1. How person de feel when they disfellowship e family member?

THEY don disfellowship person wey you love from congregation before? This kind thing de pain reach bone! One sister wey e name na Hilda, * talk say: “When my husband die after 41 years wey we don marry, I be think say nothing go fit ever worse pass this one wey happen to me. But when my son leave congregation, e wife, and e children, na this one worse pass for me.”

2-3. As e dey for Psalm 78:40, 41, when person leave Jehovah how Jehovah de feel?

² Think how e go don really pain Jehovah reach when some angels wey dey part of e family, no gree dey e side again! (Jude 6) Israel people wey Jehovah love do strong head for Jehovah many times. This one go don really pain Jehovah, no be so? (Read Psalm 78:40, 41.) So when person wey you love leave Jehovah, you fit dey sure say our Papa for heaven wey love us de feel the pain too. E understand the pain wey you de feel. E go use love give you the encouragement and the support wey you need.

³ For this article, we go talk about wetin we fit do to get the help wey Jehovah de give when person wey we love leave Jehovah. We go still talk about how we fit help other people for congregation wey de face this kind thing. But make we first talk about some things wey we no suppose think about.

4. How plenty papa and mama de feel when their pikin leave Jehovah?

⁴ When pikin wey person love leave Jehovah, na normal thing for the papa and mama to think say e get wetin they suppose do wey for help their pikin continue to serve  Jehovah. After they disfellowship the son of one brother wey e name na Luke, the brother talk say: “I blame myself. I even dream bad dreams about-am. Sometimes, I go cry and feel the pain for my heart.” One sister wey e name na Elizabeth, face that kind condition. E think plenty times say: “Wetin I no do well as mama? I be feel say I fail to really teach my son the truth.”

5. When person leave Jehovah, na who get the fault?

⁵ We need to remember say Jehovah don give each of us the freedom to choose wetin we want. This one mean say we fit choose whether we go obey Jehovah or we no go obey. Some children no get papa and mama wey show them good example. But they decide to serve Jehovah and continue to dey faithful. Other people get papa and mama wey work hard to teach them the truth, but they leave Jehovah after. So, each of us must decide whether we go serve Jehovah. (Josh. 24:15) So papa and mama wey dey sad because their pikin leave Jehovah, make wuna no think say na wuna fault.

6. How young person fit feel when e papa or mama leave God?

⁶ Sometimes, papa or mama go leave Jehovah and even leave the family. (Ps. 27:10) This one fit really pain the children because them de see their papa or mama as example wey them de follow. One sister wey e name na Esther wey they disfellowship e papa, talk say: “I cry many times because I see say, no be say e just de leave the truth small-small. But, e decide by e self say e no want serve Jehovah again. I love my papa, so when they disfellowship my papa, I always de worry whether e dey okay. And even sometimes, one kind fear wey I no fit control go just hold me.”

7. How Jehovah de feel about young person wey they disfellowship e papa or mama?

⁷ Young people, if they disfellowship your papa or mama, make you know say we de feel your pain! Make you still know say Jehovah understand your pain. E love you and e dey happy say you never leave the truth. And we wey be your brothers and sisters for congregation dey happy too. Make you still remember say, no be you de decide for your papa or mama. As we don talk before, Jehovah don give each person the freedom to choose who they go serve. And each person wey don give e life to Jehovah and baptize, must “carry e own load wey e suppose carry.”—Gal. 6:5, ftn.

8. Wetin family members wey hold Jehovah tight fit do as them de wait for their person to come back to Jehovah? (Still check the box “ Come Back to Jehovah.”)

⁸ When person wey you love leave Jehovah, na normal thing to get hope say e go come back one day. Wetin you fit do as you de wait for the person to come back? Do everything wey you fit do to make your faith continue to dey strong. When you do like that, you go be better example for other people for the family, and maybe, even for the person wey they disfellowship. You go still get the power wey you need to endure the pain. So make we talk about some things wey you fit do.

9. Wetin you fit do to continue to make your faith strong? (Still check the box “ Some Bible Verse Wey Fit Cool Your Heart if Person Wey You Love Leave Jehovah.”)

⁹ Do everything wey you fit do to continue to make your faith strong. E really dey important make you continue to make yourself and other family members dey strong. How you fit do this one? Make you get plan wey you de follow for your Bible reading, de think deep about wetin you read, and de go meeting. This one go help you get power from Jehovah. One sister wey e name na Joanna, wey e papa and e sister leave the truth talk say: “My worry de come down when I read about Bible examples like Abigail, Esther, Job, Joseph, and Jesus. Their examples encourage me and help me to think for correct way more-more. Our songs for JW Broadcasting^® still encourage me.”

10. How Psalm 32:6-8 de help us endure when we really dey sad?

¹⁰ Tell Jehovah everything wey de worry you. When you de feel sad, make you no stop to pray to Jehovah. Beg our God wey get love make e help you see things the way e de see-am. And make e ‘give you deep sense and teach you the way wey you go follow.’ (Read Psalm 32:6-8.) True-true, e fit no easy to tell Jehovah how you de really feel. But Jehovah understand your pain well. Jehovah really love you and e want make you tell-am everything wey de worry you.—Ex. 34:6; Ps. 62:7, 8.

11. As e dey for Hebrews 12:11, why we suppose to trust the correction wey Jehovah de give? (Still check the box “ The Arrangement to Disfellowship Person Show Say Jehovah Love Us.”)

¹¹ Support the decision of the elders. To disfellowship person na part of the arrangement wey Jehovah don make. Jehovah de  give correction because of love and na everybody de gain, even the person wey do the bad thing. (Read Hebrews 12:11.) Some people for congregation fit talk say the elders no make correct decision to disfellowship person. But remember say this kind people no de normally want talk some things about the person, so that other people no go see the person as bad person. The truth be say, we no know everything as e happen. So e good make we trust say the elders don do everything to judge for Jehovah and follow wetin Bible talk when they judge the matter.—2 Chron. 19:6.

12. Which better things some people don get because they support the arrangement wey Jehovah make to correct person wey do bad?

¹² When elders make decision to disfellowship your person and you support the decision, this one fit help the person come back to Jehovah. Elizabeth wey we talk about before talk say: “E really hard us as we no fit do anything with our son wey don grow. But after e come back to Jehovah, e talk say the decision wey they make to disfellowship-am, na better one. After, e talk say e learn many good things. For me, I don see say the way Jehovah de correct person na always the best.” E husband wey e name na Mark talk say: “After, our son tell me say part of the reason why e want come back that time, na because we do wetin we suppose do. I really glad say Jehovah help us make we obey.”

13. When something pain you, wetin fit help you cope?

¹³ Talk to friends wey understand how you de feel. Spend time with mature brothers and sisters wey fit help you make you no tire. (Prov. 12:25; 17:17) Joanna wey we talk about before talk say: “For my heart, I feel say na only me dey. But as I de talk to friends wey I trust, this one really help me.” But what if e be like say some people for congregation tell you things wey de make you feel bad more-more?

14. Why e dey important make we no tire to endure wetin person do us and to always forgive each other from our heart?

¹⁴ Dey patient with your brothers and sisters. We no go fit expect say everybody go talk correct thing everytime. (Jas. 3:2) All of us de make mistake. So, make e no surprise you if some people no know wetin to talk, or if they talk something wey pain you, even though say they no mean-am. Remember the advice wey apostle Paul give say: “Make wuna no tire to endure wetin wuna do each other and to always use wuna heart forgive each other, even if wuna get reason to complain about another person.” (Col. 3:13) One sister wey they disfellowship e family member talk say: “Jehovah help me forgive brothers wey try to encourage me but instead, they do wetin pain me.” Wetin congregation fit do to help faithful family members?

15. Wetin fit help family members wey they just disfellowship their person?

¹⁵ Dey kind and welcome the faithful family members well. One sister wey e name na  Miriam, talk say e really worry as e want go meeting after they disfellowship e brother. E say: “I fear about wetin people go talk. Plenty brothers and sisters dey wey still feel bad about wetin happen. But they no show say they get anything for mind against my brother. I really thank them say they no leave me when I dey inside pain.” Another sister talk say: “After they disfellowship our son, our dear friends come cool our heart. Some of them talk say they no know wetin they go talk. Some of them cry with me and some write letter to encourage me. The things wey they do really help me!”

16. How congregation fit continue to comfort and help people wey they disfellowship their family person?

¹⁶ Continue to support faithful family members. They need you to love and encourage them, especially now. (Heb. 10:24, 25) Sometimes, family members of people wey they disfellowship, don feel say some people for congregation no de talk to them again, like say they disfellowship them too. Make we no make them feel like that at all! We suppose praise and encourage young people wey their papa or mama don stop to serve Jehovah. Sister Maria wey they disfellowship e husband and wey e husband leave the family, talk say: “Some of my friends come my house and cook food, and help me study with my children. They feel my pain and they cry with me. They defend me when people talk things wey no correct about me. They really encourage me, no be small!”—Rom. 12:13, 15.

17. Wetin elders fit do to comfort people wey de feel pain?

¹⁷ Elders, make wuna use any chance wey wuna see to encourage family members of person wey they disfellowship. Wuna get the special work to comfort people wey their family members don leave Jehovah. (1 Thess. 5:14) Go meet them to encourage them before and after meeting. Visit them for their house and pray with them. Preach with them or invite them make they join you for family worship sometimes. Elders need to support people wey dey inside pain, and give them the care and love wey they need.—1 Thess. 2:7, 8.

18. As e dey for 2 Peter 3:9, wetin God want for sinners?

¹⁸ Jehovah “no want destroy anybody. Instead, e want make everybody repent.” (Read 2 Peter 3:9.) Even if person put hand for serious sin, God still value e life. Remember say, Jehovah use the life of e dear Son to pay high price for the life of sinners. Jehovah de sofri-sofri help this kind people to come back. E get the hope say they go choose to come back, as we see for the story wey Jesus talk, about the son wey make foolish decision. (Luke 15:11-32) Many people wey leave the truth come back after, to their Papa Jehovah wey love them. And the brothers and sisters really dey happy to welcome them back. Elizabeth wey we talk about before, over glad to see e pikin come back to Jehovah. E talk say, “I really glad say many people encourage us make we no stop to get hope.”

19. Why we fit continue to trust Jehovah?

¹⁹ We fit trust Jehovah everytime. E no de ever give us direction wey go put us for trouble. Jehovah na Papa wey get open hand and e de show pity. E get deep love for people wey love and de worship-am. Make you dey sure say Jehovah no go abandon you for your time of pain. (Heb. 13:5, 6) Mark wey we talk about before talk say, “Jehovah no ever abandon us. E de always help us when we de face problems.” Jehovah go continue to give you power wey pass your normal power. (2 Cor. 4:7) True-true, you fit continue to serve God well and de get hope, even when person wey you love leave Jehovah.