1-2. Which shaking prophet Haggai talk say go happen for our time?

FOR 2015, ground shake open for one place wey them de call Nepal. Some people survive the earthquake and they talk say, “Just for some minutes, the shops and old buildings start to fall scatter.” “Strong fear just dey every corner . . . Plenty people talk say the earthquake last for about two minutes. But for me, e be like say e long pass like that.” If na you that kind thing happen to and strong fear enter your body like that, you fit no ever forget-am.

² But today, one kind shaking de happen and this one dey different. E no de happen for only one city or country. Jehovah de shake all the nations for the world, and e don de do this one for many years. Prophet Haggai don talk before say this one go happen. E say: “This one na the thing wey Jehovah of armies talk, ‘Small time, I go shake the heavens and the earth and the sea and the dry land again.’ ”—Hag. 2:6.

3. How the shaking wey Haggai talk about dey different from real earthquake?

³ The shaking wey Haggai talk about different from earthquake wey de only scatter things. Instead, this one de make good things happen. Jehovah tell us say: “I go shake all the nations, and the fine-fine things from all the nations go come inside this house; and I go full [this house] with praise.” (Hag. 2:7) Wetin this prophecy mean for people wey live for time of Haggai? And wetin e mean for us today? We go answer this questions and still learn how we fit join de shake nations today.

4. Why Jehovah send prophet Haggai to E people?

⁴ Jehovah give prophet Haggai one important work to do. Think about wetin happen before that time. For the year 537 B.C.E., some Jew people go back to Jerusalem from Babylon, the place wey them dey before as slave. E fit be say Haggai follow them. Small time after this faithful servants of Jehovah reach where them de go, they start to build Jehovah house, or temple. (Ezra 3:8, 10) But after some time, things spoil. They lose joy and stop to work because other people for the area de give them trouble. (Ezra 4:4; Hag. 1:1, 2) For 520 B.C.E., Jehovah tell Haggai to help this Jew people make they put all their power again for the work, and make Haggai encourage them to finish the temple. *—Ezra 6:14, 15.

5. Why Haggai message go don really encourage Jew people?

⁵ The reason why Jehovah send Haggai message, na to make Jew people get strong faith for Jehovah. With strong heart, prophet Haggai tell this Jew people wey don lose joy say: ‘Jehovah talk say, “Make wuna dey strong all of wuna for the land, and work. Because I dey with wuna,” na so Jehovah of armies talk.’ (Hag. 2:4) As Haggai use “Jehovah of armies,” this one go don really encourage the people. The angels wey Jehovah de control over plenty. So Jew people need to trust Jehovah if they want succeed.

6. Wetin the shaking wey Haggai talk about cause?

⁶ Jehovah send Haggai to tell Jew people say E go shake all the nations. This message from Jehovah encourage the Jew people wey don lose joy and wey don stop to build the temple. The message show say Jehovah go shake Persia wey be the world power that time. And wetin that shaking go cause? Number one, God people go build the temple finish. Number two, even people wey no be Jew go join them to worship Jehovah for that temple wey they build again. This message go don really encourage God people!—Zech. 8:9.

7. Which shaking work we de help de do today? Explain.

⁷ Wetin the prophecy of Haggai mean for us today? Jehovah de shake all the nations again, and this time, we de help to do that work. Think about this one: For 1914, Jehovah make Jesus Christ the King of E Kingdom for heaven. (Ps. 2:6) Na bad news for leaders for this world when that Kingdom start to rule. This one mean say “the time wey God allow for the nations” don complete. To put-am for another way, we fit talk say the time wey no ruler de represent Jehovah don end. (Luke 21:24) Because of that one, especially since 1919, servants of Jehovah don de tell everybody say na the Kingdom of God be the only hope wey people get. This “good news about the Kingdom” wey them de preach don shake the whole world.—Matt. 24:14.

8. As e dey for Psalm 2:1-3, wetin plenty nations don do about the message?

⁸ Wetin people don do about this message? Plenty people don reject-am. (Read Psalm 2:1-3.) The nations don really  vex. They no gree accept the person wey Jehovah don choose as Ruler. They no see the Kingdom message wey we de preach as “good news.” Some government don even put law to stop the preaching work! Even though say many of the rulers for this nations claim say them de serve God, they no want stop to rule. So, like the rulers for time of Jesus, the rulers for our time dey against the person wey Jehovah don choose as them de attack e faithful disciples.—Acts 4:25-28.

9. Wetin Jehovah do as the nations no accept the Kingdom message?

⁹ How Jehovah answer the nations for the bad way wey they behave? Psalm 2:10-12 tell us say: “So now, wuna wey be king, make wuna show deep sense. Make wuna accept correction, wuna wey de judge for the earth. Serve Jehovah with fear, and over glad with strong fear. Honor the son, or God go vex and wuna go die leave the way, because when E vex, the vex de quick burn. All the people wey go meet-am for protection go dey happy.” Jehovah dey kind and e de give them time to do the right thing. They fit still change their mind and accept Jehovah’s Kingdom. But time no dey again. We de live for “last days” of this wicked world. (2 Tim. 3:1; Isa. 61:2) E really dey important now make people know the truth and choose to serve Jehovah.

10. Which better result Haggai 2:7-9 talk say go come out from the shaking work?

¹⁰ The shaking wey Haggai talk about, bring better result for some people. Haggai tell us wetin go happen because of the shaking, e say, “the fine-fine things [people with good heart] from all the nations go come inside” to worship Jehovah. * (Read Haggai 2:7-9.) Isaiah and Micah still talk say this kind thing go happen “for last days.”—Isa. 2:2-4, ftn.; Mic. 4:1, 2, ftn.

11. Wetin one brother do about the Kingdom message when e first hear-am?

 ¹¹ Think about wetin one brother do when e hear this message wey de shake the earth. E name na Ken and e de serve for world headquarters now. Brother Ken still remember well wetin happen when e first hear the Kingdom message about 40 years ago. E talk say: “When I first hear the truth for Bible, I dey happy to learn say we de live for the last days of this wicked world. I see say if I want make God glad and get everlasting life, I need to make sure say I no dey part of this world wey de shake, and I need to stand strong for Jehovah side. I pray to Jehovah and I no waste time do wetin I need to do. I stop to support this world, and quick-quick, I accept the protection wey God’s Kingdom de give wey nothing fit shake.”

12. For this last days, how better things don full the temple of Jehovah?

¹² E dey clear say Jehovah don de bless e people. For this last days, we don see say plenty-plenty people don start to worship Jehovah. For 1914, we pass 5,000 small. But now, we don pass eight million people wey de worship God well, and plenty other people de join us every year to do Memorial. So, “the fine-fine things from all the nations” don full Jehovah temple, wey be the arrangement to worship Jehovah for correct way. This people de make change when they wear the new character wey Bible talk, and this one de bring praise to the name of Jehovah.—Eph. 4:22-24.

13. Which other prophecies don happen as people de come worship Jehovah more and more? (Check picture for front cover.)

¹³ As more and more people de come worship Jehovah, this one de make other prophecies for Bible de happen, like the one for Isaiah chapter 60. Verse 22 of this chapter talk say: “The one wey no reach anything go turn to one thousand and the one wey small go turn to big country. Me, Jehovah, go do-am quick-quick when the time reach.” Because more and more people start to worship Jehovah, one wonderful thing happen. This “fine-fine things,” or people, come with the  different-different things wey they sabi do, or their skills, and they really dey ready to preach the “good news about the Kingdom.” Because of this one, Jehovah people fit use their skills wey Isaiah talk about as “the milk of nations.” (Isa. 60:5, 16) Because of the help wey this correct men and women de give, we de preach the good news for 240 countries and de produce publication for more than 1,000 language.

14. Which decision people need to make now?

¹⁴ For this time of the end, the shaking of the nations de force people to make decision. They go support God’s Kingdom, or they go trust the governments for this world? This one na the decision wey everybody go need to make. The truth be say, servants of Jehovah de obey government laws for the country wey them dey, but they no de support any side for politics at all for this world. (Rom. 13:1-7) They know say na only the Kingdom go fit remove all our problems. That Kingdom no dey part of this world.—John 18:36, 37.

15. Which serious test Revelation talk say servants of Jehovah go face to show whether they hold God tight?

¹⁵ The book of Revelation talk about the test wey servants of God go face for the last days, to show whether they really support God. That test go continue to bring serious trouble and suffer for us. The governments for this world go want make we worship them, and they go suffer people wey no gree support them. (Rev. 13:12, 15) They go “force all people, small and big, rich and poor, free people and slave, to get mark for their right hand or forehead.” (Rev. 13:16) For olden days, them de give slave mark wey de last, to show who be the owner of the slave. For the same way, people today go expect make everybody show who them de support. The way people de think and the things wey them de do go show say them de support the governments for this world.

16. Why e really dey important now to make the way we hold Jehovah de strong more-more?

¹⁶ We go accept the mark wey Revelation talk about and support governments for this world? People wey no gree accept the mark go dey danger and face hard time. The book of Revelation explain say: “Nobody go buy or sell if e no get the mark.” (Rev. 13:17) But servants of God know wetin God go do to people wey get the mark wey Revelation 14:9, 10 talk about. Instead of them to accept the mark, e go be as if they write for their hand say, “Jehovah own.” (Isa. 44:5) Na now be the time to make sure say we really hold Jehovah tight. If we do like that, Jehovah go glad to claim us as e own!

17. Wetin we need to remember about the way Jehovah dey patient?

¹⁷ Jehovah don show for this last days say e really dey patient. E no want destroy anybody. (2 Pet. 3:9) E don give everybody time to repent and decide the right thing. But e no go dey patient forever. People wey no gree support God’s Kingdom go face the same thing wey happen to Pharaoh for time of Moses. Jehovah tell Pharaoh say: “By now I for don send serious sickness to you and your people, and all of wuna for don die finish from this earth. But I leave you make you continue  to live because of one thing: so that I go show you my power and make people for the whole earth know my name.” (Ex. 9:15, 16) All the nations go know at last say na Jehovah be the only true God. (Ezek. 38:23) How this one go happen?

18. (a) Which other type of shaking Haggai 2:6, 20-22 talk about? (b) How we know say the things wey Haggai talk go happen for future?

¹⁸ Many years after Haggai don die, apostle Paul write say the thing wey Haggai 2:6, 20-22 talk, go happen for future. (Read-am.) Paul talk say: “Now e don promise say: ‘I no go only shake the earth again but I go still shake the heaven.’ Now the word ‘again’ de show say they go remove the things wey fit shake, the things wey they don make, so that the things wey no fit shake go fit remain.” (Heb. 12:26, 27) This shaking dey different from the one wey Haggai 2:7 talk. This one mean say, people wey no gree accept the right wey Jehovah get to rule, like Pharaoh, Jehovah go destroy them forever.

19. Wetin no go shake, and how we know this one?

¹⁹ Wetin no fit shake, or comot? Paul continue say: ‘Since we don see say they go give us Kingdom wey no go ever shake, make we continue to get special favor wey go help us fit worship God for the way wey e like, and de do-am with fear and respect.’ (Heb. 12:28) True-true, after this last shaking don complete, na only God’s Kingdom no go shake. E go still stand strong!—Ps. 110:5, 6; Dan. 2:44.

20. Wetin people must decide, and how we fit help them?

²⁰ Time no dey to waste! People must choose: They go continue to support this world, make they die, or they go choose to serve Jehovah and change the things wey they need to change for their life, so that they go live forever? (Heb. 12:25) We fit use our preaching work help people to decide for this important matter. Make we help plenty more people wey get good heart decide to support God’s Kingdom. And make we de always remember the thing wey our Lord Jesus talk when e say: ‘They go preach the good news about the Kingdom for everywhere for this earth, so that people for the whole world go hear. And after that one, the end go come.’—Matt. 24:14.