1. Which hope Jehovah don give us?

 JEHOVAH don give us the hope to live forever, and this hope dey wonderful! Some people get the hope to live forever for heaven as spirit wey no fit die. (1 Cor. 15:50, 53) But plenty other people get the hope to live forever for this earth with better body wey no get sin, and they go dey happy forever. (Rev. 21:3, 4) Whether we de wait for the time wey we go live forever for heaven or for earth, the hope wey we get really dey important to us.

2. Why we really dey sure of the hope wey we get?

² The word wey they translate as “hope” for Bible mean “to expect say good things go happen.” We really dey sure say the hope wey we get about the future go happen because this hope na from Jehovah. (Rom. 15:13) We know the things wey e don promise, and we know say e de always do the things wey e promise. (Num. 23:19) We really dey sure say Jehovah want do everything wey e talk say e go do, and e get the power to do-am. So, the hope wey we get no come from wetin we just think for head or wetin we want make e happen. But our hope come from something wey we know say e dey real.

3. Wetin we go talk about for this article? (Psalm 27:14)

³ Our Papa for heaven love us and e want make we trust-am. (Read Psalm 27:14.) When our hope for Jehovah dey strong, we go fit endure problems and get strong heart and joy no matter wetin we de face. Make we talk about how our hope de protect us. We go first talk about how hope be like anchor and helmet. After that one, we go talk about how we fit make our hope strong.

4. How hope be like anchor? (Hebrews 6:19)

⁴ For the letter wey apostle Paul write to the Hebrew Christians, e talk say our hope be like anchor. (Read Hebrews 6:19.) Paul de travel for sea plenty times. So, e know say them de use anchor to hold ship make wind no carry-am go. One time, Paul dey for ship as passenger when one strong wind start to blow with heavy rain. When the breeze de blow, e see the people wey de control the ship de throw anchors inside the water so that breeze no go blow the ship go nack rock. (Acts 27:29, 39-41) Just the way anchor de hold ship make wind no blow-am comot, our hope de make us dey close to Jehovah so that our problems wey be like strong wind with heavy rain no go fit blow us comot from Jehovah side. Our strong hope de make us dey calm when we de face problems because we believe say things go better. No forget say Jesus warn us say people go suffer us. (John 15:20) So when we de think deep about the things wey Jehovah don promise us, this one go help us to continue to serve Jehovah well.

5. How hope help Jesus to dey strong when e de face death?

⁵ Think about how hope help Jesus to continue to dey faithful even though say e know say e go suffer and die. For the day of Pentecost 33 C.E., apostle Peter quote something from the book of Psalm wey talk about wetin go happen. This thing wey e quote explain how Jesus dey calm and e no fear. The thing wey Peter quote na: “I go get hope; because you no go leave me for Grave, and you no go allow the body of person wey hold you tight to rotten. . . . You go make me get plenty joy for your front.” (Acts 2:25-28; Ps. 16:8-11) Even as Jesus know say e go die, e get the strong hope say God go bring-am back to life and say e go dey happy to dey with e Papa for heaven again.—Heb. 12:2, 3.

6. Wetin one brother talk about hope?

⁶ The hope wey we get as Christians don help plenty of our brothers and sisters to endure. Make we see the example of one faithful brother wey e name na Leonard Chinn. This brother de live for England. For First World War, they put this brother for prison because e no gree join army. For two months, they lock this brother for place wey e dey alone. After that one, they force the brother to do work wey really hard. The brother write after say: “The things wey happen to me make me know say hope really dey important for us to endure. We get the example of Jesus, the apostles, the prophets, and the better-better promise for inside Bible. Na all this one de make our hope for the future dey strong and de give us power to endure.” Hope be like anchor for Leonard, and e fit be like anchor for us too.

7. How problem de make our hope strong? (Romans 5:3-5; James 1:12)

⁷ When we endure problems and we see how Jehovah de help us, this one de make us know say Jehovah dey happy with us. And this one de make our hope de strong more-more. (Read Romans 5:3-5; James 1:12.) So now, our hope don strong pass when we first accept the good news. Satan want make our problems swallow us. But Jehovah go help us endure each of the problem well.

8. How hope be like helmet? (1 Thessalonians 5:8)

⁸ Bible still show say our hope be like helmet. (Read 1 Thessalonians 5:8.) Soldier de wear helmet to protect e head when e de fight. As we de fight to protect our friendship with  Jehovah, we need to protect our mind from the things wey Satan de use attack us. E de use many different things tempt us and spoil the way we de think. Just the way helmet de protect soldier head, our hope de protect the way we de think so that we go fit continue to serve Jehovah well.

9. Wetin de happen to people if they no get hope?

⁹ The hope wey we get say we go live forever go help us make decision with sense. But if our hope weak, and we start to think only about the things wey our body want, we fit no put mind again for the hope wey we get to live forever. Make we see the example of some Christians wey de live for Corinth for the time of the apostles. They stop to get faith for one important thing wey God promise, wey be the hope wey we get say people wey don die go come back to life. (1 Cor. 15:12) Paul write say people wey no believe say people wey don die go come back to life, de only use their life do the things wey their body want. (1 Cor. 15:32) Today, many people wey no get hope for the things wey God don promise, de do everything wey they fit do to enjoy their life now, as they fit. But we no be like them because we trust the things wey God don promise say go happen for future. Our hope be like helmet wey de protect our mind and e de help us make we no de think only about ourself, because this one fit spoil our friendship with Jehovah.—1 Cor. 15:33, 34.

10. How hope fit protect us from things wey fit spoil the way we de think?

¹⁰ Our hope fit still protect us make we no de think say we no go fit ever do wetin go make Jehovah glad. For example, some people fit think say: ‘I no go fit ever be part of the people wey go live forever. I no good reach the kind people wey go live forever. I no go fit ever do the things wey God want make I do.’ Remember say Eliphaz wey pretend to be person wey come comfort Job, tell Job something like that too. Eliphaz talk say: “Who man be wey go fit dey clean?” And e still talk about God say: “See! E no believe e holy ones, and even heaven no dey clean for e eye.” (Job 15:14, 15) All this ones na big lie! Remember say na Satan want make you de think like that. E know say if you continue to think like that your hope go start to weak. Instead, make you reject all this kind lie-lie and put mind for the things wey Jehovah don promise. Make you believe say God want make you live forever, and say e go help you to succeed for this one. No ever doubt that one.—1 Tim. 2:3, 4.

11. Why we need to dey patient as we de wait for the things wey God don promise?

¹¹ E no de always easy to make our hope strong. We fit stop to dey patient as we de wait for God to do the things wey e don promise. But because Jehovah de live forever, wetin be like long time for our eye, na short time for e eye. (2 Pet. 3:8, 9) E go do the things wey e don promise for the best way, but e fit no do-am when we expect make e do-am. Wetin fit help us continue to make our hope strong as we de sofri wait for God to do the things wey e don promise?—Jas. 5:7, 8.

12. As e dey for Hebrews 11:1, 6, how hope connect with faith?

¹² We go continue to make our hope strong if we no stop to dey close to Jehovah because na Jehovah go fit do the things wey we hope for. If we want get hope, we must get faith say Jehovah dey and say, “E de bless the people wey de use all their heart look for-am.” (Read Hebrews 11:1, 6.) The more Jehovah dey real to us, the more we go trust say e go do all the  things wey e don promise. Make we talk about things wey we fit do to make our friendship with Jehovah dey strong so that our hope go still continue to dey strong.

13. How we fit dey tight with God?

¹³ Pray to Jehovah, and read e Word. Even as we no fit see Jehovah, we fit be e tight friend. We fit talk to God for prayer and trust say e go listen to us. (Jer. 29:11, 12) We fit listen to God when we de read e Word and de think deep about wetin we read. As we de read about how Jehovah care for e faithful servants for past, our hope go de strong more-more. Everything wey they write for Bible “na to teach us, so that as we de endure and de get comfort from Scriptures, we fit get hope.”—Rom. 15:4.

14. Why we need to think about the things wey Jehovah don do for other people?

¹⁴ Think deep about how Jehovah don do the things wey e promise. Make we talk about wetin God do for Abraham and Sarah. They don too old to born pikin. Even with that one, God promise them say they go born pikin. (Gen. 18:10) How Abraham feel about this promise? Bible talk say: “E believe say e go become papa of many nation.” (Rom. 4:18) Even though say Abraham condition be like say hope no dey, Abraham still trust say Jehovah go do the things wey e don promise. And Jehovah no fail Abraham for the faith wey e get. (Rom. 4:19-21) This kind example de teach us say we fit trust Jehovah everytime to do the things wey e don promise, even though say for our eye the condition fit be like say hope no dey.

15. Why we need to think about the things wey God don do for us?

¹⁵ Think about wetin Jehovah don do for you. Think about how you don already gain from  the things wey Jehovah don promise for Bible wey don happen. For example, Jesus promise say e Papa go give you the things wey you need to survive. (Matt. 6:32, 33) Jesus don still promise you say Jehovah go give you holy spirit when you pray for the spirit. (Luke 11:13) Jehovah don do all this things. Maybe you fit think of other promise too wey Jehovah don do for you. For example, e promise say e go forgive you, e go give you comfort, and e go give you the things wey you need to be e tight friend. (Matt. 6:14; 24:45; 2 Cor. 1:3) When you think deep about the things wey God don already do for you, this one go make your hope strong more-more for the things wey e say e go do for you for future.

16. Why hope na really important gift wey we no suppose play with?

¹⁶ The hope wey we get to live forever na really important gift from God wey we no suppose play with at all. We de hope to get the better things wey we go enjoy for future and we really dey sure say this one go happen. Our hope be like anchor. E de make us dey close to Jehovah so that we go fit endure our problems, we fit stand well when people de give us trouble, and we no go even fear to die. E be like helmet, e de protect the way we de think so that we fit reject things wey no correct and do the things wey correct. This hope wey Bible talk about de help us near God more-more, and e de show us say the love wey God get for us really strong no be small. We de really gain as we continue to do wetin go make our hope dey clear and strong.

17. Why our hope de make us happy?

¹⁷ Apostle Paul encourage the Christians for Rome for the letter wey e write to them. E talk say: “Dey happy because you get hope.” (Rom. 12:12) Paul dey happy because e dey sure say if e continue to dey faithful, e go get life wey no go end for heaven. Our hope fit make us dey happy too because we dey sure say Jehovah go do the things wey e don promise. Bible talk say: “Any person wey . . . get hope for Jehovah e God go dey happy, . . . the Person wey always dey faithful.”—Ps. 146:5, 6.