jehovah people. E go even bring nations together wey Bible call Gog of Magog to attack Jehovah people. (Ezek. 38:2, 10, 11) As great tribulation de happen, the anointed Christian wey remain for this earth go go heaven. Them go join Jesus and other angels fight the war of Armageddon wey go be the end of great tribulation. c (Matt. 24:31; Rev. 16:14, 16) Then, one thousand years wey Jesus go take rule go start.—Rev. 20:6.

11. Which things we go enjoy for paradise? (Still check the picture.)

¹¹ Now think how life go be after you don live for 1,000 years. Bible talk say, God don put-am for our heart to want live forever. (Eccl. 3:11) Think about wetin this one mean for you and your friendship with Jehovah. The book wey the title na Draw Close to Jehovah talk something wey sweet us for page 319. E talk say: “After we don live for hundreds, thousands, millions and even billions of years, we go don know plenty things about Jehovah pass wetin we know now. But we go still feel say plenty other things dey wey we still need to learn about Jehovah.” Life for Paradise go really sweet. And we go really  enjoy to de learn about Jehovah and continue to make our friendship with-am strong. But for now, we go continue to study God word. Which other things we fit take time study about?

12. How we go fit see things wey dey heaven? Give example.

¹² Bible tell us small thing about heaven where Jehovah and the angels dey. (Isa. 33:5) Bible tell us wonderful things about Jehovah and the part of im organization wey dey for heaven. (Isa. 6:1-4; Dan. 7:9, 10; Rev. 4:1-6) For example, we fit read about the wonderful things wey Ezekiel see when “heaven open and [e] start to see vision about God.”—Ezek. 1:1.

13. As e dey Hebrews 4:14-16, wetin you like about the work wey Jesus de do for us for heaven?

¹³ Still think about wetin Jesus de do for us for heaven as our King and High Priest wey really care for us. We fit use im name beg God for mercy and help “for the right time.” (Read Hebrews 4:14-16.) Make we no ever let one day pass wey we no think deep about wetin Jehovah and Jesus don do and de do for us for heaven. Make we let the love wey them de show us touch our heart and move us to use all our heart preach and worship Jehovah.—2 Cor. 5:14, 15.

14. To show say we value wetin Jehovah and Jesus de do for us, wetin be one of the best thing wey we fit do? (Still check the picture.)

¹⁴ One of the best way wey we fit show say we value wetin Jehovah and Jesus de do for us na to help other people become servant of Jehovah. (Matt. 28:19, 20) This na wetin apostle Paul do to show say e really value wetin Jehovah and Jesus do for-am. Apostle Paul know say, wetin Jehovah want na to save “all kind of people and make them  come know the correct teaching.” (1 Tim. 2:3, 4) E really work hard for the preaching work to help plenty people, so that e go do im “best to save some people.”—1 Cor. 9:22, 23.

15. As e dey Psalm 1:2, wetin go make us happy?

¹⁵ Wetin the person wey write Psalm one talk really correct, e talk say person go happy and succeed for life if e de really “enjoy the law of Jehovah” and e de read and “think deep about-am day and night.” (Ps. 1:1-3) One Bible translator wey e name na Joseph Rotherham talk about this verse for one book wey e write wey the title na: “Studies in the Psalms.” E talk say: “Make you really want make God direct you. Make you de read Bible to show say you want make e de direct you, look for how God fit use wetin you read direct you, learn about-am, and take time think deep about-am.” E still talk say: “If one day pass and person no read Bible, e mean say that day don waste.” To fit really enjoy to study Bible, try to understand everything wey you fit learn when you study Bible and see how all the message connect together. E de really sweet to take time study all the part of the message for Bible.

16. Wetin we go talk about for the next article?

¹⁶ The wonderful truth wey Jehovah de teach us for Bible, na wetin we fit understand. For the next article, we go talk about Jehovah wonderful temple wey apostle Paul talk about for the letter wey e write to Hebrew Christians. This na really deep truth. Our prayer be say make you enjoy-am as you take time to study this important truth.