Na Almighty But He De Care About People
“[Jehovah] really know the way our body be. He remember say na ground we come from.”—PS. 103:14.
SONG: 30, 10
1, 2. (a) How the way wey Jehovah de treat people dey different from the way leaders de treat people today? (b) Wetin we go talk about for this topic?
LEADERS and people for high position “de control” people, and they even de use their power anyhow. (Matt. 20:25; Eccl. 8:9) But Jehovah no de do like that! Even though he be Almighty, he de care about the way we de feel as we get sin for body. He get good-heart and he de think about person. He de think about the way we de feel and the thing wey we need. Bible talk say Jehovah “remember say na ground we come from,” or he know say sin dey our body. He no go ever tell us to do wetin pass our power.—Ps. 103:13, 14.
2 Bible get plenty example of how Jehovah show say he care about his servants. Make we talk about three of this example. (1) The fine way wey Jehovah help young Samuel make he fit tell High Priest Eli one strong message. (2) The way he dey patient with Moses when Moses no want be leader of Israel people. (3) The way he show say he care about Israel people when he comot them from Egypt. Take note of wetin this examples teach
us about Jehovah, as we de talk about them, and how we fit do the things wey we learn.LIKE PAPA, HE CARE ABOUT YOUNG SAMUEL
3. Which thing happen to Samuel one night wey e never happen before, and which question this one go make us ask? (Check the first picture.)
3 Samuel young well-well when he begin work for Jehovah for tabernacle. (1 Sam. 3:1) One night after Samuel don sleep, something happen. * (Read 1 Samuel 3:2-10.) He hear one voice wey e call his name. Samuel think say na High Priest Eli call his name. So he run go meet Eli and he talk say: “I don come, you call me.” But Eli talk say no be he call Samuel. The same thing happen two times again. Then Eli know say na God de call Samuel. So he tell the young boy the thing wey he go do, and he obey. Why Jehovah no use angel tell Samuel the first time say na he call his name? Bible no tell us. But from the way things happen, we fit talk say Jehovah care about Samuel. Why we talk so?
4, 5. (a) Wetin Samuel do about the message wey Jehovah say make he tell Eli, and wetin happen the next morning? (b) Wetin the story teach us about Jehovah?
4 Read 1 Samuel 3:11-18. The Law of Jehovah talk say make children de respect old person, especially if the person de rule. (Ex. 22:28; Lev. 19:32) So how you think say e for be for Samuel to just go meet Eli for morning and tell Eli the strong message wey God want make he talk? E for no easy at all! No wonder Bible talk say: “Fear no make Samuel tell Eli the vision.” But God make-am clear to Eli say na he de call Samuel. So, Eli command Samuel make he talk. He talk say: “[No] hide anything from me for inside everything wey he tell you.” Samuel do wetin Eli talk and “he no hide anything.”
5 This message no really surprise Eli too much. Na so because “one man of God” don tell Eli this same message before. (1 Sam. 2:27-36) This story make us know say Jehovah de really think about the way person de feel, and he get sense.
6. Which things we fit learn from the way God help young Samuel?
6 You be young person? If na so, the story about young Samuel show say Jehovah understand your problem and the way you de feel. Maybe you de shame and e de hard you make you preach to big person, or make you dey different from other young people. You fit dey sure say Jehovah want help you. So make you pray to Jehovah about the way you de feel. (Ps. 62:8) Think deep about the example of young people like Samuel. Other brothers and sisters fit don face the kind problem wey you de face, whether they young or they don old. Make you talk with them about your problem. They fit tell you about the way Jehovah don help them, even for the way they no expect.
JEHOVAH CARE ABOUT MOSES
7, 8. Wetin Jehovah do to show say he care well-well about the way Moses de feel?
7 Jehovah give Moses one big work when he dey 80 years. Moses go free Israel people from the slave life wey them de live for Egypt. (Ex. 3:10) Maybe this kind work surprise Moses, because for 40 years na shepherd he be for Midian. He talk say: “Who I be to go meet Pharaoh, then carry Israel people comot from Egypt?” Jehovah make Moses heart strong with the thing wey he talk. He say: “I go dey with you.” (Ex. 3:11, 12) He still promise say the elders for Israel “go surely listen to” Moses. But even with that one, Moses talk say: “What if they no . . . listen?” (Ex. 3:18; 4:1) So maybe Moses de talk say Jehovah fit no dey correct! But God still dey patient. He even do another thing for Moses. He give Moses power make he fit do miracle. Moses come be the first human being for Bible to get this kind power.—Ex. 4:2-9, 21.
8 Moses still give another excuse. He talk say he no sabi talk. So God answer say: “I go dey with you as you de talk, and I go teach you the things wey you go talk.” This one make Moses believe Jehovah? No. Instead, he tell God sofri say make he send another person. Na this one make God vex, and e no bad as he vex. But he still listen. He care about the way Moses de feel. So he send Aaron make he de talk for Moses.—Ex. 4:10-16.
9. As Jehovah show say he dey patient and he care about Moses, how that one help Moses make he fit do his assignment?
9 Wetin this story teach us about Jehovah? As Jehovah na Almighty God, he for use his power to make Moses fear so that he go do the thing wey God talk quick-quick. But no be so Jehovah do. Instead, he dey patient and he treat Moses with care. Moses na humble person. He know wetin he fit do and wetin he no fit do. So God try to help Moses make his heart strong. The style wey Jehovah use work? Yes, e really work! Moses come be better leader. He try to treat people with care and he dey humble. Na so Jehovah treat Moses.—Num. 12:3.
You de imitate Jehovah when you de do things with people? (Check paragraph 10)
10. When we de copy the way Jehovah care about people, how that one go benefit us?
10 Wetin we learn? If you be husband, elder, papa or mama, you get some right wey God give you. E dey important make you imitate Jehovah as you de care for the people wey he put for your hand. Treat them with care, show say you care about them, and dey patient. (Col. 3:19-21; 1 Pet. 5:1-3) When you de try to imitate Jehovah and Jesus, the Person wey he high pass Moses, he go dey easy for people to come follow you talk, and you go fit de encourage them. (Matt. 11:28, 29) And you go be good example for other people.—Heb. 13:7.
NA POWERFUL SAVIOR BUT HE CARE ABOUT PEOPLE
11, 12. As Jehovah guide Israel people comot from Egypt, wetin he do to make them no fear and get peace of mind?
11 For 1513 B.C.E. when Israel people comot for Egypt, e fit be say they pass three million. Children, old people and even people wey them de sick dey among them. To lead plenty people like this no go easy at all. They need the kind Leader wey e go fit understand them and care for them. Na exactly wetin Jehovah use Moses be for them. So because of this one, Israel people get peace of mind even as they comot from the only place wey they know as their home.—Ps. 78:52, 53.
12 Wetin Jehovah do to make his people no fear and get rest of mind? One thing wey he do be say, he make them to “arrange theirself like say them de go war,” when he de lead them comot from Egypt. (Ex. 13:18) The way Jehovah arrange them make them believe say their God dey their back. Another thing wey Jehovah do be say, “he guide them for daytime with cloud. And for the whole night, he guide them with light of fire.” (Ps. 78:14) This one make them dey sure say Jehovah dey with them. E come be like say Jehovah de talk say: “No fear. I dey with you, I go guide you and protect you.” And Jehovah make their heart strong like that because of wetin go soon happen.
Wetin Jehovah do for the Red Sea to show say he care about his people? (Check paragraph 13)
13, 14. (a) Wetin Jehovah do for the Red Sea to show say he care about Israel people? (b) Wetin Jehovah do to show say he get power pass Egypt people?
13 Read Exodus 14:19-22. Just imagine say you dey there with Israel people. You dey between the army of Pharaoh and the Red Sea. You no fit run. Then God do something. The pillar of cloud move from your front go your back. The cloud block Egypt people. Their side dey dark but bright light de shine for your side! Na miracle. Then you see Moses stretch his hand face the sea, and one strong breeze wey them de call east wind open road go the other side for the water. This one make you, your family, your animals, and all the other people waka pass the ground for the sea. And wuna no scatter as wuna pass, wuna arrange well. But at once, you notice something about the place. E no dey cold and potopoto no dey the ground; instead, e dey dry and e strong. E come dey easy for wuna to fit waka pass. So even people wey they no fit waka fast fit cross go the other side and nothing do them.
14 Read Exodus 14:23, 26-30. As all this one de happen, foolish Pharaoh wey he dey proud begin pursue wuna. Then Moses stretch his hand face the water again. And the water wey e don stand like wall for the two side come rush close together. Pharaoh and his army no survive-am!—Ex. 15:8-10.
15. Wetin this story teach you about Jehovah?
15 This story teach us say Jehovah na God wey he no de like make things scatter. He de like make things arrange well. This kind character de make us no fear and we go get peace of mind. (1 Cor. 14:33) Jehovah be like fine shepherd. He de show say he care about his people and he love them. He de make them get peace of mind and he de protect them from their enemy. This one de really make our heart strong as we de near the end of this world!—Prov. 1:33.
16. Wetin we fit gain from the story about how Jehovah save Israel people?
16 Today, Jehovah still de take care of his people as one group. He de help them continue to be his friend and he de protect them. And na so he go continue to help them, even for great tribulation wey e go soon come. (Rev. 7:9, 10) So whether they don old or them dey young, whether them de sick or they no de sick, they no go fear and they no go run when great tribulation come. * Instead, they go do another thing. They go remember the things wey Jesus Christ talk, when he say: “Stand up straight and raise wuna head because the time wey [God] go save wuna don near.” (Luke 21:28) Government for this world go join hand together to attack God’s people. The name wey Bible call them na Gog. They strong pass Pharaoh. But even with that one, Jehovah’s people get the mind say he go protect them. (Ezek. 38:2, 14-16) Why they get this kind mind? They know say Jehovah no de change. This time, he go still show say he care about his people and he love them. He go save his people.—Isa. 26:3, 20.
17. (a) How we fit benefit when we de study story of how Jehovah care about his people? (b) Wetin we go talk about for the next topic?
17 We don see for this topic say Jehovah take care of his people, he direct them, and save them. And some examples wey we talk about show say Jehovah de think about his people and he get good-heart for them. Plenty other story like this ones still dey. As you de think deep about them, you fit see some kind small-small things wey you no know before, but they fit tell you something about the kind person wey Jehovah be. When you learn about Jehovah’s fine-fine character like this, they go dey your heart and mind more. This one go make your love and faith for God de strong more-more. For the next topic, we go see how we fit imitate Jehovah for the way he de care about people. We go talk about how we fit do-am for family, for congregation, and for preaching.
^ par. 3 Josephus wey he study history about Jew people, talk say Samuel dey 12 years that time.
^ par. 16 We fit talk say some disable people (people wey some part of their body no dey) go survive Armageddon. When Jesus dey earth, he cure people with “all kind of problem for body.” This one show the thing wey he go do for people wey they survive Armageddon. E no concern people wey God go resurrect. (Matt. 9:35) People wey they go come back to life go get their complete body, and problem no go dey their body again.