1. Wetin be some things wey Jesus don do for us?

 NO HUMAN being don ever do reach wetin Jesus do. When Jesus dey this earth, e use im power do miracle to help people. (Luke 9:​12-17) E give us the gift wey better pass any other gift as e use im life pay for our sin. (John 15:13) Since the time wey Jehovah bring-am back to life, e don continue to give us plenty things. Just as e promise say e go do, e don beg Jehovah say make e give us Im holy spirit to help us learn the truth and comfort us. (John 14:​16, 17, ftn.; 16:13) Jesus don continue to use our congregation meeting to help us fit teach people Bible so that them fit become im disciple no matter where them de live for this earth.—Matt. 28:​18-20.

2. As e dey for Ephesians 4:7, 8, which people Jesus don give us as gift?

² Make we talk about another gift wey Jesus don give us. Apostle Paul talk say after Jesus go heaven, “e give men as gifts.” (Read Ephesians 4:7, 8.) Apostle Paul talk say Jesus give this men as gift to help and support the congregation for different-different way. (Eph. 1:​22, 23; 4:​11-13) For this our time, the men wey Jesus give us as gift na ministerial servants, elders, and circuit overseers. a The truth be say, this men no dey perfect, so them fit make mistake. (Jas. 3:2) But Jesus Christ wey be our lord don give them to us as gift, and e de use them help us.

3. Give example wey show how all of us fit support the work wey the men wey Jesus give us as gift, de do.

³ Jesus don give this men wey e give us as gift, the work to make congregation strong. (Eph. 4:12) But all of us fit help them as them de do this important work. For example: We fit  compare their work to how we de build Kingdom Hall. Some people work na to build the Kingdom Hall, but other people de support to cook, carry things wey them go use for the work and other people go de do other work. For the same way, all of us fit use wetin we de talk and do support the work wey ministerial servants, elders, and circuit overseers de do. Make we talk about how we de gain from their work for congregation and how we fit show them and Jesus say we value the work wey this men wey e give us as gift, de do.

MINISTERIAL SERVANTS DE DO THINGS “TO HELP OTHER PEOPLE”

4. Wetin be some work wey ministerial servants de do for the time of the apostles?

⁴ For the apostles time, them make some brothers ministerial servants. (1 Tim. 3:8) E be like say na them apostle Paul talk about say them “do things to help other people.” (1 Cor. 12:28) So e be like say ministerial servants do many important work so that elders go fit handle their work to teach well, and care for brothers and sisters for congregation. For example, e fit be say ministerial servants help to copy the scrolls wey be Bible that time or them de help buy the things wey them de use copy-am.

5. Wetin be some work wey ministerial servants de do for this our time?

⁵ Make we see some of the important work wey ministerial servants de do for this our time. (1 Pet. 4:10) Elders fit give them the work to care for congregation account or territory record, order for our books and share them give publishers. Elders fit still give them the work to operate sound system, do attendant work, or help repair things for Kingdom Hall. All this one na important work wey de help us fit enjoy meeting and do the preaching work well. (1 Cor. 14:40) Other things wey ministerial servants fit do na to handle part for Life and Preaching Meeting and give public talk. Elders fit still choose ministerial servant make e de assist group overseer. Sometimes, elder fit tell ministerial servant wey mature make e join-am go visit publisher for congregation to encourage-am.

6. Why we value the work wey ministerial servants de do for congregation?

⁶ How we de gain from the work wey ministerial servants de do for congregation? One sister for Bolivia, wey im name na Beberly b talk say: “I thank our ministerial servants well-well for the work wey them de do for congregation. Them de make me fit enjoy meeting, sing, answer question, listen to talk, and learn from videos and pictures wey them de show. Them de make sure say the brothers and sisters dey safe for meeting and still de help people wey no fit come Kingdom Hall to fit enjoy meeting for their house. After meeting, them de join clean the Kingdom Hall, handle account matter, and make sure say publishers get the books wey them need. I de really thank them.” Sister Lisa wey de live for Colombia and wey im husband na elder talk say: “My husband really need ministerial servants to help-am do plenty things for congregation. If no be because of them, e for busy pass the way e dey now. So I thank them well-well as them de put body for the work and always ready to help.” We dey sure say na the same way you de feel about the ministerial servants for your congregation.—1 Tim. 3:13.

7. How we fit show say we value the work wey ministerial servants de do? (Still check the picture.)

⁷ Na true say for inside our heart we fit value the work wey ministerial servants de do, but Bible advice us say: “Make una de show say una de talk thank you.” (Col. 3:15) One elder for Finland wey im name na Christopher show say  e value the work wey ministerial servants de do, e talk say: “I de send thank you card or text message to them, and I go write one Bible verse and one particular thing wey them do wey encourage me or wey I value for their work for congregation.” Brother Pascal and im wife Jael, for New Caledonia, de always pray for ministerial servants for their congregation. Brother Pascal talk say: “This days, we de pray well-well for our ministerial servants, we de thank Jehovah for them and de beg-am make e dey with them and help them.” Jehovah de hear this kind prayer and congregation de gain when Jehovah answer-am.—2 Cor. 1:11.

ELDERS “DE WORK HARD AMONG UNA”

8. Why Paul write say elders for the time of the apostles “de work hard”? (1 Thessalonians 5:​12, 13)

⁸ Elders for apostles time work hard for congregation. (Read 1 Thessalonians 5:​12, 13; 1 Tim. 5:17) Them de care for the congregation. This one mean say na them de handle meetings and make decision as body of elders. Them still give advice to brothers and sisters so that them go continue to hold Jehovah tight and remain for the truth. (1 Thess. 2:​11, 12; 2 Tim. 4:2) Even with all this work, them still work hard to continue to hold Jehovah tight and give their family wetin them need.—1 Tim. 3:2, 4; Titus 1:​6-9.

9. For this our time, wetin be some work wey elders de do?

⁹ Elders for this our time really dey busy. Them de preach the good news. (2 Tim. 4:5) Them de show us better example as them de use all their heart preach. Them de arrange how we go take preach for our territory, and train us to fit preach and teach well. When them de judge matter, them no de do partial and them de show pity. When person for congregation commit serious sin, elders de try help the person make im friendship with Jehovah better again. Even with this one, them de dey careful make them no allow wicked person continue to dey for congregation. (1 Cor. 5:​12, 13; Gal. 6:1) The main work wey elders de do na to care for Jehovah people. (1 Pet. 5:​1-3) Them de give talk wey them don prepare well-well. And them de do their best to know everybody for congregation and care for them. Some elders de join build and maintain Kingdom Hall, arrange for convention, work with Hospital Liaison Committees and Patient Visitation Groups. Them de do all this one join other work wey them de do for congregation. Elders de really work hard for us!

10. Wetin be some reason wey make us value our elders for congregation?

¹⁰ Jehovah don talk tey-tey say elders go care for us well, and say we “no go fear again and [our] heart no go cut again.” (Jer. 23:4) One sister for Finland wey im name na Johanna see say wetin this Bible verse talk na true when im mama de sick. Sister Johanna talk say: “Even though say e de hard me to tell people how I de feel, one elder wey I no too dey close to sofri listen to me, pray with me, and help me really see say Jehovah love me. I no fit remember everything wey e talk, but I remember say e make my mind come down. I believe say na Jehovah send-am come help me for the correct time.” How elders for your congregation don help you?

11. How we fit show say we value our elders? (Still check the picture.)

¹¹ Jehovah want make we use all our heart show say we value our elders “because of their work.” (1 Thess. 5:​12, 13) One sister for Finland wey im name na Henrietta, talk say: “Elders de use all their heart help other people, but this one no mean say them get power and time pass other people, or say them no get problem for their life. Sometimes, I go just tell  them say: ‘You really be good elder, and I just want make you know.’” One sister for Türkiye c wey im name na Sarah talk say: “Elders need encouragement so that them go fit continue to do their work. So we fit send them thank you card, invite them come our house come chop, or work with them for preaching.” Any elder dey wey you value well-well because of the work wey e de do for congregation? Make you let-am know say you value-am for the work wey e de do.—1 Cor. 16:18.

CIRCUIT OVERSEERS DE MAKE CONGREGATION STRONG

12. Which other men Jesus give us to make congregation dey strong? (1 Thessalonians 2:7, 8)

¹² Jesus still give us some men wey de work for other ways. Elders for Jerusalem send Paul, Barnabas and other men to do traveling overseer work and na Jesus direct them to do this one. (Acts 11:22) Why? To encourage brothers and sisters and make congregation strong just the way elders and ministerial servants de make congregation strong. (Acts 15:​40, 41) This brothers de leave plenty things to fit do this work. Sometimes, their life fit dey for danger because them want teach and encourage their brothers and sisters.—Read 1 Thessalonians 2:7, 8.

13. Wetin be some work wey circuit overseers de do?

¹³ The work wey circuit overseers de do de make them travel well-well. Sometimes, them de travel many kilometers to reach the next congregation wey them de go. Every week, circuit overseers de give plenty talk, de visit many brothers and sisters to encourage them, do pioneer meeting and elders meeting, and  handle plenty meeting for field service. Them de prepare plenty talk, arrange different-different circuit assembly and convention. Them de teach pioneers for pioneer school, and them de do special meeting with pioneers for their circuit. Them still de handle some matter wey branch give them and some of them fit dey urgent.

14. Wetin be some reason wey make us value circuit overseers?

¹⁴ How congregation de gain from circuit overseers? One brother for Türkiye talk about the work wey circuit overseers de do, e talk say: “Each circuit overseer wey come our congregation don always move me to spend more time to help brothers and sisters. I don meet many circuit overseers, and e no get anyone wey be like say I no fit near or anyone wey make me feel like say e too dey busy.” Sister Johanna wey we don talk about before work with one circuit overseer for preaching, but them no meet anybody for house. E talk say: “Even with this one, I no go ever forget that day. E never too tey wey two of my sisters pack go another area and I miss them no be small. The circuit overseer encourage me and help me see say for now we fit no spend plenty time with our family member as we want, but for the new world, we go get plenty time to spend together.” Many of us don love our circuit overseers because of how them help us when them come our congregation.—Acts 20:37–21:1.

15. (a) From wetin dey 3 John 5-8, how we fit show say we value our circuit overseers? (Still check the picture.) (b) Why e good make we de show say we value the wife of the men wey Jehovah de use care for im people, and how we fit do this one? (Check the box “ Remember Their Wife.”)

¹⁵ Apostle John encourage Gaius say when brothers visit congregation to encourage brothers and sisters, make e welcome them well. E still tell-am say when them de go back,  make e “help them for the kind way wey go make God happy.” (Read 3 John 5-8.) One way wey we fit do this one na to invite circuit overseer come chop for our house. Another way na to attend meeting for field service for the week of circuit overseer. Sister Lisa wey we don talk about before, show for another way say e value the work wey circuit overseers de do. E talk say: “I de pray make Jehovah give them wetin them need. Me and my husband de write letter to them, to tell them how we don gain when them come our congregation.” Remember say circuit overseers na people like us. Sometimes, them de sick, worry, and even tire to continue their circuit work. So the good word wey you tell them or small gift wey you give them fit be the answer to their prayer!—Prov. 12:25.

WE NEED BROTHERS TO CARE FOR JEHOVAH PEOPLE

16. With wetin Proverbs 3:27 talk, which questions brother wey don baptize fit ask imself?

¹⁶ For the whole world, we need more brothers to care for Jehovah people. If you be brother wey don baptize, you go fit help? (Read Proverbs 3:27.) You ready to do your best to be ministerial servant? If you don already be ministerial servant, you ready to do your best to become elder? d You ready to change some things for your life so that you go fit go School for Kingdom Evangelizers? That school go train you and help you ready for any work wey Jesus fit give you. If you de feel say e go hard for you to fit do any of this things wey we don talk about, make you pray to Jehovah. Beg-am for holy spirit make e help you fit do any work wey them give you well.—Luke 11:13; Acts 20:28.

17. Wetin the men wey Jesus give us as gift de show about Jesus?

¹⁷ As the men wey Jesus give us as gift de work hard for us, e de show say Jesus don de lead us since this last days start. (Matt. 28:20) We de thank Jehovah say e give us better King wey love us, wey get open hand, wey know wetin we need, and wey give us better brothers wey de care for us. So look for ways wey you fit show say you value this brothers and the hard work wey them de do for us. And no forget to thank Jehovah wey de give us “every good gift, and every gift wey complete.”—Jas. 1:17.