1-2. How Ecclesiastes 11:6 connect with the preaching work?

FOR some country, plenty people de like to hear more about Bible after they hear-am for the first time. Na wetin they don de wait for since! For some other place, people no de too get interest for God or Bible. How plenty people for your territory de do when person want preach to them? No matter how they behave, Jehovah want make we continue to preach until e talk say the work don complete.

² Jehovah don already decide when the preaching work go stop. Then, “the end go come.” (Matt. 24:14, 36) Before that time reach, how you go fit do wetin Ecclesiastes 11:6 talk, when e say “no gree make your hand rest”? *​—Read-am.

3. Wetin we go talk about for this article?

³ The article before this one talk about four things wey we go do, so that we go fit know how to preach the good news well. (Matt. 4:19) This article go talk about three things wey go help us dey ready to preach more, no matter wetin we face. We go learn why e dey important make we (1) always put the preaching work first for our life, (2) dey patient, and (3) continue to get strong faith.

4. Why we need to put the work wey Jehovah don give us as the number one thing for our life?

⁴ Jesus tell e disciples say some things go start to happen wey go show say we dey the last days. And e tell them say the things fit make them no put the preaching work as number one thing for their life. Jesus tell e disciples to “always  de watch.” (Matt. 24:42) For the time of Noah, many things no make people put their mind for the warning wey Noah give them. The same thing fit still happen to us today. (Matt. 24:37-39; 2 Pet. 2:5) So because of this one, e good make the preaching work wey Jehovah don give us be the number one thing for our life.

5. How Acts 1:6-8 show how far the good news go spread?

⁵ Today, we really need to put all our mind for the preaching work. Jesus don talk am say e followers go continue for the work after e don die, and even preach more pass as e preach when e dey this earth. (John 14:12) After Jesus die, some of e disciple go back to their fishing business. After Jesus resurrection, e do miracle and help e disciples to catch plenty fish. E use that opportunity tell them say, their preaching work dey important pass any other work. (John 21:15-17) Just before Jesus go back to heaven, e tell e disciples say the preaching work wey e start go spread far, and e go even pass Israel. (Read Acts 1:6-8.) Some years after, Jesus help apostle John to see vision, and e show John things wey go happen for the “Lord’s day.” * John see some wonderful things: E see as angel de preach the “everlasting good news” for “every country, and tribe and language and people.” (Rev. 1:10; 14:6) E dey clear say Jehovah want make we do the preaching work for the whole world until the work finish.

6. How we fit continue to put the preaching work as the number one thing for our life?

⁶ We fit continue to put the preaching work as number one thing for our life if we de think about all the things wey Jehovah de do to help us. For example, Jehovah de  give us books wey they print or wey we fit read for phone or computer. E still de give us videos and JW Broadcasting wey we de watch. Just think-am: For our website, we get things wey person fit read for more than 1,000 language! (Matt. 24:45-47) People for the world no dey as one because them de support different-different government, them dey different religion, some get money and some no get. But even with that one, more than eight million servants of Jehovah for the whole world dey as one. For example, for Friday April 19, 2019, Jehovah Witness for the whole world watch one video about the daily text for that day, even though say them dey different-different place. That same day for evening, 20,919,041 people gather for different-different place to do Memorial. When we think about the honor wey we get to see this wonderful things de happen and to dey part of this things, this one de make us to preach the good news more.

7. How the example of Jesus fit help us put the preaching work as number one thing for our life?

⁷ Another thing wey we fit do to make the preaching work the number one thing for our life na to copy the example of Jesus. E no allow anything remove e mind from the preaching work. (John 18:37) Jesus no fall for Satan when Satan promise to give-am “all the kingdom for this world” and the better-better things for inside. And even when they want make Jesus king, e no gree. (Matt. 4:8, 9; John 6:15) E no get long-throat for money and property, and e no allow trouble from people to make-am fear. (Luke 9:58; John 8:59) When some kind problem test our faith, we fit continue to make the preaching work the number one thing for our life if we remember the advice from apostle Paul. E tell Christians make they follow the example of Jesus so that they “no go tire and [their] heart no go weak.”​—Heb. 12:3.

8. If person dey patient wetin e go do, and why this one really dey important now?

⁸ When person dey patient, e go sofri wait until condition change. We need to dey patient for different-different situation. We fit want make bad condition change, or e fit be say we don de wait for long time for one better thing to happen. Prophet Habakkuk for Bible really want make the bad condition for Judah that time end. (Hab. 1:2) Disciples of Jesus be think say the Kingdom go start to rule for their time and free them from Rome people. (Luke 19:11) E de hungry us to see the time wey God Kingdom go remove wicked things and bring Paradise wey only good people go dey. (2 Pet. 3:13) But, we go need to dey patient and wait for the time wey Jehovah don choose to do-am. Make we talk about some ways wey Jehovah don teach us to dey patient.

9. Which examples for Bible show say Jehovah dey patient?

⁹ Jehovah na the number one example of person wey dey patient. E give Noah plenty time to build the ark and to “preach about wetin good.” (2 Pet. 2:5; 1 Pet. 3:20) Jehovah listen to Abraham when e de ask-am plenty question about wetin e don already decide to do the wicked people for Sodom and Gomorrah. (Gen. 18:20-33) For many years, Jehovah over dey patient with Israel people wey no de gree do wetin e talk. (Neh. 9:30, 31) Today, we don see  say Jehovah dey patient because e de give people wey e draw come e side plenty time to “repent.” (2 Pet. 3:9; John 6:44; 1 Tim. 2:​3, 4) The example wey Jehovah show us give us better reason to dey patient as we de preach and teach people Bible. God still use one example for Bible to teach us how to dey patient.

10. Wetin we learn from the example of the farmer wey James 5:​7, 8 talk about?

¹⁰ Read James 5:7, 8. The example of farmer wey de plant things teach us how to dey patient. Na true say some plants de grow fast. But, plenty plants, especially the one wey de produce fruit, de take long time to mature. For Israel, e de take about six months for the plants to mature. The farmer de plant seeds after rain fall around October. And e go harvest wetin e plant around April. (Mark 4:28) We go show say we get sense if we copy the way farmer dey patient. But this one fit no easy.

11. If we dey patient, how this one go help us for our preaching work?

¹¹ The truth be say, because we no dey perfect, we de like to see the result of our work quick-quick. But, if we want make our plants grow and produce, we must care for them everytime. We must dig ground, we must plant, we must put water, and we must clear grass. For the same way, if we want make disciples, we need to work hard. E de take time to help our Bible students make they learn to love people and stop to do partial. When we dey patient, this one go help us make we no tire when people no want listen to our message. Even when some people ready to listen to our message and learn from Bible, we must still dey patient. We no go fit force our Bible student to get faith. Sometimes, even the disciples of Jesus no quick understand the meaning of wetin e teach. (John 14:⁠9) Make we remember say, we fit de preach and de teach,  but na God de help people make their faith de grow.​—1 Cor. 3:6.

12. How we fit dey patient when we de preach to our family members wey no de serve Jehovah?

¹² One thing wey fit hard us na to dey patient when we de preach to our family members wey no de serve Jehovah. The thing wey Bible talk for Ecclesiastes 3:7 fit help us. That place talk say: “Time dey to keep quiet and time dey to talk.” Our fine character fit help our family people want listen to our message. But, we must always dey ready to preach to them. (1 Pet. 3:1, 2) Na true say, we must put all our heart for the way we de preach and teach people Bible. But make we dey patient with everybody, even our family members.

13-14. Which example of some people wey dey patient we fit copy?

¹³ We fit learn to dey patient from the example of servants of Jehovah for Bible time and for our time. Habakkuk really want make wicked things stop to happen, but e show say e dey patient when e talk say: “I go continue to stand for place wey I de guard.” (Hab. 2:1) Apostle Paul talk say e really want “complete” e work. Even with that one, e dey patient and e continue “to tell people the good news well.”​—Acts 20:24.

¹⁴ Think about the example of one husband and wife. They graduate from Gilead and they send them go one country wey Jehovah Witness people no plenty and wey plenty people no be Christian. Na small number of people ready to study the Bible. But, their classmates for other countries de tell them about all the people wey them de study with and wey don baptize. But this husband and wife dey patient and they continue to preach, even though say plenty people for their territory no want listen. After they don preach for eight years for place wey plenty people no want listen, one of their Bible student come baptize. This one really make them happy. Wetin we learn from this examples for Bible and for our time? This faithful people no slow down for their work or let their hand rest. And Jehovah bless them because them dey patient. So, make we “imitate people wey because of their faith and patience, they get wetin God promise.”​—Heb. 6:10-12.

15. Wetin be one way wey faith de help us to preach more-more?

¹⁵ We get faith for the message wey we de preach. So e de hungry us to tell many people, as we fit. We believe the things wey God don promise for Bible. (Ps. 119:42; Isa. 40:8) The things wey Bible talk say go happen for our time, we don de see say e de happen. We don see how people life de better when they follow the advice for Bible. This things wey we de see de make us believe say everybody need to hear the good news about the Kingdom.

16. With wetin Psalm 46:1-3 talk, how the faith wey we get for Jehovah and Jesus fit help us to preach more?

¹⁶ We still get faith for Jehovah and Jesus. Na Jehovah get the message wey we de preach, and e don choose Jesus as King for the Kingdom. (John 14:1) No matter wetin we face, Jehovah go always protect us and give us power. (Read Psalm 46:1-3.) Another thing be say, we dey sure say Jesus de direct the preaching work from heaven. Jesus de use the power wey Jehovah don give-am.​—Matt. 28:​18-20.

17. Talk one example about why we no suppose tire to preach.

¹⁷ Faith de make us believe more-more  say Jehovah go bless our work, and sometimes e fit be for way wey we no expect. (Eccl. 11:6) For example, na everyday plenty-plenty people de see our books wey we put for table or book stand, as we de preach for open place. This way wey we de use preach de work? Yes, e de really work! Our Kingdom Ministry of November 2014 write about one young student for university. This student want write one story about Jehovah Witness people. This girl no see Kingdom Hall, but e see our book stand for the school, and e see the information wey e need to write the story. As time de go, this student baptize as Jehovah Witness and e don de serve as regular pioneer now. This kind experience de make us continue to preach because e show say people still want hear the message about the Kingdom.

18. Why we dey sure say the preaching work go complete as Jehovah want-am?

¹⁸ We dey sure say the preaching work go end for the right time. Think about wetin happen for time of Noah. Jehovah show say e de always do things for the correct time. Around 120 years before the heavy rain fall for time of Noah, Jehovah don already decide when e go fall. After plenty years don pass, Jehovah tell Noah to build ark. E fit be say Noah continue to work hard for about 40 or 50 years before the rain start. Even as people no want listen to Noah, e continue to preach and warn the people until Jehovah talk say time don reach to bring the animals inside the ark. Then, for the correct time, “Jehovah close the door.”​—Gen. 6:3; 7:1, 2, 16.

19. Which hope we get if we no let our hand rest?

¹⁹ Small time, Jehovah go let us know say we don finish the preaching work. After that one, e go destroy this wicked world wey Satan de control and bring Paradise. Good people go plenty for there. Before that time reach, make we do like Noah, Habakkuk, and other people wey no let their hand rest. Make the preaching work be number one thing for our life, make we dey patient, and continue to get strong faith for Jehovah and the things wey e don promise.