1. How Jehovah’s people de show say they love each other?

ALL of us for Jehovah’s organization na one family, and love dey this family. (1 John 4:16, 21) Sometimes, we de do big thing for our brothers and sisters. But many times, we de show say we love them when we do small-small fine things for them. For example, we fit talk or do fine thing for them. We “de imitate God as children wey he love well-well,” when we show people say we get good-heart and we care about the way them de feel.​—Eph. 5:1.

2. Wetin Jesus do to show say he get love like his Father?

² Jesus copy the example of his Father well. He talk say: “Come meet me, all of wuna wey de struggle and wey carry heavy load I go make wuna get rest of mind . . . , because I dey gentle and humble.” (Matt. 11:28, 29) When we “help people” like Jesus Christ, our Papa for heaven go bless us and we go really dey happy. (Ps. 41:1) So, make we see how we go fit show say we care about people for our family, for congregation, and for preaching.

3. How husband go show say e dey important to understand their wife and care about them? (Check the first picture.)

³ When husband care about other people for the family, he de show good example. This one dey important. (Eph. 5:25; 6:4) For example, Bible tell them say make they “use sense live with” their wife. They fit still translate to “use sense live with” as “de show say you care about them; de understand them.” (1 Pet. 3:7; ftn.) This two character de go together: to understand person and to care about the person. Husband wey he understand his wife know say he and his wife different from each other for many ways. But even with that one, he know say he no better pass the woman. (Gen. 2:18) So he de care about the way the wife de feel, he respect and value her. One woman for Canada talk about her husband say: “He no de make me feel say my feeling no dey important, and he no de tell me say, ‘You no suppose to feel like that.’ He sabi listen to person. Anytime wey he want help me change the way I see any matter, he de do-am with good-heart.”

4. When husband de do things with other women, how he go fit show say he care about the way his wife de feel?

⁴ When husband care about the way his wife de feel, he go still dey careful when he de do things with other women. He no go want make other women de feel say he like them, or de play love with them, even when he de use Internet. (Job 31:1) True-true, he want show say he no want leave his wife. And he no go do this one only because he love the woman, but because he love God and hate bad thing.​—Read Psalm 19:14; 97:10.

5. How wife go fit show say she care about the way her husband de feel?

⁵ Na Jesus Christ be the head of the man, and he show husbands fine example. When husband de imitate Jesus, he go make-am dey easy for the woman to “respect her husband well-well.” (Eph. 5:22-25, 33) Then this respect go make her de care about the way the man de feel when he dey some kind condition. The condition fit be when he dey busy de handle some matter for congregation, or when some things de disturb his mind. One husband for Britain talk say: “Sometimes, my wife de know say something de worry my mind when she notice say my face change. Then she go allow wetin dey Proverbs 20:5 to guide her. This one fit mean say she go need to wait for the right time to fit ‘draw’ wetin dey inside my mind ‘come out,’ if na matter wey I fit talk with her.”

6. How all of us fit encourage children make them de care about people, and wetin the children go gain?

⁶ When papa and mama de show say they care about each other, them de show their children good example. Na papa and mama get the work to teach their children the way they go show say they care about people. For example, papa and mama fit teach them make they no de run up-and-down for Kingdom Hall. When them dey for line with other people for party, they fit tell their children to allow person wey he old pass them make he collect food before them. The truth be say, everybody for congregation fit support papa and mama. For example, when pikin do fine thing for us, maybe he open door make we pass, make the pikin know say na fine thing he do. This kind thing fit make the pikin dey happy, and he go learn say “na when person give, he go dey happy pass when he receive.”​—Acts 20:35.

7. How Jesus show say he care about the way one deaf man de feel, and wetin we learn from the example of Jesus?

⁷ One time wey Jesus dey one area wey them de call Decapolis, people “carry one deaf man wey he no de fit talk well”  come meet Jesus. (Mark 7:31-35) Jesus no cure the man for open place. Instead, “he take the man go one corner,” and he cure the man. Why he do-am like that? Maybe the man de shame for place wey plenty people dey because of his condition. E fit be say Jesus notice-am na e make he cure the man for corner. Na true say we no fit do miracle today. But e good make we think about the way our brothers and sisters de feel and the thing wey they need. Apostle Paul talk say: “Make we de think about how we go help each other so that we go show love and do better work.” (Heb. 10:24) Jesus understand the way the deaf man feel, and he treat the man well to show say he get good-heart. This one na really fine example for us!

8, 9. How we fit show say we care about old and sick people? (Give examples.)

⁸ De care about old and sick people. Na the love wey we de show our brothers and sisters make us be Christian, no be whether we do our work for congregation well or we no do-am well. (John 13:34, 35) Na this love de make us do our best make we fit help old and sick people for congregation. We go help them de go meeting and preaching. And we want de help them even if e no easy for us, or they no fit do plenty like us. (Matt. 13:23) One brother wey his name na Michael, de use wheelchair. This brother really like the things wey his family and the brothers for his field service group de do to help him. He talk say: “I de go meeting and preaching plenty times because of the way all of them de help me. Na to preach for open place de sweet me pass.”

⁹ For many place, we get old and sick people for inside Bethel and them de serve Jehovah well. Overseers fit show say they care about them when they arrange for them to preach with letter and phone. Brother Bill wey he dey 86 years, de write letter to people wey them de live for far-far place. He talk say: “We like as they allow us to preach with letter.” Sister Nancy don nearly reach 90 years, and she talk say: “To use letter preach no be just to write plenty letters put for envelop. I no de see-am like that. Na preaching e be. People need to know the truth!” Sister Ethel wey they born for 1921, talk say: “Pain dey part of my life. Sometimes e de hard me to even wear my clothes.” Even with that one, she de enjoy to preach with telephone and she get some fine return visits. Sister Barbara na another person, and she don reach 85 years. She talk say: “E de hard me well-well to go preaching everytime because I no well. But I fit de use telephone talk with people. Thank you, Jehovah!” One group of old brothers and sisters wey we love well-well spend 1,228 hours for preaching, they write 6,265 letters, they make pass 2,000 calls, and they place 6,315 different-different book. And they no take up to one year to do all this one! True-true, Jehovah dey happy with this things wey they do!​—Prov. 27:11.

10. Wetin we fit do so that our brothers and sisters go fit gain from our meeting?

¹⁰ Show say you care when you dey meeting. We want make our brothers benefit well-well when them dey meeting. When we de care about them, we fit help them. How? One way na to reach meeting quick so that we no go disturb people. Na true say sometimes we fit late because something wey we no expect fit happen. But if na part of our character to de go meeting late, make we think of wetin we fit do to show more-more say we care about our brothers. No forget say na Jehovah and Jesus invite us to come meeting. (Matt. 18:20) When we no late go meeting, we de show say we really respect them!

11. Why e good make brothers wey they get part for meeting de follow wetin 1 Corinthians 14:40 talk?

¹¹ If we care about our brothers and sisters, e mean say we go still follow wetin Bible talk for 1 Corinthians 14:40. E say: “But  make wuna do everything for the right way and make e arrange well.” (1 Cor. 14:40) Brothers wey they get part for meeting fit follow the thing wey this verse talk if their part no de go overtime. This one go show say they care about the brother wey he get the next part. But apart from that one, e still show say they care about other brothers and sisters. How? E fit be say some of them dey stay far place, or na public transport them de use go house. And maybe their husband or wife no de serve Jehovah and them de wait them to come back quick.

12. Why we suppose to love and respect the elders well-well? (Check the box “ Show Say You Care About the People Wey Them De Direct Us.”)

¹² Elders de work hard for congregation and de show fine example for preaching. So e good make we love and respect them. (Read 1 Thessalonians 5:12, 13.) True-true, you like the things wey the elders de do for you. So make we try work with them and support them to show say we value wetin them de do. After all, them “de take care of [you]” and them “go talk how they do the work.”​—Heb. 13:7, 17.

13. Wetin we fit learn from the way Jesus treat people?

¹³ Prophet Isaiah talk about Jesus say: “The plant for waterside wey e no strong, he no go crush-am. And wick wey small fire still dey, he no go quench-am.” (Isa. 42:3) Jesus care about how people de feel because he love them. He understand the way people de feel. This people just be like weak plant for waterside, or the thread for oil lamp wey small fire still dey but e go soon quench. Na because of this one Jesus show them say he care about them, he get good-heart, and he dey patient. Even small children want dey around Jesus. (Mark 10:14) Na true say we no fit understand and teach people the way Jesus do-am. But we fit show people for our territory say we care about them for the way we de talk with them, when we de preach,  and the amount of time wey we de spend with them.

14. Why e good make we think about the way we de talk to people?

¹⁴ How we suppose to talk with people? Today, business people, politicians and leaders for religion dey corrupt and they no de feel for people. Na e make plenty-plenty people “be like sheep wey they peel their skin, sheep wey they scatter.” (Matt. 9:36) So many people no trust anybody and they no get hope. Na e make e dey important make e show for the things wey we de talk and for our voice say we get good-heart and we care about them. The truth be say no be only because of how we know Bible reach, or the way we sabi use-am na e make people de listen to our message. But, they still de listen because we really care about them and de respect them.

15. Which things we fit do to show say we care about people wey we de preach to?

¹⁵ Plenty things dey wey we fit do to show say we care about people wey we de preach to. For example, one fine way to teach people na to ask question. But e good make our question show say we get good-heart and we respect people. For the territory of one pioneer, plenty people de shame and e de hard them to talk how them de feel. So this pioneer no de ask the kind question wey e fit make them shame. Some of this kind question na question wey the person fit no know the answer, or his answer fit no correct. For example, he no go ask them question like, ‘You know God’s name?’ or, ‘You know wetin God’s Kingdom be?’ Instead, he go talk something like, “I learn from Bible say God get name. I fit show you the name?” Na true say people different and culture no be the same. So we no need to put law for this matter. But, make we always de think about how people for our territory de feel and de respect them. We fit do this one if we know them well.

16, 17. How we fit show say we care about our neighbors (a) when we choose time to go preach to them? (b) for the amount of time wey we de spend with them?

¹⁶ When e good make we go preach to our neighbors? When we de do house to house, people no de expect us because they no invite us. So, e dey important well-well make we go meet them when they go dey ready to really talk with us. (Matt. 7:12) For example, people for your territory de like to use more time sleep for weekend? If na so e be, then you fit start your preaching for street, for public place, or go check your return visit wey you know say go dey ready to talk that time.

¹⁷ How long we go stay with them? Plenty people dey busy well-well. So we fit no spend long time with them, especially if na the first time. E dey good if we quick finish wetin we want talk with them, instead of us to stay long. (1 Cor. 9:20-23) When people see say we put their condition for mind or we understand say them dey busy, they fit want make we talk with them another time. E dey clear say for our preaching work, we need to show say we get the character wey God’s spirit de give person. When we de show this different-different character, true-true, “we de work with God.” And Jehovah fit even use us to help person learn the truth.​—1 Cor. 3:6, 7, 9.

18. When we de care about people, which better things we de hope say we go get?

¹⁸ So make we try our best so that we go fit de care about people for family, for congregation, and for preaching. When we do this one, Jehovah go bless us well-well now and for future. Psalm 41:1, 2 talk say: “Any person wey he de help people wey they need help go dey happy; Jehovah go save the person for the day of trouble. . . . They go talk say he dey happy for the earth.”