1. Wetin one angel de talk, and how wetin e de talk suppose affect us?

 IF ANGEL want talk to you, you go listen to-am? Well, for this our time, one angel de talk to people for “every nation and tribe and language and skin color.” Wetin e de tell them be say: “Make una fear God and give-am glory, . . . make una worship the Person wey make the heaven and the earth.” (Rev. 14:6, 7) Na Jehovah be the only true God wey everybody suppose worship. E de really make us happy say Jehovah don give us the special favor to worship-am for im wonderful temple.

2. Wetin be Jehovah wonderful temple? (Still check the box “ Wetin E No Be.”)

² Wetin be this temple? And where we go see more things wey go help us understand-am more? Jehovah wonderful temple no be house wey them build with hand. But na the arrangement wey Jehovah don make for im servants to fit worship-am well as Jesus don sacrifice im life. Apostle Paul use the letter wey e write to Hebrew Christians for Judea for im time, explain this arrangement wey Jehovah don make. b

3-4. Why apostle Paul write letter to Hebrew Christians for Judea, and how e help them?

³ Why apostle Paul write letter to Hebrew Christians for Judea? E fit be say e get two reason why e write-am. The first one na to encourage them. Plenty of this Hebrew Christians grow for Jew people religion. So e fit be say the people wey de lead for Jew people religion go don de laugh them as them become Christians. Why? Because Christians no get temple wey them  fit go to worship Jehovah, so them no get altar wey them de use do sacrifice and them no still get priest to do sacrifice for them. This one fit make their faith weak. (Heb. 2:1; 3:12, 14) This one fit don even make some of them want go back to their former religion.

⁴ Second, apostle Paul make-am clear to them say them no de do their best to understand new or deep Bible teaching wey be “solid food” wey dey Bible. (Heb. 5:11-14) E dey clear say some of them still de follow the Law of Moses. Apostle Paul explain to them say the sacrifice wey the Law say make them de do no reach to make Jehovah forgive their sin finish. Because of this one, the Law don end. Na this one make apostle Paul teach them some deep things from Bible. E help them see the “better hope” wey them get, because as Jesus die for them, them go fit “near God” more.—Heb. 7:18, 19.

5. Wetin we need to understand for the book of Hebrews, and why?

⁵ Apostle Paul explain to the Hebrew Christians why the way Christians de worship Jehovah better pass the way Jew people worship-am. The things wey Jew people de do for their religion na only “shadow of the things wey de come, but the real thing na the Christ.” (Col. 2:17) The shadow of something de only show the shape of the thing. Na so e still be, the way Jew people worship Jehovah na only shadow of the real thing wey de come. We need to understand the arrangement wey Jehovah don make to fit forgive our sin so that we go fit worship-am well. Now, make we compare the “shadow” (the way Jew people worship God), to the “real thing” (the way Christians de worship God), as apostle Paul explain-am for the book of Hebrews. This one go help us really understand Jehovah wonderful temple and how e concern us.

6. How Israel people use the tabernacle?

⁶ The shadow. Apostle Paul use the tabernacle wey Moses make for the year 1512 B.C.E, to help us understand this temple wey e de talk about. (Check the picture for page 27 wey the title na “The Shadow—The Real Thing.”) The tabernacle be like small house wey them use cloth make and Israel people de carry-am go anywhere them de go. Them use-am worship Jehovah for almost 500  years, until them build temple for Jerusalem. (Ex. 25:8, 9; Num. 9:22) Na where this tabernacle dey Israel people de gather to worship Jehovah and do sacrifice to-am. (Ex. 29:43-46) But the tabernacle stand for something wey better pass, wey de come wey be the way Christians de worship Jehovah.

7. Which time the arrangement for Jehovah wonderful temple start?

⁷ The real thing. The tabernacle wey Israel people use worship Jehovah na “shadow of the things for heaven,” so e stand for Jehovah wonderful temple. Apostle Paul talk say “this tent [or, tabernacle] na example of wetin dey now.” (Heb. 8:5; 9:9) So by the time wey Paul write to Hebrew Christians, the arrangement of this wonderful temple, don already dey for Christians. Na the year 29 C.E. e start. Na that year Jesus baptize and Jehovah use holy spirit anoint-am and make-am “great high priest.” c—Heb. 4:14; Acts 10:37, 38.

8-9. With wetin dey Hebrews 7:23-27, how the high priest for Israel take different from our great High Priest wey be Jesus?

⁸ The shadow. Na the high priest de stand for the people when them want do sacrifice. Na Aaron be the first high priest wey Jehovah appoint for Israel when them de dedicate the tabernacle. But just as apostle Paul talk, “many people need to become priest one after another, because death no gree make them continue to serve as priest.” d (Read Hebrews 7:23-27.) And as e be say the priest them no perfect, them de do sacrifice for their own sin. This one show say big difference dey between our great High Priest and the high priest them for Israel that time.

⁹ The real thing. Na Jesus be our High Priest and na ‘servant of the real tent. Na Jehovah make this tent, no be man.’ (Heb. 8:1, 2) Apostle Paul talk say “because [Jesus] continue to live forever, nobody go take over from-am as priest.” Paul still talk say Jesus ‘no de do any bad thing, e no be like people wey de sin,’ and say Jesus no be like the high priest them for Israel wey need to first sacrifice for their own sins. Now make we talk about how the altars and the sacrifice wey them do for Israel that time (the shadow), take different from the way Christians de worship God (the real thing).

10. Wetin the sacrifice wey them de do for the altar wey them use copper make, stand for?

¹⁰ The shadow. Altar wey them make with copper dey front of the tabernacle, where them de use-am do animal sacrifice to Jehovah. (Ex. 27:1, 2; 40:29) But the animals wey them de use do the sacrifice, no fit make Jehovah forgive the people sin finish. (Heb. 10:1-4) So, the animal wey them de sacrifice stand for the sacrifice wey Jesus go do to free people from their sin.

11. Which kind altar Jesus take sacrifice im own life? (Hebrews 10:5-7, 10)

¹¹ The real thing. Jesus know say Jehovah send-am come this earth to use im life do sacrifice for human being. (Matt. 20:28) So when e baptize, e show imself to Jehovah say e want do wetin Jehovah want. (John 6:38; Gal. 1:4) But which kind altar Jesus take sacrifice im own life? The altar no be the type wey the priest them take de do sacrifice to Jehovah, but e stand for wetin Jehovah  “want.” Jesus sacrifice im life “once and for all” to free everybody from their sin if them put faith for the Christ. (Read Hebrews 10:5-7, 10.) Now make we talk about wetin inside the tabernacle stand for.

12. Who fit enter Holy Place and Most Holy?

¹² The shadow. Just as the tabernacle get two room for inside, na so e still be for the temple wey them later build for Jerusalem. Them de call the two room “Holy Place” and “the Most Holy” and na curtain divide them. (Heb. 9:2-5; Ex. 26:31-33) The things wey dey inside the room wey them de call the Holy Place na, lampstand wey them make with gold, altar wey them take de burn incense, and one table wey them de put showbread. Na only the priests de enter this Holy Place to do the work wey Jehovah give them. (Num. 3:3, 7, 10) And the thing wey dey the room wey them de call Most Holy na, ark of covenant wey show say Jehovah dey with them. (Ex. 25:21, 22) Na only the high priest fit enter Most Holy once every year, the day wey them de do sacrifice for all Israel people sin. (Lev. 16:2, 17) Every year, e go enter the Most Holy with the blood of animal to sacrifice for im own sin and the sin of everybody for Israel. As time de go, Jehovah use im holy spirit help im servants understand wetin this part of the tabernacle, stand for.—Heb. 9:6-8. e

13. Wetin the part of the tabernacle wey them de call Holy Place and Most Holy stand for?

 ¹³ The real thing. Jehovah don use holy spirit anoint some of Jesus disciples and this one make them special children to Jehovah. Them be 144,000 people and them go be priest with Jesus for heaven. (Rev. 1:6; 14:1) The part for the tabernacle wey them de call Holy Place, stand for the favor wey God show them as e choose them as im children when them still dey this earth. (Rom. 8:15-17) The part of the tabernacle wey be Most Holy stand for heaven, where Jehovah dey. “The curtain” wey divide Holy Place and Most Holy stand for Jesus body when e dey this earth, wey make-am no fit enter heaven as great High Priest of Jehovah wonderful temple. As Jesus sacrifice imself, e no come get human being body again. This one open way for all anointed Christians to fit go heaven. But for them to fit go heaven, them must die so that Jehovah go bring them back to life as spirit and them no go get body like us again. (Heb. 10:19, 20; 1 Cor. 15:50) After Jehovah bring Jesus back to life, Jesus enter the Most Holy for Jehovah wonderful temple. And the 144,000 go join-am for there, when them go heaven.

14. From wetin Hebrews 9:12, 24-26 talk, why the arrangement wey Jehovah make for us to fit worship-am well better pass the way Israel people worship-am?

¹⁴ E dey clear say the arrangement wey Jehovah make for us to fit worship-am well, really better pass the way Israel people worship Jehovah. This one dey possible because, Jesus die for us and become the great High Priest. For Israel people time, high priest de enter Most Holy with blood of animal wey e use do sacrifice. And na people build the tabernacle. But na heaven Jesus enter, wey be the place wey holy pass, where Jehovah dey. When e reach there, e use the value of im perfect life pay for our sin. This one mean say Jesus give Jehovah the right wey e get to live as perfect person for earth. Jehovah come accept-am. Na that right Jehovah go take free us from sin and death. (Read Hebrews 9:12, 24-26.) Jesus sacrifice na the only sacrifice wey fit clean our sin comot finish. Now the next thing wey we go talk about na whether our hope na to stay for this earth forever or na to go heaven, all of us go fit worship Jehovah for im wonderful temple.

15. Who de work for the compound of the tabernacle?

¹⁵ The shadow. The tabernacle get one compound wey them fence and na there priests de do their work. One big copper altar dey there wey them de use do animal sacrifice. One copper basin wey water dey inside, dey there wey priests de use wash their hand and other part of their body before them do their work. (Ex. 30:17-20; 40:6-8) But the temple wey them later build get two compound. Na the first one the people wey no be priest de stand worship God, and na there you go first reach when you go the temple. And the second one na where the priests de do their work.

16. Which people de worship Jehovah for the two compound wey dey Jehovah wonderful temple?

¹⁶ The real thing. Before anointed Christians join Jesus for heaven as priest, them worship Jehovah well for this earth for the second compound of Jehovah wonderful temple. The big basin of water wey dey the tabernacle and the temple, de remind the anointed Christians and even all of us to dey clean for every area of our life as we de worship Jehovah. So, where the other servants of Jehovah  wey no be anointed Christians come de worship Jehovah for this wonderful temple? Apostle John see as them “stand for front of the throne.” So, e just be like say them dey for the first compound of Jehovah wonderful temple, as “them de do holy work for-am day and night.” (Rev. 7:9, 13-15) We really happy say we get the favor to worship Jehovah for im wonderful temple, wey be the arrangement wey Jehovah don make for us to worship-am for the correct way!

17. Which honor we get today as we de worship Jehovah?

¹⁷ Today, all servant of Jehovah get the honor to use their time, power and things wey them get worship Jehovah. Just as apostle Paul tell Hebrew Christians, we go fit use wetin we de talk for public, about God name, de praise-am. (Heb. 13:15) We go show say we really value the favor wey we get to worship Jehovah when we give Jehovah our best as we de worship-am.

18. From wetin Hebrews 10:22-25 talk, which things we no suppose take play and wetin we no suppose ever forget?

¹⁸ Read Hebrews 10:22-25. Near the end of the letter wey Paul write to Hebrew Christians, e tell us somethings wey we no suppose take play as we de worship Jehovah. Them be, to de pray, to de preach to people, to de go meeting, and to de encourage our brothers and sisters as we de see as the day of Jehovah de near more-more. Near the end of the book of Revelation, Jehovah angel talk say: “Worship God.” Na two times e talk-am to show say e really dey important. (Rev. 19:10; 22:9) Make we no ever forget this deep truth wey we don learn for Bible about Jehovah wonderful temple and make we always value the honor wey we get to worship our great God Jehovah.