1. Which kind situation apostle John dey around the year 95 C.E.?

THE condition of apostle John around the year 95 C.E. no easy at all. E don old that time, e dey the island of Patmos and e no fit comot for there. And maybe among all the apostles, na only John still dey alive that time. (Rev. 1:9) John know say some people dey against the good news, and this people de deceive people for congregation and de make them no dey as one. The situation just be like say small time, no true Christian go dey again.​—Jude 4; Rev. 2:15, 20; 3:1, 17.

2. According to Revelation 7:9-14, which better vision God show John about the future? (Check picture for front cover.)

² Na this kind hard time John face when e receive one better vision about the future. For the vision, they tell some angels make they hold the strong breeze of the great tribulation until some group of slaves don receive the final mark. (Rev. 7:1-3) The number of people for that group na 144,000 and they go rule with Jesus Christ for heaven. (Luke 12:32; Rev. 7:4) After that one, John talk about another group. This group really plenty sotey e shout say: “See!” This one fit mean say John surprise for the thing wey e see because e no expect-am. Wetin John see? Bible tell us say: “I look and see! plenty people wey nobody go fit count. They come from different-different country and place, and they be different-different people and them de speak different-different language. They stand for front of the throne and the Lamb.” (Read Revelation 7:9-14.) John go don really glad as e know say for future, plenty-plenty people go de worship God for the correct way!

3. (a) Why the vision wey John see suppose to make our faith strong pass as e dey before? (b) Wetin we go learn for this topic?

³ We dey sure say the faith wey John get go don strong more-more  as e see the vision. We de live for time wey this vision de happen. So, e suppose to even make our faith strong pass as e make the faith of John strong! We don see for our time say millions of people de worship Jehovah, and they get the hope to survive great tribulation and live forever for this earth. More than eighty years ago, Jehovah don make e worshippers know who this plenty people or great crowd be. For this topic, we go learn how Jehovah make e worshippers know. Then we go discuss two things about this people wey John see. The two things na: (1) them dey plenty and (2) they come from different-different place. If we dey part of this group with this wonderful hope, this two things go make our faith strong more-more.

4. Which truth for Bible lie-lie Christians no understand, and wetin the Bible Students understand?

⁴ Normally, lie-lie Christians no de teach the truth for Bible say one day, people go live for this earth forever if they obey God. (2 Cor. 4:3, 4) Today, most church people de teach say all good people de go heaven when they die. But from the year 1879, the small group of Bible Students begin produce and give people Watch Tower. This small group dey different. They understand say God go make this earth Paradise again. They understand say millions of people go live for this earth because they obey God, no be for heaven they go live. But, e take them some time to really understand who go be this people.​—Matt. 6:10.

5. Wetin the Bible Students believe about the 144,000?

⁵ Another thing be say, the Bible Students still come understand from the Bible say some group of people go rule with Jesus for heaven. They be people wey “God . . . buy from the earth.” (Rev. 14:3) That group go be 144,000 people. This Christians love God and go don promise Jehovah say they go use their life do wetin e want. And they go don still serve God well when them dey this earth. Wetin the Bible Students believe about the “plenty people” wey John see for vision?

6. Before-before, wetin the Bible Students believe about the plenty people?

⁶ For the vision, John see as that group “stand for front of the throne and the Lamb.” (Rev. 7:9) The thing wey this verse talk make the Bible Students believe say the plenty people go live for heaven, just like the 144,000. If the 144,000 and the plenty people suppose to live for heaven, then wetin go make one group different from the other group? The Bible Students think say the plenty people go be Christians wey, when them dey this earth, they no obey God well. They still believe say some church people go fit be part of this plenty people because they try to follow wetin Bible talk for their life. The Bible Students believe say this people get some love for God, but the love no dey enough for them to rule with Jesus. So, because their love for God no too strong, they go fit stand for front of the throne for heaven. But they no go sit-down for thrones.

7. Which people the Bible Students believe say they go live for earth when Jesus de rule for one thousand years, and wetin the Bible Students believe about ancient servants of God?

⁷ Then who go live for this earth? The Bible Students believe say after the 144,000 and the plenty people don go heaven, God go allow make other millions of people live for earth so that they go enjoy wetin Christ go do when e don begin rule for one thousand years. The Bible Students no think say this other people go don serve God before the one thousand years wey Christ go rule. Instead, they think say when Jesus don de rule for one  thousand years, na that time this group go learn about Jehovah. Then after that one, if any of them do wetin God want, e go enjoy life for this earth forever. But if any of them no do wetin God want, God go destroy the person. Some people go serve as “prince” for this earth when Jesus go de rule for one thousand years. So, the Bible Students think say some of this “prince” go go heaven when the one thousand years don end. Another thing be say, some people serve God well, but they die before Christ come this earth. So the Bible Students still believe say God go resurrect this ones when Jesus don de rule for one thousand years to be part of those “prince.”—Ps. 45:16.

8. According to the Bible Students, which three group dey?

⁸ So, that time, the Bible Students believe say na three different group dey: (1) the 144,000, people. This ones go rule with Jesus for heaven; (2) the plenty people. The love wey this Christians get for God no too strong, so they go stand for front of the throne of Jesus for heaven; and (3) millions of people. This ones go learn about Jehovah for this earth for the one thousand years wey Christ go de rule. * But after, Jehovah help the Bible Students make they understand the truth about this topic well.​—Prov. 4:18.

9. (a) For which way the plenty people go fit stand for “front of the throne and the Lamb,” even though them dey for this earth? (b) Why this change for the way we understand Revelation 7:9 make sense?

⁹ For 1935, Jehovah Witness people come really understand who be the plenty people wey John see for vision. They come understand say this people no de go heaven to stand “for front of the throne and the Lamb.” Instead, the thing wey that verse talk get meaning. Even though say the plenty people go live for this earth, they fit stand “for front of the throne.” How? Na when they accept and de obey Jehovah as the Ruler of heaven and earth. (Isa. 66:1) They fit stand “for front of . . . the Lamb” when them de put faith for the sacrifice wey Jesus make. Matthew 25:31, 32 talk something like that. E say, “all the nations”—even wicked people—go ‘gather for front’ of Jesus when e sit-down for e wonderful throne. True-true, all this nations no dey for heaven, but na for this earth them dey. This new way wey they understand this Bible truth make sense. E make us understand why Bible no talk for any place say they take the plenty people go heaven. Na only one group get the promise to live for heaven forever. They be 144,000 people and they go “rule as kings over the earth” with Jesus.​—Rev. 5:10.

10. Why the plenty people need to learn about Jehovah before the one thousand years wey Jesus go begin rule this earth?

¹⁰ From 1935, Jehovah Witness people don come understand who really be the plenty people wey John see for vision. This group of Christians de serve Jehovah well and they get the hope to live for this earth forever. To survive the great tribulation, this group need to learn about Jehovah and begin serve Jehovah before the time wey Jesus go begin rule this earth for one thousand years. They go need to get strong faith so that they ‘go fit escape from all this things because this things must happen,’ before the one thousand years wey Christ go begin rule.​—Luke 21:34-36.

11. Why e be say some Bible Students think say God go take some of e faithful servants for this earth go heaven after Jesus don rule for one thousand years?

¹¹ What about the idea say some faithful servants of God for this earth go go heaven after Jesus don rule for one thousand years? Many  years ago, The Watch Tower of February 15, 1913 talk say this kind thing fit happen. That time, person go fit reason say, ‘Why faithful servants of God for ancient time go only receive life for this earth, when e be say some Christians wey their faith no even strong reach the one wey those ancient people get go go heaven?’ They think-am like that because of this two wrong ideas wey they get that time: (1) the plenty people go stay for heaven and (2) the faith wey the plenty people get no too strong.

12-13. Wetin the anointed Christians and the plenty people know about their different-different hope?

¹² As we don see-am, from 1935, Jehovah Witness people don really understand say the plenty people wey John see for vision, na them go survive Armageddon. They go “come out of the great tribulation” for this earth and “they no stop to shout with loud voice say: ‘Na our God and the Lamb save us. Our God sit-down for the throne.’” (Rev. 7:10, 14) Another thing be say, Bible de teach say the hope wey some Christians get to go heaven, better pass the hope wey the ancient servants of God get. (Heb. 11:40) So, our brothers begin preach more so that people go come serve Jehovah and get the hope to live forever for this earth.

¹³ The plenty people or the great crowd dey happy about the hope wey they get. They understand say whether na for heaven or for the earth we go dey to worship Jehovah, na Jehovah go decide that one. The anointed Christians and the plenty people know say they go get their reward only because God show them special favor through the ransom sacrifice wey Jesus Christ make.​—Rom. 3:24.

14. After 1935, why many people wonder how the number of the plenty people go come really plenty?

¹⁴ After 1935, when Jehovah Witness people come get clear understanding say those plenty people go live for this earth, many people still wonder how their number go come really plenty as John talk-am. For example, when they come understand well who that plenty people be, one brother wey e name na Ronald Parkin dey 12 years that time. E talk say: “That time, na about 56,000 publishers dey for the whole world. And maybe the majority of them na anointed Christians. So e be like say the plenty people no too plenty.”

15. How the number of the people wey John see for vision don continue to plenty?

¹⁵ But after some years, they send missionaries to plenty country, and the number of Jehovah Witness continue to grow. Then, for 1968, they begin use one book study Bible with people. The name of the book na The Truth That  Leads to Eternal Life. The book explain Bible truth for simple way and this one draw many people to Jehovah pass before. Inside four years, more than 500,000 people baptize. And as the Catholic Church begin lose e power for Latin America and other countries, more people come baptize. The same thing happen for Eastern Europe and some part for Africa. When they allow us to begin preach freely for there, more people come baptize. (Isa. 60:22) For our time, Jehovah’s organization don make plenty other better things to help people learn wetin Bible de teach. Now e clear say, the people wey John see for vision don plenty, and they plenty pass eight million.

16. Which place the plenty people come from?

¹⁶ When John write the vision wey e see, e talk say the plenty people come from “different-different country and place, and they be different-different people and them de speak different-different language.” Prophet Zechariah don write something like that before. E talk say: “That time, ten men from all the language wey the nations get, go hold the cloth of one Jew, they go hold-am tight and talk say: ‘We want follow wuna because we don hear say God dey with wuna.’”​—Zech. 8:23.

17. Wetin we de do to help people from all nations and language?

 ¹⁷ Jehovah Witness people know say to gather people from all language, they must preach the good news for many language. For more than 130 years now, we don de translate things to help people study the Bible. But, the translation work wey we de do now don pass any other translation work. We de translate for more than 900 language. To fit gather plenty people from all nations, e dey clear say na miracle wey Jehovah de do for our time. Because our literatures and Bible dey for many language, this plenty people de worship Jehovah as one, even if they come from different-different place. People sabi Jehovah Witness people say them de preach the good news with all their heart and they get love for each other. This one de really make our faith strong!​—Matt. 24:14; John 13:35.

18. (a) According to Isaiah 46:10, 11, why we no surprise say Jehovah don make that prophecy about the plenty people to happen? (b) Why the people wey their hope na to live for this earth no de feel say Jehovah de deny them something good?

¹⁸ The vision about the plenty people de really make us glad. We no surprise say Jehovah don make that prophecy to happen for wonderful way. (Read Isaiah 46:10, 11.) The plenty people dey happy for the hope wey Jehovah give them. They no de feel say Jehovah de deny them something good as e no anoint them with holy spirit to serve with Jesus for heaven. For Bible, we de read about men and women with strong faith, wey holy spirit direct. But they no be part of the 144,000. John the Baptist na one of them. (Matt. 11:11) Another one na David. (Acts 2:34) God go bring them and plenty-plenty other people back to life, to live for paradise for this earth. All of them with the plenty people go get the chance to show say na only Jehovah they go hold tight and accept as their ruler.

19. Wetin we suppose to do when we understand the vision wey John see about the plenty people?

¹⁹ Today, millions of people from all nations de worship Jehovah together as one, and na the first time Jehovah make this kind thing to happen. Whether our hope na to live for heaven or for this earth, we need to help more people as we fit make they join the plenty people, or the great crowd of “other sheep.” (John 10:16) Small time, Jehovah go bring the great tribulation as Bible talk, to destroy the governments and religions because they don make people really suffer. Then, the plenty people go serve Jehovah for this earth forever. This one na big blessing wey they go get for future!​—Rev. 7:14.