PLENTY people know the story of how they hang Jesus for pole with two thief for e two sides. (Matt. 27:35-38) But some people no believe the thing wey Bible talk say, they prepare Jesus body for burial before they put-am inside tomb.—Mark 15:42-46.

Some people no believe the story of Jesus wey they write for Bible. They no agree say they go fit give people wey they hang for pole normal burial, like to bury the person inside tomb. Instead, they believe say e fit no be so they bury them that time. One person wey de write news wey e name na Ariel Sabar explain why some people de feel like that. E write for Smithsonian magazine say: “To hang person for pole na punishment wey them de give people wey really do bad things. And some people wey really go school well talk say e no go make sense at all to think say Rome people go don honor this kind people and give them better burial.” Rome people really want disgrace thief that time. So many times, them de leave their dead body for pole for bush animals to chop. And after, them de gather the remaining part of the dead body and throw-am put for ordinary grave.

People wey de use the things wey they dig come out from ground to study the history of people, don talk something about the dead body of some Jew people wey they kill that time. The things wey they talk dey different from the things wey people believe. For 1968, they see the remaining bones of one man wey they kill around the time wey Jesus dey this earth. They see this bones for one Jew people tomb wey dey near Jerusalem. They keep the bones for one box wey them de put bones of dead people. One heel bone dey part of the bones wey they see. They nail the heel bone for one wood. The nail wey they use long reach 11.5 centimeter (4.5 in.). Sabar talk say: “Na one man wey e name na Yehochanan get the heel bone wey they see.” E still talk say: “This one don show-am clear say the thing wey Bible talk about Jesus Christ, say they bury-am for tomb, fit be true.” So, e clear say, Yehochanan heel bone wey they see na example of person wey they hang for pole for Jesus time, and wey Rome people allow to get normal burial.

Some people talk different-different thing about how they hang Jesus for pole because of the thing wey the heel bone of Yehochanan show. But one thing wey dey clear be say, they give some thief them wey they hang for pole normal burial, no be say they just throway them. True-true, the thing wey Bible talk say they bury Jesus for tomb dey correct. This thing wey they see support wetin Bible talk say, they prepare Jesus body for burial and put-am inside one tomb.

And the number one important thing be say, Jehovah be don talk say they go bury Jesus for one rich man tomb. And na so e happen, because nothing fit stop this thing wey God don talk make e no happen.—Isa. 53:9; 55:11.