As you de prepare for your personal study, e good make you ask yourself say, ‘Wetin I go learn for this study?’ But you need to dey careful so that wetin you de hope to learn no go make you miss the new things wey Jehovah want make you learn. How you fit put mind for the things wey Jehovah want make you learn from your study?

Pray make Jehovah give you sense. Beg-am make e help you fit understand the things wey e want make you learn from the personal study. (Jas. 1:5) No put mind only for wetin you don know before.—Prov. 3:5, 6.

Allow wetin you learn from Bible to de work for your life. “The word of God dey alive.” (Heb. 4:12) So anytime wey you read Bible, you go fit learn new thing and e fit help you for different-different area for your life. You go only fit gain like this if you really believe say you need to learn wetin Jehovah de teach you.

Show say you value everything wey Jehovah de teach us. Everything wey Jehovah organization de give us just be like plenty better-better food wey them don arrange for us. (Isa. 25:6) Make you no run from topic wey you feel say you no go enjoy or gain from. When you read-am, e mean say you de allow Jehovah help you to become better person, and you go really enjoy to study-am!