De Show People Love—E De Make Them Strong
“Love de make person strong.”—1 COR. 8:1.
SONG: 109, 121
1. Which important topic Jesus talk about for the last night with his disciples?
FOR the last night wey Jesus dey with the disciples, he talk about love almost 30 times. He talk-am clear say the disciples need to “love each other.” (John 15:12, 17) The love wey they get for each other go show well-well, sotey people go see-am clear say they be true disciples of Jesus. (John 13:34, 35) This kind love no be just how person de feel about people. Instead, e de make person do something for other people even when e no favor the person. This love na really fine character. Jesus talk say: “Nobody get love wey e big pass this one, for one person to die for his friends. Wuna be my friends if wuna do the thing wey I de command wuna.”—John 15:13, 14.
2. (a) Which kind character servants of Jehovah de show? (b) Which question we go answer for this topic?
2 Today, servants of Jehovah dey as one. And their strong love de make them do things for people, even when e no favor them. This one show say them de serve Jehovah. (1 John 3:10, 11) No matter their country, tribe, language, or the way they train them, them de show the kind love wey Jesus talk about. This one de make them dey happy! But we fit ask ourself say: ‘Why love really dey important today? How Jehovah and Jesus de use love encourage us? How we fit show the kind love wey e “de make person strong”?’—1 Cor. 8:1.
WHY LOVE REALLY DEY IMPORTANT TODAY?
3. Wetin de happen to people today because things “really hard”?
3 Things “really hard” for many people today. Them de suffer from different-different kind of pain. And this one de happen because “na so-so trouble and pain plenty” for life. (Ps. 90:10; 2 Tim. 3:1-5) Life don tire plenty people. E pass 800,000 people wey them de kill theirself every year. This one mean say about one person de die every 40 seconds. And e de pain us say even some of our brothers don allow life tire them sotey they kill theirself.
4. Which people for Bible talk say they want die?
4 For Bible time, some servants of God face problem sotey they talk say they want die. For example, Job suffer sotey he talk say: “My life don tire me; I no want continue to live.” (Job 7:16; 14:13) Jonah tire for the way things be for his assignment sotey he talk say: “Abeg, O Jehovah, kill me now, because e better make I die instead of me to live.” (Jonah 4:3) And one time, prophet Elijah tire for life because of his condition. So he talk say: “I don tire! Kill me now, O Jehovah.” (1 Ki. 19:4) But Jehovah love this people. They serve Jehovah well, so he no want make they die. God no condemn them even as they talk say they want die. Instead, he help them make they get the mind to continue to live. So that they no go stop to serve God well, God de make them strong with his love.
5. Why we need to show our brothers and sisters love, especially now?
5 Today, our brothers and sisters fit no really want kill theirself. But the truth be say, we need to make them strong with our love because things no easy for many of them. For example, them de suffer some of them and de laugh them because them de serve Jehovah. Them de cause problem for some of them and de talk bad about them for their workplace. Or maybe they tire because them de work overtime, or the stress for their work too much. Another problem fit be family problem. Maybe their husband or wife no de serve Jehovah, and he de always give them trouble. All this problem and other things don make many brothers and sisters tire and they no dey happy. Who fit help them?
MAKE THE LOVE WEY JEHOVAH DE SHOW MAKE YOU STRONG
6. How Jehovah de encourage his servants with love?
6 Jehovah encourage his servants say he no go stop to love them. The mind of Israel people go don come down when they hear Jehovah tell them say: “You get value for my eye, you dey special, and I don love you. . . . Make you no fear because I dey with you”! (Isa. 43:4, 5) You fit dey sure say Jehovah love you well-well because you be his servant. * Bible promise Jehovah’s people say: “Na strong person he be, so he go save you. He go dey happy with you well-well. He go make you dey quiet with his love. He go de over-glad because of you.”—Zeph. 3:16, 17.
7. How Jehovah’s love be like the love wey mama get for the pikin wey she de breast-feed? (Check the first picture.)
7 Jehovah promise his people say he go make them strong and their mind go come down no matter the problem wey them de face. He talk say: “They go give wuna breast to suck and they go carry wuna for waist, and they go carry wuna for lap de bounce wuna. The way mama de make her Isa. 66:12, 13) How you de feel when you see mama wey she carry her pikin for waist, or she de play with the pikin for her lap? Jehovah use this example to show the way he love his servants. He really love them. So make you no ever think say Jehovah no value you. He value you well-well.—Jer. 31:3.
pikin mind come down, na so I go de make wuna mind come down.” (8, 9. How the love wey Jesus get for us fit make us strong?
8 Bible tell us another reason why we believe say Jehovah love us. He talk say: “God really love this world sotey he send the only special Son wey he get, so that anybody wey he continue to get faith for him no go die, but he go get life wey e no go end.” (John 3:16) Jesus show say he love us too as he come sacrifice his life for us. This love wey Jesus show us really make us dey strong! Bible talk say even “problem or hard time” no go fit “separate us from the love wey Christ get.”—Rom. 8:35, 38, 39.
9 Sometimes we fit tire, we fit no dey happy, or we fit stop to get joy for Jehovah’s service because of problem wey we de face. But when we remember say Jesus love us well-well, we go fit get power to endure the problem. (Read 2 Corinthians 5:14, 15.) We fit de face different-different problem. For example, heavy breeze or rain fit scatter our property, people fit de suffer us because we de serve Jehovah, we fit de feel say we don fail ourself for wetin we do, or something fit de worry us for mind. But even with all this problem, the love wey Jesus get for us de give us power make life no tire us.
OUR BROTHERS AND SISTERS NEED OUR LOVE
You fit get the mind to encourage other people when you de study the example of Jesus (Check paragraph 10, 11)
10, 11. Who get the work to encourage brothers and sisters wey they no dey happy? Explain.
10 Congregation na another way wey Jehovah de use show us love to make us strong. Each of us fit show say we love Jehovah when we love our brothers and sisters. We no go only de encourage them say Jehovah love them, but we go still make them know say we value them. (1 John 4:19-21) Apostle Paul tell us for Bible say: “Make wuna de encourage each other and de make each other strong, just as wuna de do now.” (1 Thess. 5:11) No be only elders fit help brothers and sisters for congregation make them dey strong and make their mind come down. All of us for congregation fit do-am. This one go show say we de imitate Jehovah and Jesus.—Read Romans 15:1, 2.
11 Our brothers and sisters fit no dey happy at all, and life fit tire them. This kind condition fit be sickness and they fit need medicine or doctor to help them. (Luke 5:31) Elders and other brothers and sisters for congregation know say they no be doctor. But they know say their help dey important. They fit “encourage people wey they no dey happy, help people wey them dey weak,” and “dey patient with everybody.” (1 Thess. 5:14) All of us need to really understand the way our brothers and sisters de feel. We need to dey patient with them, and encourage the ones wey they no dey happy so that they go dey strong. You de do wetin you fit do to make people mind come down and encourage them? When you know how to encourage them, you go fit help them more.
12. Give one example of how brothers and sisters for congregation use their love encourage person.
12 How our love fit help people wey they no dey happy? One sister for Europe talk say: “Sometimes, e de do me like say make I kill myself. But e get wetin de help me. The congregation wey I dey don save my life. The brothers and sisters de always encourage me and they really love me. No be everybody know say my condition na sickness wey e de make life tire me. But even with that one, everybody for congregation de always help me. One husband and wife for my congregation just be like my papa and mama. Them de take care of me well, and them de always dey with me everytime and everyday.” Na true say no be all of us fit help like this. But we fit do everything wey we fit do to help our brothers and sisters wey them dey this kind condition. *
HOW TO SHOW OTHER PEOPLE LOVE TO MAKE THEM STRONG
13. Wetin we need to do if we want make our brothers and sisters dey strong?
13 De listen to people well. (Jas. 1:19) We de show say we love our brothers when we listen well to understand the way them de feel. You fit ask question wey e go help you understand how this person de feel. Then you go fit make the person dey strong. Make e show for your face say you really care. Allow the person to talk when he feel say he need to explain everything. Make you dey patient. This one fit help you really understand how he de feel. The brother or sister go trust you, and he go want listen to you when you de talk. When you show say you really want help brothers and sisters for this kind condition, you fit make their mind come down.
14. Why e no good make we de condemn people?
14 No de condemn people. The condition of people wey they no dey happy go only worse if they feel say you de condemn them. If this kind thing dey your mind, e go make-am hard for you to fit help them. Bible talk say: “Wetin person no use sense talk be like when they use knife chuck person. But wetin they use sense talk de make person happy.” (Prov. 12:18) Na true say e no dey our mind to “chuck” person with the things wey we de talk. But even if you talk the thing by mistake, the person go still feel the pain well-well. If we want use love encourage people, e good make we do everything wey we fit do to feel their pain.—Matt. 7:12.
15. Which better thing fit help us encourage our brothers and sisters?
Romans 15:4, 5.) Plenty fine-fine things dey inside Bible wey they fit make person mind come down. Bible come from “the God wey he de give endurance and comfort.” Apart from Bible verse, we still get other things wey we fit use. We fit use Watch Tower Publications Index and Research Guide for Jehovah’s Witnesses. We fit use them find Bible verse and other books wey they fit help person with different-different kind of problem. Then we go fit encourage our brothers and sisters for fine way.
15 Use Bible to make people mind come down. (Read16. Which kind character we need when we de encourage person wey he no dey happy?
16 We de show say we get love and we no de think only about ourself when we dey gentle and de treat other people with care. This two fine character go help us encourage our brothers and sisters. Jehovah na “the Father wey he de treat person with care and de show pity, and na the God wey he de give all comfort.” He de ‘treat his servants with care and de show them pity.’ (Read 2 Corinthians 1:3-6; Luke 1:78; Rom. 15:13) Paul show us fine example for this one. He talk say: “We dey gentle when we dey with wuna. We come be like mama wey she de breastfeed pikin and de sofri take care of her own children. So because we love wuna, no be only the good news of God we give wuna. We still ready to give wuna our life, because we come love wuna well-well.” (1 Thess. 2:7, 8) Person wey he get problem fit don pray to Jehovah. So when we dey gentle and de treat them with care like Jehovah, e fit be say Jehovah use us answer their prayer.
17. When we get-am for mind say our brothers fit make mistake, how that one go help us encourage them with love?
17 No ever think say your brothers no go make mistake. De see your brothers and sisters as they be. If you de think say they no go make mistake, wetin fit happen go make you sad. (Eccl. 7:21, 22) No forget say Jehovah no de expect his servants make they do wetin they no fit do. If we imitate Jehovah, we go dey ready to endure the thing wey our brother do us. (Eph. 4:2, 32) Instead of us to make them feel like say they no de try, e go good if we praise them for wetin them de do well. This one fit encourage them. When we praise other people from our heart, e go make them dey strong. They go de glad as them de serve Jehovah. This one go better pass when we compare them with other people.—Gal. 6:4.
18. Which reason we get to encourage our brothers and sisters with love?
18 We be Jehovah’s sheep, and Jesus die for us. So, Jehovah and Jesus really value us. (Gal. 2:20) We love our brothers and sisters for congregation. And we want treat them with love and care. “Make we de try our best to do the things wey they go bring peace, and the things wey they go encourage each other,” so that we go fit make our brothers dey strong. (Rom. 14:19) Small time, Paradise go come and nothing go make us lose our joy again. E de hungry us make that time reach quick-quick! People no go die again because of Adam sin. Sickness, war, suffer, and family problem no go dey again. And we no go de feel say we don fail ourself. After the one thousand years, sin go don comot from our body. Then, Jehovah go take people wey they pass the final test as his children. And “they go get the freedom wey the children of God get, and na wonderful one.” (Rom. 8:21) So make all of us de show the kind love wey e de make people dey strong. And make we de help each other to fit enter Paradise.
^ par. 6 Check chapter 24 for the book Draw Close to Jehovah.
^ par. 12 See some topic wey you fit use help people wey they want kill theirself. Go check this topics: “Why Go On? Three Reason to Keep Living” Because Things Change. Because There Is Help. Because There Is Hope. For April 2014 Awake; “When You Feel Like Giving Up On Life” for January 2012 Awake; and “Life Is Worth Living” A Worldwide Problem. You Can Find Help. For October 22, 2001 Awake.