1. Wetin our classmate or people wey we de work with fit ask us?

 HOW you de feel when your classmate or workmate ask you question about your belief? E de make you fear? This kind thing don happen to many of us. The question fit help us know wetin dey the person mind, wetin e believe and help us preach to-am. But sometimes, person fit ask question because e want argue with us. This one no suppose surprise us because people don tell them plenty lie about us. (Acts 28:22) Another thing be say we de live “for last days” when many people no de “want get any agreement with [other] people” and “really wicked.”—2 Tim. 3:1, 3.

2. Why e dey important to dey gentle?

² You fit de wonder, ‘How I fit dey gentle and kind when person ask question about my belief?’ Wetin go help you? Na to dey gentle for heart. Because e go help you dey calm when person talk wetin you no like or when you no know wetin to answer. (Prov. 16:32) Na true say e no easy to dey gentle. But wetin fit help you? How you fit answer person for good way when e ask question about your belief? And if you be papa or mama, how you fit help your pikin so that e fit answer for kind way when them ask-am question about im belief? We go answer this questions for this article.

3. Why we fit talk say when person dey gentle, e no mean say e dey weak? (2 Timothy 2:24, 25 ftn.)

³ To dey gentle no mean say person dey weak. Because weak person no fit dey calm when e de face problem. Gentle heart na one of the better character wey holy spirit de produce. (Gal. 5:22, 23) Sometimes, them de use the Greek word wey them translate as gentle heart to describe the way horse wey no get control de be after them don train-am to dey calm. The horse harsh well-well before, but now e dey calm. Even though say the horse dey calm now, e still get power. How we too fit dey gentle and still dey strong? The truth be say, we no go fit do-am by ourself. One thing wey go help us na to pray say make God give us holy spirit so that we go fit get this better character. And plenty people don succeed to dey gentle. For example, plenty of our brothers and sisters don show this character when people try to argue with them or make them vex. This one don help some people change the way them be de see Jehovah Witness people. (Read 2 Timothy 2:24, 25 ftn.) So wetin go help you fit dey gentle?

4. Wetin we fit learn from Isaac example as e dey gentle?

⁴ Bible get plenty example wey show why e dey important make we dey gentle. Isaac story na one of them. When e de stay for one Philistia city wey be Gerar, Philistia people for the area use sand-sand cover all the well wey im papa servants dig. Isaac no fight them, but e pack im family go far area and dig plenty other well for there. (Gen. 26:12-18) But the Philistia people for the area talk say na them get the water wey dey all the well. Even with this one, Isaac no still fight them. (Gen. 26:19-25) Wetin help-am dey calm? E learn from the way im papa wey be Abraham, de make peace and how im mama wey be Sarah “dey quiet and get cool mind.”—1 Pet. 3:4-6; Gen. 21:22-34.

5. Give example wey show say papa and mama go fit teach their children how to dey calm and gentle.

⁵ Papa and mama, make una know say una go fit teach una children how to dey calm and gentle. See the example of Brother Mark b wey dey 17 years. E de meet people wey de quick vex, for school and when e de preach. Im papa and mama sofri teach-am how to dey gentle. Them talk say: “Now, Mark don understand say na person wey dey strong de fit control imself when people try to make-am vex.” Brother Mark don learn how to dey calm when people no treat-am well.

6. How prayer fit help us to dey calm and gentle more-more?

⁶ Wetin we go do when person do wetin fit make us vex? For example when person talk bad about Jehovah or about wetin Bible de teach. Make we pray to Jehovah make e give us im spirit and sense so that we go fit dey calm when we de talk to the person. Wetin we go do if we notice later say the way we answer no good? We fit pray again about-am and think about how we go answer for the correct way another time. Then Jehovah go give us im holy spirit so that we go fit control ourself and dey gentle.

7. If we cram some Bible verse, how e fit help us dey calm when person provoke us? (Proverbs 15:1, 18)

⁷ Plenty Bible verse dey wey fit help us when e no easy for us to talk for calm way. Holy spirit fit help us remember this verse them. (John 14:26) For example, plenty advice dey the book of Proverbs wey fit help us dey calm and gentle. (Read Proverbs 15:1, 18.) E still tell us why e dey important to dey calm even  when e no easy for us to dey calm.—Prov. 10:19; 17:27; 21:23; 25:15.

8. Why e good make we try know wetin make person ask us question?

⁸ Another thing wey fit help us dey calm, na deep sense. (Prov. 19:11) Person wey get deep sense no de rush answer question wey them ask-am about im belief. Plenty times, before person ask question or talk something about our belief, e get plenty things for mind. But e fit no tell us the real reason why e ask or talk wetin e talk. So before we answer the person, e good make we remember say we fit no know wetin make-am ask the question.—Prov. 16:23.

9. How Gideon show say e get deep sense and dey calm when e de answer Ephraim people?

⁹ Make we see how Gideon answer Ephraim people. Them use vex ask-am why e no first call them to join-am fight Israel enemy them. Na this one really vex them? Or na because them de carry shoulder up? No matter their reason, Gideon show say e get deep sense as e try to understand why them de vex and sofri answer them. Wetin come happen? Bible tell us say the way Gideon talk to them make “their mind come down.”—Judg. 8:1-3.

10. Wetin we go do if person ask us why we dey different? (1 Peter 3:15)

 ¹⁰ Wetin we go do if our workmate or schoolmate ask us why we dey different? We go do our best to explain wetin we believe but we no go force-am to believe wetin we believe. (Read 1 Peter 3:15.) E good to see the question as chance to know wetin dey important to the person, instead to think say e de use the question find trouble. No matter wetin person get for mind wey make-am ask question, make we do our best to always dey calm and gentle when we de answer-am. The way we answer-am fit help-am change im mind about how e de feel. Even if e talk to us anyhow, make we dey calm when we de answer-am.—Rom. 12:17.

11-12. (a) Wetin we fit think about before we answer question wey person ask us? (Still check the picture.) (b) Give example of how we fit preach to person wey ask us question.

¹¹ For example, if your workmate ask you why Jehovah people no de celebrate birthday. Ask yourself wetin fit dey im mind. E de feel say we no de get time to enjoy ourself? Or e de worry say we fit make the people wey de work with us no de enjoy theirself? To make im mind come down we fit thank-am as e de think about other people, and let-am know say we too de think about other people. This one fit give una chance to discuss wetin Bible talk about birthday.

¹² We fit use the same way answer people wey talk bad about wetin we believe. Person for our school fit talk say make Jehovah Witness people change wetin them believe about marriage between man and man and between woman and woman. E talk-am because e no really understand wetin Jehovah Witness people believe about this matter? Or na because e get friend or family member wey de do this kind thing? Or e think say we hate people wey de live this kind life? We fit let-am know say we de show everybody love and say we no de make decision for people. c (1 Pet. 2:17) Then we fit explain to-am the gain wey dey when person follow wetin Bible talk.

13. How you go fit help person wey no believe say God dey?

¹³ When person talk say wetin we believe no correct, make we no just think say we know why e talk like that. (Titus 3:2) For example, what if your schoolmate talk say e no make sense to believe say God dey? You go just think say e talk like that because e belief say no be God make all things and say e know plenty things about wetin science people talk? E fit be say e just de talk wetin e hear from other people. Instead to rush start to talk about science matter, you fit give-am something wey go make-am think later. For example, you fit send-am link wey go carry-am go jw.org where e fit read about how God make things. E fit later want discuss wetin e read or video wey e watch for jw.org. When we respect people like this, e fit make them want learn more from Bible.

14. How Brother Nathan use our website to show im classmate say wetin e believe about Jehovah Witness people no be true?

¹⁴ One young brother wey im name na Nathan use our website to show say wetin some people believe about Jehovah Witness people no be true. E talk say: “My classmate de always tell me say I no believe science people because I trust Bible wey na just story-story full inside.” When Brother Nathan classmate no allow-am explain im belief, e tell-am make  e go read wetin dey jw.org for the part wey be “Science and Bible.” After, e notice say im classmate don read-am and now e gree to talk about how life take start. You too fit get this kind result.

15. How papa and mama fit teach their children to use cool mind answer their schoolmate wey talk bad about their belief?

¹⁵ Papa and mama go fit teach their children how to dey calm when them de answer person wey ask question or talk bad about their belief. (Jas. 3:13) Some papa and mama de use family worship to practice how their children fit do this one. How them de do-am? Them go choose some question wey person fit ask them for school, discuss-am, and practice how them fit use cool mind answer.—Check the box “ If You Practice With Your Family, E Fit Help Them.”

16-17. When family de practice together, how e fit help young people?

¹⁶ When family practice together, e go help their children dey sure say wetin them believe correct and them go fit explain-am well to other people. To fit do this one, them fit use “worksheets for teenagers” wey be part of “Young People Ask” for jw.org (for English). This one go help them really dey sure of wetin them believe, and fit answer people well from their heart. And if family study-am together, e go help them dey calm when them de defend wetin them believe.

¹⁷ One young brother wey im name na Matthew explain how the practice wey them de do for their family worship don help-am. For their family worship, them de do research about some question wey people for im class fit ask. E talk say: “We go think about question wey them fit ask, then we go use wetin we  learn from the research to practice how to answer the question. When I really understand why I believe something, I no de fear and this one de make me dey calm when I de explain-am.”

18. How Colossians 4:6 say make we de answer people?

¹⁸ The truth be say even when we explain our belief well to some people, them no go still want believe. But when we sofri explain wetin we believe, e fit help. (Read Colossians 4:6.) When we de explain our belief to person, e just be like say we throw something give the person. We fit sofri throw-am or use force. When we sofri throw-am, the person go fit catch-am and still sofri throw-am back to us. Na so e still be, if we sofri explain our belief to people, e go make them want listen. But if person want argue or laugh us for wetin we believe, we no need to waste our time with-am. (Prov. 26:4) Plenty people no go behave like this, instead them go listen to us.

19. Why we need to dey calm when we de explain our belief to people?

¹⁹ E dey clear say e really dey important to dey calm and gentle. So beg Jehovah make e help you dey calm when you de answer question or when person talk bad about our belief. No forget say if you dey calm and gentle, e go help you no argue with person wey no agree with your belief. If we dey calm when we de answer people and show say we respect them, e fit help them change the way them de feel about us and our belief. Make we “always ready to answer anybody wey ask [us] question” about our belief, but we go “do-am with cool mind and deep respect.” (1 Pet. 3:15) Continue to show say you dey calm and this one go show say you dey strong!