The fine thing wey that verse for Bible talk na: “If you see say them de treat poor person anyhow for your area and them de do partial and wetin no dey correct, make the matter no surprise you. Another person dey wey high pass that person, wey de watch-am. And other people dey wey still high pass them.”​—Eccl. 5:8.

If we only look this matter from the way we de think, e fit be like say this verse de only talk about government people wey de rule. But if we really think more about-am, we go see say e still de talk truth about Jehovah and this one suppose give us comfort.

Ecclesiastes 5:8 de talk about person wey de rule wey de treat poor people anyhow and de do them partial. This person wey de rule suppose remember say, another person wey e position high pass e own, or wey get power pass-am for government, fit de watch-am. And other people fit dey wey their position high pass the position wey all of them get. The sad thing be say, because na man de rule, all this people fit de do bad things for government, and people de suffer because of all the bad things wey them de do.

But even if e be like say hope no dey, e de give us comfort to know say Jehovah de watch people for high position wey de rule today. We fit beg God and tell-am about all the things wey de worry us. (Ps. 55:22; Phil. 4:6, 7) We know say “the eye of Jehovah de look every place for the earth,” so that e go use e power help “people wey de serve-am with all their heart.”​—2 Chron. 16:9.

So, Ecclesiastes 5:8 de make us remember say for government today, person always dey wey e position or power high pass the one wey other people get. The number one important thing na say, this Bible verse fit help us remember say na Jehovah get power and position pass any other person for heaven and earth. E don de use e Son Jesus Christ, to rule as King for the Kingdom. Jehovah de see everybody and everything. E no de do partial at all and e de always do the correct thing. And na so e Son still be.