1. Which time e fit hard to serve Jehovah?

WHEN you think say to serve Jehovah go hard pass? You go talk say na when you get plenty problem or na when things de go well for your life? When we de face problem, e dey easy for us to trust Jehovah. But wetin we de do when things de go well for us? This one de make you forget sometimes say your worship to Jehovah dey important? Jehovah warn Israel people say this kind thing fit happen to them.​—Deut. 6:10-12.

2. Which example King Asa show?

² King Asa na one fine example of person wey really trust Jehovah. This thing wey e do show say e get sense. No be only for time of trouble King Asa serve Jehovah, but e still serve Jehovah for time of peace. E quick start to “use all e heart serve Jehovah.” (1 Ki. 15:14, ftn.) One way wey Asa show say e de serve Jehovah with all e heart, na when e stop lie-lie worship for Judah. Bible talk say, “e remove the altars wey people de use worship lie-lie gods and the high place them. E scatter the pillars wey them de use for worship; and the poles wey them de use for worship, e cut them fall.” (2 Chron. 14:3, 5) Asa even remove e grandmama, wey e name na Maacah, from high position for the kingdom. Why? Na because the woman de make people to worship lie-lie god.​—1 Ki. 15:11-13.

3. Wetin we go talk about for this topic?

³ Asa no only stop lie-lie worship, e still help the people  to worship Jehovah again. Jehovah bless Asa and Israel people with peace. * For ten years wey Asa rule, “the land no get trouble.” (2 Chron. 14:1, 4, 6) For this topic, we go talk about how Asa use that time wey they get peace. Then we go talk about Christians for time of apostles wey use their time of peace well, like Asa. Last-last, we go answer this question: If you de live for place wey you dey free to worship Jehovah, how you fit use that time of peace well?

4. As e dey for 2 Chronicles 14:2, 6, 7, how Asa use the time wey peace dey?

⁴ Read 2 Chronicles 14:2, 6, 7. Asa tell the people say na Jehovah “give [them] peace for every corner.” But Asa no feel say this time wey peace dey, na time to relax. Instead, e begin build cities, walls, towers, and gates. E tell people of Judah say: “Na we still get the land.” Wetin Asa mean? E mean say no enemy dey the land to disturb them make they no go place wey they want go for the land, or make they no build wetin they want build. E encourage the people to use the time of peace well.

5. Why Asa prepare e army?

⁵ Asa still use the time wey peace dey to prepare e army. (2 Chron. 14:8) This one mean say e no trust Jehovah? No. Instead, Asa know say na e work as king to make the people ready for any trouble wey they go face for future. Asa know say the peace wey Judah de enjoy  fit be only for some time. And na so e really happen.

6. How Christians for time of apostles use time wey peace dey?

⁶ Even as people suffer Christians for time of apostles plenty times, they still enjoy peace sometimes. How Christians use the time wey peace dey? They continue to preach the good news and they no tire. The book of Acts talk say they “obey Jehovah.” Because they continue to preach the good news, they “continue to plenty.” E clear say as they put all their heart for the preaching work, Jehovah bless them for time wey peace dey.​—Acts 9:26-31.

7-8. Wetin Paul and other Christians do when they see the chance? Explain.

⁷ The disciples for time of apostles use any chance wey they see to preach the good news. For example, Paul see say e fit preach to plenty people for Ephesus. So e use the chance stay for there and preach to them, so that e fit make disciples.​—1 Cor. 16:8, 9.

⁸ Paul and other Christians see another chance and they use-am preach to plenty people. This one happen for 49 C.E. when the apostles and elders decide whether Christians must circumcise. (Acts 15:23-29) After they tell the congregations about the decision, the disciples work hard to preach “the good news about the word of Jehovah.” (Acts 15:30-35) Wetin come be the result? Bible tell us say “all the congregation continue to get strong faith and their number de increase everyday.”​—Acts 16:4, 5. 

9. Wetin be the condition for plenty country today, and wetin we fit ask ourself?

⁹ For plenty country today, we dey free to preach. You de live for this kind country? If na so, ask yourself say, ‘How I de use this time wey I dey free?’ For this last days, Jehovah’s organization dey busy de preach and teach the good news for the whole world pass any other time. (Mark 13:10) Plenty things dey wey we fit do for this work.

10. Wetin 2 Timothy 4:2 talk say make we do?

¹⁰ How you fit use time of peace well? (Read 2 Timothy 4:2.) E good make you think-am whether you or person for your family go fit do more for the preaching work, maybe even to serve as pioneer. Now no be the time to gather money and property because we no go carry this things pass great tribulation.​—Prov. 11:4; Matt. 6:31-33; 1 John 2:15-17.

11. Wetin some publishers don do so that they fit preach to plenty people as they fit?

¹¹ Plenty publishers don learn new language so that they fit use-am preach and teach people Bible. Jehovah’s organization de produce plenty publications wey go help them preach for more language. For example, for 2010, we get our publications for about 500 language. Today, the number of language don plenty pass 1,000.

12. How people de benefit when they hear message from Bible for their own language? Give one example.

¹² How people de feel when they hear about Jehovah for their own language? Make we talk about the example of one sister wey benefit from the convention  wey they do for America. They do the convention for the language wey the sister de speak, wey them de call Kinyarwanda. This language na the main language wey them de speak for Rwanda, Congo (Kinshasa), and Uganda. After the convention, the sister talk say: “Since I come America 17 years ago, na this one be the first time wey I don understand convention program well.” E clear say the program really touch the sister for heart when e hear-am for e own language. If your condition allow you, you fit learn another language to help some people for your territory? You no think say this one go really dey good because some people dey your territory wey another language go better for them? You go see-am say gain dey for your hard work.

13. How our brothers for Russia use the time wey peace dey?

¹³ No be all our brothers and sisters dey free to preach for their place. For some countries, our brothers no dey free to preach because government don stop some part of the work. For example, think about our brothers for Russia. They suffer them for many years, but for March 1991, government come allow them de do their work. That time, na around 16,000 publishers dey for Russia. Twenty years after that time, the number don plenty pass 160,000 publishers! E clear say, our brothers and sisters use the time well when they get freedom to preach. That time of peace no last. But even as things change for that country, the brothers no allow this one make them tire to do Jehovah work. They continue to do everything wey they fit do to serve Jehovah.

14-15. How Jehovah use e power help Asa?

¹⁴ As time de go, the peace wey the people de enjoy for time of Asa come end. Plenty army wey pass one million soldiers come from Ethiopia. The name of the person wey de command them na Zerah, and e dey sure say they go win Judah. But Asa no put e mind for the number of soldiers wey e get, instead e trust e God Jehovah. Asa pray say: “Abeg, help us Jehovah our God, because na you we trust, and na your name we use come fight this plenty people.”​—2 Chron. 14:11.

¹⁵ The soldiers wey Ethiopia get na almost times two of the one wey Asa get. Even with that one, Asa know say Jehovah get power and e fit help E people. And Jehovah really help e people. E disgrace the soldiers from Ethiopia.​—2 Chron. 14:8-13.

16. How we know say the time of peace go end?

¹⁶ We no know everything wey each of us go face for future. But we know say the peace wey servants of Jehovah de enjoy today no go last. No forget say Jesus talk say for last days, “all the nations go hate” e disciples. (Matt. 24:9) And apostle Paul talk say people “go still suffer anybody wey want live e life as God want and follow Christ Jesus.” (2 Tim. 3:12) Satan de “over vex,” and the things wey e go de do because e de vex go affect us.​—Rev. 12:12.

17. Which things go happen wey fit test our faith?

¹⁷ Small time, all of us go face wetin go test our faith. “Great tribulation” go happen, and “this kind one never happen since the world start come reach now.” (Matt. 24:21) When that time reach, family members fit give us trouble and government fit make law to stop our work. (Matt. 10:35, 36) Like Asa, each of us go trust Jehovah to help and protect us?

18. As e dey for Hebrews 10:38, 39, wetin go help us prepare for time wey peace no go dey?

¹⁸ Jehovah don de prepare us so that our faith go dey strong. E de use “the  faithful and discreet slave” to give us “food for the correct time.” This one go help us get everything wey we need to dey strong. (Matt. 24:45) But we must do everything wey we fit do to get strong faith for Jehovah.​—Read Hebrews 10:38, 39.

19-20. With wetin dey 1 Chronicles 28:9, which questions we go ask ourself, and why we suppose ask them?

¹⁹ Like King Asa, we need to “look for Jehovah.” (2 Chron. 14:4; 15:1, 2) We start to “look for Jehovah” when we learn about-am and baptize. We do everything wey we fit do to make our love for Jehovah strong more. To know whether we still de do fine for this matter, e good make we ask ourself say, ‘I de always go meeting?’ For our meeting, we de get power wey de help us continue to serve Jehovah, and our brothers and sisters de encourage us. (Matt. 11:28) We fit still ask ourself say, ‘I de always study my Bible?’ If you get family, you de do family worship every week? What if na only you dey? You still get time wey you de use study every week? And, you de do your best to preach and teach people Bible?

²⁰ Why e good make we ask this questions? Na because Bible tell us say Jehovah de check wetin we de think for mind and wetin dey our heart. So e good make we do the same thing. (Read 1 Chronicles 28:9.) If we see say we need to change some things for our plan, or the way we de think, make we beg Jehovah to help us change them. Na now be the time to prepare ourself for the test wey we go face for future. No allow anything make you no use the time of peace well!