1. Which big work Jehoash, Uzziah, and Josiah get when them dey young and why this one no easy for them?

 JUST think-am say them make you king for Israel when you still be boy! How you go use your power? Bible tell us about some young people wey become king for Judah. For example, Jehoash dey seven years when e become king for Judah, Uzziah dey 16 years, and Josiah dey eight years. E no go really easy for them. No matter how the work big reach, Jehovah give them the help wey them need.

2. Why e dey important make we learn from the example of Jehoash, Uzziah, and Josiah?

² Even though say you no be king or queen, you go fit learn better lesson from Jehoash, Uzziah, and Josiah. Them make good decisions and them still make bad ones. Their example go help us see why we need to choose better friends, de carry body down, and continue to make Jehovah happy.

3. How the training wey High Priest Jehoiada give King Jehoash help-am?

³ Copy Jehoash better decisions. When King Jehoash dey young, e make better decision. As e no get papa, e follow wetin High Priest Jehoiada teach-am. Jehoiada na better servant of Jehovah and e teach Jehoash like say na im own pikin. Because of this one, Jehoash worship Jehovah well and e help other people do the same thing. Even self, e make sure say them repair Jehovah temple.—2 Chron. 24:1, 2, 4, 13, 14.

4. How we de gain when we love and obey wetin Jehovah de teach us? (Proverbs 2:1, 10-12)

 ⁴ If you get person wey de teach you to love Jehovah and follow im advice, make you value-am. (Read Proverbs 2:1, 10-12.) Your papa and mama fit use different-different way train you. One sister wey im name na Katya really gain from the way im papa train-am. Every day, as im papa de carry-am go school, them go de talk about wetin them learn from daily text. Sister Katya talk say: “Wetin we de discuss de help me fit do the correct things.” What if you de feel say wetin you de learn from Bible no de make you live life the way you want? Wetin go help you fit do wetin you learn? One sister wey im name na Anastasia talk say e remember say im papa and mama de take time explain to-am why them say make e no do some things. E talk say, “This one help me understand say wetin them tell me say make I no do na to protect me no be to control my life.”

5. How your papa and mama and Jehovah go feel when you de follow wetin you de learn from Bible? (Proverbs 22:6; 23:15, 24, 25)

⁵ When you follow wetin you de learn from Bible, e go make your papa and mama happy. But wetin dey important pass be say you go make Jehovah happy and be im friend. (Read Proverbs 22:6; 23:15, 24, 25.) This one na better reason to copy Jehoash good example when e dey young.

6. Which kind people advice Jehoash start to listen to, and wetin happen to-am? (2 Chronicles 24:17, 18)

⁶ Learn from the bad decision wey Jehoash make. After High Priest Jehoiada die, Jehoash start to follow bad friends. (Read 2 Chronicles 24:17, 18.) E decide to de take advice from the prince them for Judah wey no de worship Jehovah. Jehoash suppose run from this kind people. (Prov. 1:10) Instead, e listen to their bad advice. Even when im cousin wey be Zechariah try to correct-am, e say make them kill-am. (2 Chron. 24:20, 21; Matt. 23:35) This one really bad! Jehoash serve Jehovah well when e dey young, but later, e turn against Jehovah and kill im cousin wey be Jehovah prophet. For the end, na im own servants kill-am. (2 Chron. 24:22-25) If to say e continue to worship Jehovah well and de listen to people wey love Jehovah, im life for no end like that. Wetin you learn from Jehoash bad example?

7. Which kind people you suppose choose as your friends? (Still check the picture.)

⁷ One lesson wey we learn from the bad  decision wey Jehoash make be say we need to choose friends wey go help us love Jehovah. To fit get this kind friend, no be only people wey be our age we go make friends with. Remember say Jehoiada wey help Jehoash worship Jehovah well when e dey young senior Jehoash well-well. To know if na better friends you get, ask yourself this questions: ‘Them de help me make my faith strong more-more? Them de help me to fit follow wetin Bible talk? Them de talk about Jehovah and the things wey we de learn from Bible? Them de follow wetin Bible talk? Them go fit correct me when I make mistake or na wetin I like to hear them de tell me?’ (Prov. 27:5, 6, 17) The truth be say, if your friends no de worship Jehovah, you no need them. But if your friends de worship Jehovah and love-am well-well, make you hold them tight, because them go always help you.—Prov. 13:20.

8. If you de use Internet, wetin you need to put for mind?

⁸ For this our time, e dey easy to use Internet talk to family and friends. But plenty people de use-am boast about theirself. Them de use-am show picture and video of wetin them buy or wetin them do. If you de post things for Internet, ask yourself say: ‘I de post things for Internet just to boast about wetin I get? I want use-am encourage people or I want make them praise me? I de allow wetin people de put for Internet affect the way I de think, talk and do things?’ Brother Nathan Knorr wey serve as Governing Body member talk say: “No put mind say you want make everybody like you, because you no go fit make everybody like you. But do wetin go make Jehovah happy and everybody wey love Jehovah go like you.”

9. Wetin Jehovah help King Uzziah to fit do? (2 Chronicles 26:1-5)

⁹ Copy Uzziah better decisions. When King Uzziah dey young, e carry body down. E show say e “fear the true God.” E live for 68 years, and Jehovah bless-am for most of the years wey e live. (Read 2 Chronicles 26:1-5.) Uzziah win plenty war and e make sure say no enemy fit enter Jerusalem. (2 Chron. 26:6-15) E really happy for all the things wey Jehovah help-am fit do.—Eccl. 3:12, 13.

10. Wetin happen to King Uzziah?

¹⁰ Learn from the bad decision wey Uzziah make. As king, na Uzziah de tell people wetin them go do. E fit be say this one make-am think say e fit do anything wey e want. One day, King Uzziah enter temple, and start to burn incense ontop altar. This one na over sabi because na priest work. (2 Chron. 26:16-18) High Priest Azariah try to correct-am, but e vex for-am well-well. Wetin e do spoil all the good things wey e don do before and Jehovah make leprosy catch-am. (2 Chron. 26:19-21) If to say e continue to carry body down, im life for no end like that.

11. Wetin fit show say we de carry body down? (Still check the picture.)

¹¹ As Uzziah win plenty war, e forget say na Jehovah help-am and give-am all the things wey e get. This one teach us say make we always remember say na Jehovah give us everything wey we de enjoy for our life and for e organization. Instead to de carry shoulder up because of wetin we don do, make we de praise Jehovah because na im help us. b (1 Cor. 4:7) We need to always remember say  we de make mistake and we need correction. One brother wey dey around 60 years talk say: “I no de vex when person tell me say I don make mistake. And when I receive strong correction for my mistake, I go try correct myself and give Jehovah my best.” The truth be say when we de fear Jehovah and continue to carry body down, our life go end well.—Prov. 22:4.

12. When Josiah still dey young, how e start to near Jehovah more-more? (2 Chronicles 34:1-3)

¹² Copy Josiah better decisions. Josiah dey 16 years when e start to near Jehovah more-more. Na that time e learn more about Jehovah and how e fit do wetin go make Jehovah happy. But things no easy for-am because e still dey young. That time, plenty people de worship other gods, so Josiah need to get strong mind to fit stop them. And Jehovah help-am to fit do-am. And before e reach 20 years, e start to remove the lie-lie gods wey the people de worship.—Read 2 Chronicles 34:1-3.

13. When you give your life to Jehovah, how e go affect your life?

¹³ How you fit copy Josiah example when you de young? Learn more about Jehovah and im better-better character. This one go move you to give your life to Jehovah. And how e go take affect your life? One young brother wey im name na Luke wey baptize when e dey 14 years talk say: “From the day I give my life to Jehovah, I know say to worship Jehovah go be the number one thing for my life, and I go do my best to make-am happy.” (Mark 12:30) Jehovah go bless you well-well if na the same thing dey your mind.

14. Give example of how some young people de copy Josiah example.

¹⁴ Which problem you de face as young person wey de worship Jehovah? Brother Johan wey baptize when e dey 12 years, talk about how im classmates try force-am to smoke electric cigar wey them de call vape. Brother Johan talk say wetin help-am no join them smoke be say e think about how the cigar go affect im health and im friendship with Jehovah. Sister Rachel wey baptize when e dey  14 years explain wetin de help-am fit handle the problem wey e de face for school. E talk say: “I de try to connect anything wey de happen to wetin Bible talk. For example, if I dey class and them de teach things wey don happen many years ago, I go try connect-am to one story for Bible or wetin Bible talk say go happen. Or when I de talk with somebody for school, I de think about Bible verse wey I go discuss with the person.” The problem wey you de face fit no be the same with the ones wey King Josiah face, but you go fit hold Jehovah tight and show say you get sense like Josiah. The way you de handle problem now go help you fit handle other problem wey fit come for future.

15. Wetin help Josiah fit worship Jehovah well? (2 Chronicles 34:14, 18-21)

¹⁵ When King Josiah dey 26 years, e start to repair the temple. When them de repair the temple, them see “the book of the Law wey Jehovah use Moses give Israel people.” When them read-am to Josiah, e really touch-am, and e make up im mind to do wetin the law talk. (Read 2 Chronicles 34:14, 18-21.) You go like to de read Bible everyday? If you de try to read-am everyday, how e de go? You de mark the verse them wey really touch you? Brother Luke wey we don first talk about, get jotter wey e take de write wetin e learn from im Bible reading. If you do like this, e go help you fit remember some verse, or things wey you learn from your Bible reading. The more you de learn from Bible and love-am, the more you go like to serve Jehovah. And just as God Word help Josiah, na so Bible go help you.

16. Why Josiah make serious mistake, and wetin we fit learn from-am?

¹⁶ Learn from the bad decision wey Josiah make. When Josiah dey around 39 years, e make one serious mistake wey kill-am. Instead to ask Jehovah, e use over sabi do wetin e no suppose do. (2 Chron. 35:20-25) This  one teach us serious lesson. No matter how many years we don de study Bible or how many years we dey, we need to continue to follow wetin Jehovah talk. To fit do this one, we need to de always pray make Jehovah direct us, study Bible, and de follow the advice of people wey de worship Jehovah well. This one fit help us no make serious mistake, and we go de happy more-more.—Jas. 1:25.

17. Wetin we don learn from the three kings of Judah?

¹⁷ As you dey young, you fit do plenty things for Jehovah organization. The story of Jehoash, Uzziah, and Josiah show say young people fit make better decisions and make Jehovah happy. Na true say this three kings make some mistakes wey affect them. But if you copy their better decision and run from their mistake, you go really happy.

18. Which examples for Bible show say you fit get happy life? (Still check the picture.)

¹⁸ Bible still get many other young people wey worship Jehovah well and enjoy better life. David na one of them. When e dey young, e start to worship Jehovah, and later e become better king. Na true say e make some serious mistake, but Jehovah still see David as person wey hold-am tight. (1 Ki. 3:6; 9:4, 5; 14:8) If you study about David example, e go help you fit serve Jehovah well. Or e fit be say na Mark or Timothy example you go like study about. You go see say, them start to serve Jehovah when them dey young and them continue to the end of their life. This one make Jehovah happy and them happy too.

19. Which kind life you fit get?

¹⁹ Wetin you use your life do now, go affect how your life go be tomorrow. If you trust Jehovah and no de do wetin you think say correct, you go fit make better decisions. (Prov. 20:24) You fit get happy life. Remember say Jehovah value everything wey you de do to worship-am. To serve Jehovah na the best way wey you fit use your life.