We no get any reason to think say because the 70 disciples no dey around when Jesus do the first Memorial, e mean say them no qualify to dey with Jesus or say them don abandon-am. Jesus just want dey with im apostles for this occasion.

The truth be say the 12 and the 70, na Jesus disciples. Jesus choose 12 men from many disciples wey e get, and e call them apostles. (Luke 6:​12-16) Jesus dey Galilee when “e call the 12” and “e send them comot to preach about the Kingdom of God and to heal people.” (Luke 9:​1-6) After, for Judea, Jesus “choose 70 other people and send them comot two by two.” (Luke 9:51; 10:1) So Jesus get plenty disciples for different-different area wey de preach about-am.

Jew people wey don become Jesus disciples de do the Passover every year, and e fit be say them de do-am together with their family people. (Ex. 12:​6-11, 17-20) Small time before them kill Jesus, Jesus and im apostles go Jerusalem. But e no call all im disciples from Judea, Galilee, and Perea to come celebrate the Passover together with-am. E clear say Jesus just want dey with only im apostles for this time. E tell them say: “I really want chop this Passover with una before I suffer.”—Luke 22:15.

Jesus get reason why e do like that. E go soon die as “the Lamb of God, wey de carry sin of the world comot.” (John 1:29) And this one go happen for Jerusalem, where God people don de do sacrifice to God tey-tey. The Passover lamb de remind Israel people say Jehovah save them from Egypt. But the sacrifice of Jesus go bring freedom wey pass that one. E go free people from sin and death. (1 Cor. 5:7, 8) Jesus sacrifice go make-am possible for the 12 apostles to become the foundation of the Christian congregation. (Eph. 2:​20-22) And e good to remember say the holy city wey be Jerusalem, get “12 foundation stones,” and them write ontop the stones, “the 12 names of the 12 apostles of the Lamb.” (Rev. 21:​10-14) Yes, the 12 apostles get important work to do to make wetin God get for mind happen. So, we fit understand why Jesus choose to do the last Passover and the first Memorial with only the 12 apostles.

So the 70 and the other disciples no dey with Jesus for that last Passover. Even with that one, all Jesus disciples wey hold Jehovah tight, go gain from wetin Jesus start that night—the Memorial of im death. And any of the 70 disciples wey later become anointed Christian, go be part of the same agreement wey Jesus make with the apostles that night to be part of im Kingdom.—Luke 22:​29, 30.