1-2. (a) Why Armageddon na good news for the human family? (b) Which questions we go talk about for this article?

YOU don ever hear people talk say “Armageddon” na war wey countries go fight with very dangerous bombs wey them de call nuclear bombs? Or say na the time wey the earth go scatter because of the damage wey people don cause? But wetin Bible talk about Armageddon na good news. Na something wey we go dey happy about! (Rev. 1:3) The war of Armageddon no go end human life for the earth, instead e go save-am! How?

² Bible show say the war of Armageddon go save human life when e go remove governments wey people de rule. The war go save human life when e go destroy wicked people and save righteous people. The war of Armageddon go still save human life because e go help to protect this earth. (Rev. 11:18) To really understand this things, make we talk about four questions: Wetin be Armageddon? Which things go happen just before Armageddon start? Wetin we go do so that we go fit dey among the people wey God go save for Armageddon? How we fit continue to serve God well as Armageddon de near?

3. (a) Wetin the word “Armageddon” mean? (b) According to Revelation 16:14, 16, why we talk say Armageddon no be real place for this earth?

³ Read Revelation 16:14, 16. Na only one time the word “Armageddon” dey for inside Bible. That name come from one Hebrew word wey the meaning na “Mountain of Megiddo.” (Rev. 16:16; ftn.) Megiddo na one city for olden days Israel. (Josh. 17:11) But Armageddon no be any real place or the  name of one particular place for this earth. Wetin Armageddon really be? Na the time wey “the kings for the whole earth” gather together against Jehovah. (Rev. 16:14) After the kings for the whole earth just gather finish, war go follow. So for this article, we go still use the word “Armageddon” to mean that war. How we know say Armageddon no be real place? Number one, no real mountain dey wey be mountain of Megiddo. Number two, the area around Megiddo dey too small to contain “the kings for the whole earth,” their armies and things wey them de use fight war. Number three, the “kings” for this world go attack God’s people around the earth. Na this attack go start the war of Armageddon. We go talk about this one for this article after.

4. Why God connect e final great war with Megiddo?

⁴ Why Jehovah connect the final great war with Megiddo? For Bible time, Megiddo and the Valley of Jezreel na the place wey people fight plenty war. This two place no far from each other. Sometimes, Jehovah help e servants fight the war. For example, “near the water of Megiddo” when one chief wey e name na Sisera lead Canaan people for war, God help one Judge for Israel to win them. The name of the Judge na Barak. Barak and Deborah wey be prophetess thank Jehovah as e help them win. They sing say: “From heaven the stars fight . . . Sisera. The water for Kishon carry them [the enemies] go.”​—Judg. 5:19-21.

5. Wetin be one important way wey the war of Armageddon dey different from the war wey Barak fight?

⁵ Barak and Deborah use this words end their song, say: “So make all your enemy them die, O Jehovah. But make the people with love for you be like sun when e de shine come out.” (Judg. 5:31) For Armageddon, God go destroy e enemy them, but God go save e friends. But one important thing dey different from the war of Armageddon and the war wey Barak fight. For Armageddon, servants of God no go fight. They no go even hold weapons! They go dey strong “if [they] calm down and show say [they] trust” Jehovah and e angels.​—Isa. 30:15; Rev. 19:11-15.

6. Which different-different way Jehovah fit use destroy e enemies for Armageddon?

⁶ How God go destroy e enemies for Armageddon? E fit use different-different way. For example, God fit make ice block de fall like rain with force, e fit use earthquake, and lightning. (Job 38:22, 23; Ezek. 38:19-22) God fit make e enemies fight each other. (2 Chron. 20:17, 22, 23) E fit still use e angels to destroy wicked people. (Isa. 37:36) No matter the way God use fight e enemies, e go win the war. E go destroy all e enemies. And all righteous people go survive.​—Prov. 3:25, 26.

7-8. (a) According to 1 Thessalonians 5:1-6, which kind announcement leaders for this world go make? (b) Why the announcement go be dangerous lie?

⁷ They go announce say “peace dey and fear no dey” before “the day of Jehovah” come. (Read 1 Thessalonians 5:1-6.) “The day of Jehovah” for 1 Thessalonians 5:2, na the “great tribulation.” (Rev. 7:14) How we go know when the great tribulation want start? Bible tell us about one announcement wey they go make. This kind announcement no be just common announcement. This one go be the sign to show say the great tribulation go start.

⁸ Na that one go be the announcement wey Bible don talk say they go make, wey be “peace dey and fear no dey.” Why leaders for the world go talk like that? Leaders for religion go join them? Maybe. Even with that  one, that announcement go just be another lie from the demons. But the lie go really dey dangerous because e go make people think say them dey safe, when the trouble wey people never see before just want start. True-true, “destruction go just come quick-quick. E go just be like the pain wey woman de feel when e want born.” How about faithful servants of Jehovah? Because they no sabi the day wey the great tribulation go start, they fit surprise when e happen, but they go don ready for-am.

9. God go destroy the world wey Satan de control all at once? Explain.

⁹ Jehovah no go destroy the world wey Satan de control all at once, just as e destroy-am for the time of Noah. Instead, God go destroy one part first before e destroy the other parts after. God go first destroy Babylon the Great, wey be all lie-lie religion for this world. Then, for Armageddon, e go destroy the other parts of this world wey Satan de control. Politics, military, and the business for this world go dey among. Make we talk more about those two important things wey God go do.

10. According to Revelation 17:1, 6 and 18:24, why Jehovah go destroy Babylon the Great?

¹⁰ “The punishment wey they go give the great prostitute.” (Read Revelation 17:1, 6; 18:24.) Babylon the Great don make plenty people no de respect God. E don teach people lie about God. Babylon the Great be like prostitute. E don leave God and form friendship with rulers for this earth. E don suffer e members and don use wayo take their money. E don kill plenty people, even servants of God. (Rev. 19:2) So how Jehovah go destroy Babylon the Great?

11. Wetin be the “red wild animal,” and how God go use-am against Babylon the Great?

¹¹ Jehovah go use the “the ten horn” of the “red wild animal” to destroy “the great prostitute.” The wild animal stand for United Nations. Governments de support the United  Nations, and na this governments be the ten horn. When the time wey God don arrange reach, United Nations with the governments go attack Babylon the Great. They “go destroy and naked the prostitute” when they go take all the property wey e get and make people know the wicked things wey e don do. (Rev. 17:3, 16) The end for Babylon the Great go happen quick-quick. E go be like say e happen for “one day.” The supporters of Babylon the Great go shock. Why? Because e don always boast and talk say: “I sit-down like queen, and I no be woman wey e husband die. I no go ever feel sad.”​—Rev. 18:7, 8.

12. Wetin God no go allow make the nations do, and why?

¹² God no go allow make the nations destroy e people. E people de bear e name and them dey proud about-am. E people don obey the command to comot from Babylon the Great. (Acts 15:16, 17; Rev. 18:4) They don still work hard to help other people make they comot from Babylon the Great. So, servants of Jehovah no go ‘get part of the punishment’ for Babylon the Great. Even with that one, servants of God go still need strong faith to endure wetin go happen next.

13. (a) Who be Gog? (b) According to Ezekiel 38:2, 8, 9, wetin go start the war of Armageddon?

¹³ The attack of Gog. (Read Ezekiel 38:2, 8, 9.) After they don destroy all lie-lie religion, na only one religion go dey this earth. Only servants of God go remain. Satan no go dey happy at all. Satan go show say e really vex when e go use demons to give lie-lie information, so that governments for this earth go come together and attack servants of Jehovah. (Rev. 16:13, 14) As this group of government come together as one, Bible call-am “Gog of the land of Magog.” When this governments attack servants of God, the war of Armageddon go start.​—Rev. 16:16.

14. Wetin Gog go come know?

¹⁴ Gog go trust e armies wey be “ordinary  people.” (2 Chron. 32:8) We go put our trust for our God Jehovah. But the nations go see us as foolish people. Why? Because even the gods of Babylon the Great no save them from “the wild animal” and e “ten horn”! (Rev. 17:16) So Gog go think say to destroy us go dey easy. E go attack servants of God “like say na cloud de cover the land.” (Ezek. 38:16) But that time, Gog go see say e no fit escape. Like Pharaoh for Red Sea, Gog go know say e de fight against Jehovah.​—Ex. 14:1-4; Ezek. 38:3, 4, 18, 21-23.

15. Wetin Jesus go do for the war of Armageddon?

¹⁵ Christ and e angels go protect God’s people and go destroy Gog and all e armies. (Rev. 19:11, 14, 15) But what about Satan, the number one enemy of Jehovah? Remember say, na Satan lie to the nations and make them to attack servants of God for the war of Armageddon. Jesus go throw Satan and the demons inside one deep hole, or abyss. Jesus go lock them for there for one thousand years.​—Rev. 20:1-3.

16. (a) How we de show say we “know God”? (b) For Armageddon, why e go be blessing for us to know Jehovah?

¹⁶ Whether we don de serve Jehovah for long time or we just start, if we want survive for Armageddon, we must show say we “know God.” We must still show say we de “obey the good news about our Lord Jesus.” (2 Thess. 1:7-9) We “know God” when we know the things wey e like, the things wey e hate, and e laws. Apart from that one, we go love, obey, and worship only God. This one na another way to show say we know God. (1 John 2:3-5; 5:3) When we do this things, “God go know” us too. This one na big blessing because our life go dey safe for Armageddon! (1 Cor. 8:3) How? Because when “God know” somebody, the person go get favor from God.

17. Wetin e mean to “obey the good news about our Lord Jesus”?

¹⁷ All the truth wey Jesus teach, wey we de read about inside Bible, na part of “the good  news about our Lord Jesus.” We de obey the good news when we use-am for our life. We go still de take our service to Jehovah as the number one thing for our life, allow the laws of God to guide us, and preach about the Kingdom of God. (Matt. 6:33; 24:14) We must still support the anointed brothers of Christ as them de do the heavy work wey God give them.​—Matt. 25:31-40.

18. How anointed Christians go show kindness back to the “other sheep”?

¹⁸ As the “other sheep” don de support the anointed Christians, small time, the anointed Christians go show them kindness too. (John 10:16) How? Before the war of Armageddon start, all the 144,000 anointed Christians go don dey for heaven as spirit, and they no go fit die. They go be part of the armies wey Jesus go lead make they destroy Gog and protect “great crowd” of Jehovah’s people. (Rev. 2:26, 27; 7:9, 10) Na big blessing for the great crowd to support anointed Christians when they still dey this earth!

19-20. No matter the problems wey we de face, how we fit continue to serve God well as Armageddon de near?

¹⁹ The last days no easy at all and plenty servants of God de face problems. Even with that one, we fit endure with joy. (Jas. 1:2-4) One important thing to help us endure na to always pray from our heart. (Luke 21:36) We no go only pray, but we go still study Bible everyday and think deep about wetin we de learn. Make the different-different prophecy about our time dey part of wetin we de study. (Ps. 77:12) When we do this things and do our best for preaching work, our faith and our hope go strong!

²⁰ Imagine how you go dey happy when Babylon the Great no go dey again and when the war of Armageddon don end! And just imagine how you go really dey happy when everybody go de respect the name of God and the right wey e get to rule! (Ezek. 38:23) True-true, if any person know God, de obey e Son, and endure go reach the end, Armageddon na good news for that person.​—Matt. 24:13.