1. How Jehovah de feel when we de do our best to worship-am even when we de face problem?

 JEHOVAH de see all the things wey im servants for this earth de face. E de see when them de happy and when them no de happy. (Ps. 37:18) Jehovah de happy with us well-well when e see say we de do our best to worship-am even when we de face problem. E really ready to help us and make our mind come down.

2. Wetin Jehovah de do for people wey de feel say their own don finish, and how we fit gain from the way Jehovah de care for us?

² Psalm 147:3 show say Jehovah de care for people wey de feel say their own don finish, the way good doctor de care for person wey wound. This verse de help us see how Jehovah de sofri care for people wey problem de worry them for mind. But wetin we go do if we want gain from the way Jehovah de care for us? Think about this example. Doctor wey sabi im work well-well fit help person wey injure, make im wound heal. But if the person want make the treatment work well, e need to follow wetin the doctor tell-am. For this article, we go see wetin Jehovah tell people wey de feel say their own don finish, and we go talk about how we fit follow the advice wey Jehovah give us.

JEHOVAH REALLY VALUE US

3. Why some people de feel say them no get value?

³ Many people for this world no love other people, and because of this one, the way them de treat other people de make the people feel say them dey useless. One sister wey im name  na Helen a talk say: “For our family, my papa and mama no love us at all. My papa dey harsh and e de vex well-well and e de always tell me say I dey useless.” Just like Sister Helen, e fit be say people don treat you for bad way, talk bad about you plenty times, or make you feel say you dey useless. This one fit make you feel say nobody really love you.

4. As e dey for Psalm 34:​18, how Jehovah de feel about people wey de feel say their own don finish, and wetin e promise them?

⁴ Even though say people treat you for bad way, make you get-am for mind say Jehovah love you and value you. Jehovah “near people wey de feel say their own don finish.” (Read Psalm 34:18.) If you de feel say you dey useless, make you remember say Jehovah see good things for your heart wey make-am draw you to imself. (John 6:44) E always ready to help you because e love you well-well.

5. Wetin we fit learn from the way Jesus treat people wey other people no treat well?

⁵ We fit know how Jehovah de feel about us when we think about Jesus example. When Jesus dey this earth, e care for people and show them love even when other people make them feel say them dey useless. (Matt. 9:​9-12) When one woman wey get serious sickness touch Jesus cloth so that e go well, Jesus make the woman mind come down and praise-am because of im faith. (Mark 5:​25-34) Jesus copy im Papa example finish. (John 14:9) So you fit dey sure say Jehovah value you, and e de see all the good things about you, like your faith and the love wey you get for-am.

6. Wetin you fit do if you de feel say you dey useless?

⁶ Wetin you fit do if you ever feel say you dey useless? Read Bible verse them wey go help you see say Jehovah value you, and think  deep about them. b (Ps. 94:19) If you no fit do reach as you for like do, or you no happy as you no fit do reach wetin other people de do, no think say na because you no de try. Jehovah no de expect say make you do pass your power. (Ps. 103:​13, 14) If somebody do bad thing to you for past, make you no blame yourself for wetin the person do. The truth be say, e no suppose treat you like that. Remember say Jehovah de judge people wey de treat other people for bad way, but e de help the person wey them treat for bad way. (1 Pet. 3:12) One sister wey im name na Sandra wey them treat for bad way when e small, talk say: “I de always beg Jehovah say make e help me de see good things about myself just the way e de see good things about me.”

7. How we fit use wetin we don face for life to help other people as we de serve Jehovah?

⁷ Get-am for mind say Jehovah fit use you help other people. E don give you the special favor to work with-am for the preaching work. (1 Cor. 3:9) Because of the things wey you don face for your life, e fit make-am easy for you to understand how people wey de face that kind problem de feel. This one go make you fit really help them. Sister Helen wey we don talk about before receive the help wey e need and now e de fit help other people. E talk say: “Before, I de feel say I dey useless, but Jehovah don show me love and use me help other people.” Now, Sister Helen na regular pioneer and this one de make-am happy well-well.

JEHOVAH NO WANT MAKE WE DE WORRY ABOUT OUR SIN AFTER E DON FORGIVE US

8. Wetin Jehovah promise us for Isaiah 1:18?

⁸ Some servants of Jehovah still de worry because of the bad things wey them don do for past, both the ones wey them do before them baptize and even after them baptize. No forget say na the deep love wey Jehovah get for us make-am send Jesus make e come die for our sin. We dey sure say Jehovah want make we gain from Jesus sacrifice. Jehovah don promise us say after we don “settle the matter wey dey ground” c with-am, e no go use the sin judge us again. (Read Isaiah 1:18.) We really happy say our Papa wey love us, no de remember our sin again after e don forgive us! But e no de ever forget the good things wey we don do.—Ps. 103:9, 12; Heb. 6:10.

9. Why e dey important make we de put mind for wetin we fit do now and wetin Jehovah promise us, instead make we de worry about sins wey Jehovah don forgive?

⁹ If you de worry about the sins wey you don commit before, wey Jehovah don forgive you, do your best to think about wetin you de do now and wetin you go fit do for future. See the example of apostle Paul. E pain-am well-well say before, e suffer Christians, but e know say Jehovah don forgive-am. (1 Tim. 1:​12-15) You think say apostle Paul continue to worry about the sins wey e commit before e become Christian? No. E no continue to think about-am, just the way e no continue to think about the way e be important Pharisee person wey people respect for past. (Phil. 3:​4-8, 13-15) Instead, apostle Paul continue to put body for the preaching work and de think about wetin Jehovah get for mind for-am for future. Like apostle Paul, you no go fit change wetin don happen. But you go fit use all your heart worship Jehovah now and put mind for wetin e don promise say e go do for us for future.

10. Wetin we fit do if we don do some things wey pain other people?

 ¹⁰ Your mind fit de worry you because you don do some things wey pain other people well-well before. Wetin you fit do? Do your best to settle the matter. For example, you fit meet the person and tell-am say you dey sorry, and show say you no happy for wetin happen. (2 Cor. 7:11) Beg Jehovah make e help the people wey de feel pain because of wetin you do. Jehovah fit help you and the people to continue to serve-am and enjoy peace.

11. Wetin we fit learn from the example of prophet Jonah? (Still check the picture.)

¹¹ Learn from your mistake and allow Jehovah to use you for any way wey e want. See the example of Jonah. Instead make e travel go Nineveh wey Jehovah send-am go, Jonah run go another place. Jehovah correct Jonah and e learn from im mistake. (Jonah 1:​1-4, 15-17; 2:​7-10) Even with im mistake, Jehovah no stop to use Jonah as im prophet. Jehovah give Jonah another chance to go Nineveh, and e no waste time to go. Even though say Jonah no happy for im mistake, e no allow that one stop-am to do the work wey Jehovah give-am.—Jonah 3:​1-3.

JEHOVAH DE USE IM HOLY SPIRIT MAKE OUR MIND COME DOWN

12. How Jehovah de give us peace when something wey bad well-well happen to us? (Philippians 4:6, 7)

¹² Jehovah de use im holy spirit make our mind come down when something wey bad well-well happen to us. Make we talk about wetin happen to one husband and wife wey their name na Ron and Carol. Their son wey dey 39 years kill imself. Them talk say: “We don face many problem before, but no one don reach this one. Many night we no de fit sleep, so we go pray to Jehovah. And Jehovah give us the peace wey e promise for Philippians 4:6, 7.” (Read-am.) If you de face serious problem wey de make you overworry, pray to Jehovah plenty times and tell-am everything wey dey your mind, no matter how the prayer long reach. (Ps. 86:3; 88:1) Beg Jehovah plenty times make e give you holy spirit. E go always help you.—Luke 11:​9-13.

13. How holy spirit fit help us continue to worship Jehovah well?

¹³ You don face serious problem wey make you feel like say you no get power to fit do anything? Holy spirit fit give you the power wey you need to continue to worship Jehovah well. (Read Ephesians 3:16.) Make we talk about the story of one sister wey im name na Flora. E and im husband na missionary when im husband commit serious sin wey make them divorce. Sister Flora talk say: “Wetin e do pain me well-well sotey I no fit think about any other thing again. I beg Jehovah make e give me im holy spirit so that I go fit endure-am. Jehovah make my mind come down. Even though say for the beginning, I think say I no go fit endure-am, Jehovah give me power and help me fit endure-am.” Sister Flora feel say Jehovah help-am fit trust-am more and e dey sure say Jehovah go help-am anytime wey e get serious problem. E still talk say: “Wetin dey Psalm 119:32 really help me. The verse talk say: ‘I go follow all your command with all my heart because you make my heart strong.’”

14. Wetin we need to do wey go help us receive Jehovah holy spirit?

¹⁴ After you don beg Jehovah for holy spirit, wetin you need to do? De do things wey go make you fit receive Jehovah holy spirit. For example, de attend meeting and de preach to people. De read Bible everyday, this one go make you de think deep about wetin Jehovah want. (Phil. 4:8, 9) As you de read Bible, try  notice people wey face serious problem and think deep about how Jehovah help them fit endure. Sister Sandra wey we don talk about, suffer well-well because e face serious problems for im life. E talk say: “Joseph story really encourage me. E no allow any of the problem wey e face, make-am stop to worship Jehovah.”—Gen. 39:​21-23.

JEHOVAH DE USE OUR BROTHERS AND SISTERS TO MAKE OUR MIND COME DOWN

15. Which people fit make our mind come down, and how them fit do this one? (Still check the picture.)

¹⁵ When we de face problem, our brothers and sisters fit still help us make our mind come down. (Col. 4:11) Jehovah fit use our brothers and sisters help us. This na one way wey e de show say e love us. Them fit make our mind come down when them sofri listen to us or when them come visit us. Them fit read Bible verse to encourage us or pray with us. d (Rom. 15:4) Sometimes, one brother or sister fit tell us something about how Jehovah de feel about us and our problem, and this one fit make our mind come down. Our brothers and sisters still de help us for other ways. For example, them fit cook food bring for us when we de face problem.

16. Wetin we fit do so that brothers and sisters fit help us?

¹⁶ Sometimes, we need to tell our brothers  and sisters to help us. Them love us and them really like to help us. (Prov. 17:17) But them fit no know how we de feel and wetin we need. (Prov. 14:10) If something happen and e de worry you for mind, tell your friends wey mature, about how you de feel. Tell them wetin them fit do to help you. You fit tell one or two elders wey you dey close to. Some sisters don see say when them get problem and them talk to another mature sister, e de make their mind come down.

17. Wetin fit make us no get the help wey we need, but wetin we fit do to get the help?

¹⁷ When you de face problem, make you no de always dey alone, but de spend time with brothers and sisters. Because of the pain wey dey your mind, you fit no like to talk to anybody. Sometimes, brothers and sisters fit no understand how you de feel, or them fit even talk wetin go pain you. (Jas. 3:2) No let all this one make you run from brothers and sisters, because Jehovah fit use them encourage you. One elder wey im name na Gavin de suffer from one sickness wey de make person always dey sad. E talk say: “Many times, the sickness de make me no want talk to my friends or dey with them.” But even with this one, Brother Gavin de do im best to talk to im friends and spend time with them and e don really gain from this one. One sister wey im name na Amy talk say: “Because of wetin don happen to me before, e de hard me to trust people. But, I de do my best to love and trust brothers and sisters the way Jehovah de do. I know say this one de make Jehovah happy, and e de make me self happy.”

WETIN JEHOVAH PROMISE US FOR FUTURE FIT MAKE YOUR MIND COME DOWN

18. Wetin we fit put mind for, and wetin we fit do now?

¹⁸ Jehovah go soon remove everything wey de make us suffer. (Rev. 21:3, 4) When that time come, all the bad things wey don happen to you, “no go come [your] mind again.” (Isa. 65:17) But even now, Jehovah de care for us when we de suffer. Jehovah don give us plenty things to help us and make our mind come down. Make sure say you gain from this help wey de come from Jehovah. Make you no ever doubt say Jehovah care about you.—1 Pet. 5:7.