MUSIC dey important well-well for Israel people. Plenty place for Bible talk about music wey them use mouth sing and the one wey them use music instrument play. Plenty parts of Bible na song. For example, Psalms, Song of Solomon, and Lamentations. One book wey them de call Music in Biblical Life talk about how life be for Bible time and e show say Israel people use music well-well. For example:

Them de sing song and play music instrument when them de do different-things. Israel people sing with their mouth, and play music instrument to show how them de feel. (Isa. 30:29) Women for Israel play tambourine, them de dance and de happy as them de sing song when them de celebrate something, like, when them de put new king, when their soldiers win war, and when them gather to worship Jehovah. (Judg. 11:34; 1 Sam. 18:6, 7, 1 Ki. 1:​39, 40) Israel people still sing song to show say them dey sad when person wey them love die. (2 Chron. 35:25) E dey clear say Israel people like music well-well as McClintock and Strong’s Cyclopedia talk.

Them de sing song and play music instrument for palace. Kings for Israel enjoy music well-well. For example, King Saul bring David come im palace make e de play music instrument for-am. (1 Sam. 16:​18, 23) Later when David become king, e make plenty music instrument, write plenty songs, and arrange people wey go de sing for temple. (2 Chron. 7:6; Amos 6:5) Even King Solomon get men and women wey de sing for im palace.—Eccl. 2:8.

Them de use music for worship. Israel people sing to worship Jehovah. The truth be say 4,000 men play different-different music instrument for temple for Jerusalem. (1 Chron. 23:5) For example, them play cymbals, harps, trumpets and stringed instruments wey be like guitar. (2 Chron. 5:12) But no be only this people wey sabi sing well, or play music instrument, use music to worship Jehovah. Many Israel people sing for road when them de travel go Jerusalem to worship Jehovah. Them de call the songs wey them de sing for road, Songs of the Ascents. (Ps. 120-134) And according to things wey them write about Jew people, Israel people sing some of the Psalms when them de do Passover. Them de call-am Hallel Psalms. a

Music still dey important for Jehovah people for this our time. (Jas. 5:13) We de sing song to praise Jehovah. (Eph. 5:19) We de feel say we dey close to our brothers and sisters when we de sing together to praise Jehovah. (Col. 3:16) When we de sing, play music or listen to music wey de talk about Jehovah, this one de help us fit endure. (Acts 16:25) Music na better way for us to show Jehovah say we trust-am and say we love-am.