1. How Peter feel when Jesus use miracle help-am catch plenty fish?

 PETER de try to catch fish for the whole night, but e no catch anything. E surprise when Jesus tell-am say: “Move the boat go where the water deep, and make una throw una nets for there to catch fish.” (Luke 5:4) Peter no think say e go catch any fish, but e still do wetin Jesus talk. The fish wey Peter and im men catch plenty sotey their net start to tear. When them see this miracle wey Jesus do, them “surprise no be small.” Peter talk say: “Lord, comot from where I dey because I be sinner.” (Luke 5:6-9) E fit be say Peter think say im no reach to near Jesus.

2. Why e dey important for us to study Peter example?

² Wetin Peter talk na true, e “be sinner.” Bible show us say, sometimes, Peter talk or do somethings wey e later regret. This kind thing don happen to you before? You get bad character wey you de try to stop? If your answer na yes, apostle Peter example fit help you. How? Jehovah for fit do-am make them no write Peter mistakes for Bible. But, e allow them write-am so that we go learn from-am. (2 Tim. 3:16, 17) Apostle Peter just be like us, so when we read im story, we go see say Jehovah no expect say we no go make mistake. E want make we de do our best to continue to serve-am even though we fit make mistake.

3. Why e dey important make we no tire?

 ³ Why e dey important make we no tire? Because when we continue to do something, e go help us sabi do the thing. For example, if person want learn how to play guitar well, e go take-am long time to sabi-am. When e de learn-am, e go make plenty mistakes, but if e continue to do im best, e go sabi-am well-well. Even after e don sabi-am, e fit still make mistake. But e no go stop, so that e go sabi-am more-more. Na so e still be with us, even after we think say we don succeed to stop one bad character wey we get, we fit still do-am again by mistake. But we go continue to do our best to stop-am. Sometimes, all of us de talk or do something wey we fit later regret. But if we no tire to do our best to stop-am, Jehovah go help us fit succeed. (1 Pet. 5:10) Make we learn from Peter example. When we see how Jesus show-am pity when e make mistakes, this one go move us to continue to serve Jehovah.

4. How Peter describe imself for Luke 5:5-10, but wetin Jesus tell-am?

⁴ Bible no tell us why Peter talk say im na “sinner,” or the kind sins wey e commit. (Read Luke 5:5-10.) But e fit don make some serious mistakes. E fit be say na this one make-am de fear, and Jesus notice-am. Another thing be say, Jesus know say Peter fit continue to hold Jehovah tight. So Jesus tell-am say: “Make you no fear again.” Because Jesus trust Peter, e make Peter change im life. Later, Peter and im brother wey im name na Andrew leave their fisherman work and become Jesus disciple. This one bring plenty blessing to them.—Mark 1:16-18.

5. Which blessings Peter enjoy as e no allow the way e de feel about imself stop-am make e no follow Jesus?

⁵ Peter enjoy plenty blessing because e follow Jesus. E see as Jesus heal sick people, pursue demons comot from people body and even bring people wey don die back to life. b (Matt. 8:14-17; Mark 5:37, 41, 42) Another thing be say, e see vision of how Jesus go be when E don become King of God Kingdom and Peter no ever forget this one. (Mark 9:1-8; 2 Pet. 1:16-18) Peter for no enjoy this blessings if to say e no follow Jesus. Because Peter no allow the way e de feel about imself stop-am make e no follow Jesus, this one make-am enjoy plenty blessings.

6. Give some example wey show say Peter still make some mistakes even as e de follow Jesus.

 ⁶ Even with all the things wey Peter hear and see, e still make mistakes. Make we see some example. When Jesus de tell im disciples say e go suffer and die as them don write-am for Bible, Peter take-am go one corner and begin tell-am say make e no de talk like that. (Mark 8:31-33) Many times, Peter and the other apostles argue among theirself about who big pass. (Mark 9:33, 34) When people come arrest Jesus the night before e die, Peter attack one man and cut im ear comot. (John 18:10) That same night, Peter deny Jesus three times because e de fear. (Mark 14:66-72) This one make Peter cry well-well.—Matt. 26:75.

7. After Jehovah bring Jesus back to life, which chance Jesus give Peter?

⁷ Jesus no leave Peter even though say e make plenty mistake. After Jehovah bring Jesus back to life, Jesus give Peter chance to show im love for-am. E give Peter work to care for im sheep. (John 21:15-17) And Peter accept the work. And e dey among the first people wey receive holy spirit for Jerusalem for Pentecost for the year 33 C.E.

8. Which serious mistake Peter make for Antioch?

⁸ Even after Peter receive holy spirit, e still make mistakes. For 36 C.E, Peter dey there, when Cornelius wey no be Jew, receive holy spirit, and this one make-am clear say “God no de do partial” and say people wey no be Jew fit be part of the Christian congregation. (Acts 10:34, 44, 45) After this one, Peter start to chop with people wey no be Jew and this na something wey e never do before. (Gal. 2:12) But, some Christians wey be Jew feel say, Jew people no suppose chop with people wey no be Jew. When some Jew Christians wey de think like that come Antioch, Peter stop to chop with Christians wey no be Jew because e de fear wetin the Jew Christians fit think about-am. Apostle Paul see wetin Peter do and correct-am for front of other people. (Gal. 2:13, 14) Even with this mistake, Peter no stop to serve Jehovah. Wetin help-am?

9. How John 6:68, 69 show say Peter no leave Jesus?

⁹ Peter no allow anything stop-am make e no follow Jesus. For example, e get one time wey Jesus talk something wey im disciples no understand. (Read John 6:68, 69.) Instead make them wait make Jesus explain or ask Jesus to explain wetin e mean, many people stop to follow-am. But Peter no join them because e know say na only Jesus “de talk things wey go make person get life wey no go end.”

10. How Jesus show say e still trust Peter? (Still check the picture.)

¹⁰ Jesus no leave Peter. The night before them kill Jesus, e know say im disciples go run leave-am. But Jesus still tell Peter say e go come back and continue to hold Jehovah tight. (Luke 22:31, 32) Jesus know say “the spirit ready but body weak.” (Mark 14:38) So Jesus no lose hope for Peter even after e deny-am. After Jesus come back to life, e appear to Peter when Peter dey alone. (Mark 16:7; Luke 24:34; 1 Cor. 15:5) This one go don make Peter really happy again.

11. How Jesus help Peter know say Jehovah go care for-am?

¹¹ Jesus help Peter know say Jehovah go  care for-am. After Jesus come back to life, e use another miracle catch some fish for im disciples. (John 21:4-6) This one make Peter faith strong say Jehovah go care for-am. E fit be say this one make Peter remember wetin Jesus talk before say Jehovah go care for people wey “put the Kingdom. . . as the number one thing for [their] life.” (Matt. 6:33) This one make Peter fit put the preaching work as the number one thing for im life, instead of im fisherman work. E use strong mind preach for the day of Pentecost for 33 C.E and this one help many people become Christians. (Acts 2:14, 37-41) Later, e help people from Samaria and people wey no be Jew to become Christians. (Acts 8:14-17; 10:44-48) Jehovah use Peter help people from different-different place to become Christian.

12. How Peter example fit help us if we get bad character wey we de struggle to comot?

¹² Jehovah fit help us continue to de serve-am. E fit no easy for us especially if we don de struggle for long time to stop one bad character wey we get. Sometimes, we fit feel say our own strong pass Peter own. But Jehovah fit help us make we no tire. (Ps. 94:17-19) For example, before one brother learn the truth, e de sleep with other men for many years. But when e study Bible, e change im life and start to serve Jehovah. Even with this one, sometimes e still de struggle make e no do-am again. Wetin help-am make e no tire? E talk say: “Na Jehovah de give us power.” E still talk say: “With the help of Jehovah holy spirit . . . , I don learn say e dey possible to continue to serve Jehovah . . . Even though say I still de struggle because I no perfect, Jehovah de give me power to do things for im organization.”

13. How we fit copy the example of Peter for Acts 4:13, 29, 31? (Still check the picture.)

¹³ As we don see, no be one time Peter make mistake because e de fear people. But e beg Jehovah to help-am get strong mind and Jehovah really help-am. (Read Acts 4:13, 29, 31.) We too fit stop to de fear. Make we see wetin happen to Brother Horst when e still small for the time wey Nazi government de rule Germany. That time, them de force people for school to talk say: “Heil Hitler!” This one na greeting wey mean,  “na Hitler go save us.” Because Horst de fear, e pass one time wey e talk “Heil Hitler!” Im papa and mama no vex for-am but them pray with-am and beg Jehovah make e give-am strong mind. Im papa and mama really help-am, and because e trust Jehovah, e come get strong mind to fit do the correct thing. Later, e talk say, “Jehovah no ever leave me.” c

14. How elders fit encourage people wey their faith don weak?

¹⁴ Jehovah and Jesus no go leave us. After Peter don deny Jesus, wetin e go do? E go continue to be Jesus disciple, or e go stop? Jesus don pray to Jehovah before say make e help Peter make im faith no die. And e tell Peter about the prayer and let-am know say e trust-am say e go fit care for im brothers. (Luke 22:31, 32) Wetin Jesus talk go don really encourage Peter anytime wey e remember-am. Jehovah fit use elders for congregation help us when we want make important decision so that we go fit continue to worship Jehovah well. (Eph. 4:8, 11) Brother Paul, wey don be elder for long time de try to do this one. E de encourage brothers and sisters wey their faith don weak make them think about how Jehovah bring them to im organization. Then, e go tell them say Jehovah no go ever leave them because im love no de fail. E talk say: “I don see how Jehovah help many people wey their faith don weak to fit continue to serve-am.”

15. How the example of Peter and Brother Horst show say wetin Jehovah promise us for Matthew 6:33 na true?

¹⁵ Just as Jehovah care for Peter and the  other apostles, e go care for us and give us wetin we need, if we put the Kingdom as number one thing for our life. (Matt. 6:33) After World War II, Brother Horst wey we talk about before, start to de think about if e go fit be regular pioneer. But because e poor, e start to de doubt if e go fit care for imself if e become pioneer. Wetin e do? When circuit overseer visit their congregation, e decide say e go use the whole week preach and see if Jehovah go care for-am. For the end of the visit, circuit overseer give-am envelope wey money dey inside but e no tell-am who say make e give-am the money. The money fit care for-am for many months as e de pioneer. This one make-am dey sure say Jehovah go care for-am. Since that time, e continue to put God Kingdom first.—Mal. 3:10.

16. Why e good make we learn more about Peter and wetin e write for im two letters?

¹⁶ As Jesus no leave Peter, this one go don make-am happy. Jesus continue to train Peter to be better apostle and good example for all of us. And we fit learn plenty things from the training. Peter write some of the things wey e learn from Jesus for two letters wey e write to the congregations for im time, wey dey part of Bible today. We go talk about some of them and how we fit do wetin we learn from them for the next article.