1. Wetin plenty people de do about the correct advice wey Bible de give? (Proverbs 1:20, 21)

 FOR many countries, we de always see our brothers and sisters de stand for place wey plenty people de pass. Them de smile and de give people our book them to read. You don ever preach like that before? If yes, then this one fit don make you think of wetin the book of Proverbs talk, about correct sense wey de shout call people for open place so that they go fit follow e advice. (Read Proverbs 1:20, 21.) “Correct sense” dey for inside Bible and our book them, and na Jehovah get this sense. Na this kind sense people need so that they go fit get life wey no go end. We de really happy when person collect one of our book them. But no be everybody de gree collect-am. Some people no want learn wetin dey inside Bible. Other people de laugh us as them de waka pass. Them de think say Bible no fit help us because e don too old. But other people de talk bad about wetin Bible de teach about how to live clean life because they feel say people wey de follow-am dey harsh and de feel say na them better pass other people. Even with that one, Jehovah don continue to give everybody correct sense because of the love wey e get. How e de do this one?

2. Where people fit see correct sense today, but wetin plenty people decide to do?

² Bible na one way wey Jehovah de use help people get correct sense. Almost everybody get Bible. What about our book them wey de explain Bible? We thank Jehovah say e make-am dey possible for us to get this book them for language wey pass 1,000. People wey de read them and obey wetin they learn go gain. But plenty people don decide say they no want listen to  correct sense. When they want decide something, them de like to trust theirself or de listen to other people. They fit even de look us as nothing because we don decide say na Bible we go de follow. This article go talk about why people de do like that. But make we first talk about how we fit get correct sense from Jehovah.

3. Wetin we need to do to get correct sense?

³ Person get sense when e de use wetin e know to make better decision. But to get correct sense pass that one. Bible talk say: “To fear Jehovah na the start of sense, and to know the Person Wey Holy Pass mean to understand.” (Prov. 9:10) So when we get important decision to make, we need to find out wetin Jehovah think about-am. This one go show say we “know the Person Wey Holy Pass.” We fit do this one when we de study Bible and our book them. When we do like that we de show say we get correct sense.—Prov. 2:5-7.

4. Why e be say na Jehovah be the only Person wey fit give us correct sense?

⁴ Jehovah na the only Person wey fit give us correct sense. (Rom. 16:27) Why we fit talk say correct sense de Come From Jehovah? Number one, na Jehovah make everything, and e know everything about the things wey e don make. (Ps. 104:24) Number two, everything wey Jehovah de do de show the kind sense wey e get. (Rom. 11:33) Number three, people de always gain when they follow the better advice wey Jehovah de give. (Prov. 2:10-12) If we want really get correct sense, then we must accept this three main truth wey we don talk for here and allow them to help us when we de make decision and for the things wey we de do.

5. Wetin de happen when people no want gree say na only Jehovah de give correct sense?

⁵ Plenty people for the world gree say the fine-fine things wey dey for this earth really dey wonderful. But this same people no gree say God dey wey make this things. Other people believe say God dey, but this people feel say the thing wey Bible de teach no fit help them because e don too old, and they don decide to live their life the way they want. Wetin don happen because of all this one? The world don better because people de trust their own sense instead of the one wey God de give? They don really dey happy or get better hope for future? The things wey we de see around us de make us believe wetin Bible talk when e say: “No sense, or understanding, or advice good if e dey against Jehovah.” (Prov. 21:30) The thing wey that verse talk de move us to continue to beg Jehovah make e give us correct sense! But e really pain us say plenty people no want do like that. Why?

6. As e dey for Proverbs 1:22-25, which people no want listen to correct sense?

⁶ Plenty people no de gree listen when correct sense “de shout call people for street.” As e dey for Bible, na three group of people no de gree listen to correct sense. They be: People “wey no mature,” people “wey de like to laugh good thing,” and people “wey dey foolish.” (Read Proverbs 1:22-25.) Make we talk more about why this people de reject sense from God and wetin we fit do so that we no go be like them.

7. Why some people choose to remain as ‘people wey no mature’?

⁷ ‘People wey no mature’ na people wey de believe everything wey they hear, or people wey they fit deceive quick-quick. (Prov. 14:15, ftn)  We de always see this kind people when we de preach. For example, think about plenty-plenty people wey leaders for lie-lie religion or politics don deceive. Some de really surprise when they know say this leaders don deceive them. But the people wey Proverbs 1:22 talk about choose to remain as people wey no want mature because they like to dey like that. (Jer. 5:31) They really like to do the things wey they want and they no want learn about the things wey Bible talk, or make people begin judge them say they no de follow Bible. Many people be like one woman for Quebec, Canada wey really de go church well. This woman tell one Jehovah Witness wey come visit that area say: “If our priest don deceive us, na e fault, no be our fault!” We no ever want be like this people wey don choose say they no want mature!—Prov. 1:32; 27:12.

8. Wetin go help us really mature?

⁸ No wonder Bible encourage us make we no continue to be people wey no want mature, but make we “de think like person wey don grow.” (1 Cor. 14:20) We de mature when we de follow the advice wey Bible give about how to live our life. If we do like that, we go see how Bible de help us to avoid problems and make better decisions wey sense dey. E good make we think about the decisions wey we don make. For example, if we don de study Bible or don de go meetings for some time now and we never give our life to Jehovah and baptize, we need to think about the things wey we need to do so that we go fit baptize. If we don baptize, we de try to make the way we de preach and teach people the good news better? Our decisions de show say we de do the things wey we de learn from Bible? We de treat other people the way Jesus go treat them? If we see say we need to change some things for our life, make we really think deep about the things wey Jehovah de teach us for Bible wey de make person wey no mature to “know something.”—Ps. 19:7.

9. How people wey de like to laugh good thing show say they don reject correct sense?

⁹ The second group of people wey de reject the sense from Jehovah na people wey de like to laugh good thing. Sometimes, we de meet this kind people when we de preach. E de sweet them to laugh other people. (Ps. 123:4) Bible warn say for last days, people wey de laugh other people go plenty. (2 Pet. 3:3, 4) Like the people wey want marry Lot children, some people today no de listen to the warning from God. (Gen. 19:14) Plenty people de laugh people wey de obey wetin Bible talk. Them de laugh other people because they want do “the bad things wey their body want.” (Jude 7, 17, 18) The way Bible describe this people resemble the character of some people wey don reject Jehovah and people wey don leave the truth and de talk wicked lie about the organization!

10. As e dey for Psalm 1:1, wetin we fit do make we no be like people wey de like to laugh good thing?

¹⁰ How we fit make sure say we no de do like people wey de like to laugh good thing? One way wey we fit do this one na when we no de spend time with people wey de complain about everything. (Read Psalm 1:1.) This one mean say we no de read or listen to anything from people wey don leave the truth and de talk wicked lie about the organization. We need to dey careful so that we no go start to complain about everything, and doubt Jehovah and the different-different direction wey we de receive from e organization. So that we no go get that kind character, e good make we ask ourself say: ‘I de always complain when we receive new direction or explanation about something? I de always want find mistake wey  the people wey de direct us de make?’ When we no waste time to correct this kind character, Jehovah go dey happy with us.—Prov. 3:34, 35.

11. How ‘foolish people’ de see the laws wey Jehovah de give about how to live life?

¹¹ The third group of people wey no gree listen to correct sense na ‘foolish people.’ This people dey foolish because they no gree follow the laws wey Jehovah don give about how to live our life. Them de do wetin they feel say dey correct for their own eye. (Prov. 12:15) This kind people de reject Jehovah, the Person wey correct sense de come from. (Ps. 53:1) When we meet them for our preaching work, many times, them dey harsh and them de talk bad about us because we de follow wetin Bible talk for our life. But make we remember say, they no fit give us better life. Bible talk say: “Person wey be fool no fit get correct sense. E no get anything to talk for the city gate.” (Prov. 24:7) This foolish people no get any better advice to give person. No wonder Jehovah warn us say make we “no get anything to do with foolish person”!—Prov. 14:7.

12. Wetin go help us no follow the way of foolish people?

¹² We no be like people wey no like advice from God. Instead, we de learn to love the way God de think and all the laws wey e de give. We fit make that love strong when we compare the things wey person de gain when e obey, and the bad result wey person de get when e no obey. Try to notice the kind problems wey people de cause for theirself when they no gree follow the better advice from Jehovah. Then think about how your life don really better because you de obey God.—Ps. 32:8, 10.

13. Jehovah de force us to obey the better advice wey e de give?

¹³ Jehovah de give correct sense, but e no de force anybody to accept-am. E talk about wetin de happen to people wey no gree accept the sense wey e de give. (Prov. 1:29-32) People wey decide say they no go obey Jehovah go “suffer the result of wetin them de do.” After some time, they go get plenty pain and suffer because of the way them de live their life, and for the end Jehovah go destroy them. But Bible promise people wey de listen to the advice from Jehovah and de obey wetin e talk say: “When person de listen to me, e go get protection and the fear of trouble no go disturb the person.”—Prov. 1:33.

14-15. Wetin we learn from Proverbs 4:23?

¹⁴ We de always gain when we follow correct sense. As we don talk before, Jehovah de make-am easy for people to get correct advice. For example, for the book of Proverbs, Jehovah give advice wey de always work when we follow-am. Make we just talk about four examples of this kind better advice.

¹⁵ Protect your heart. Bible talk say: “Na your heart you go protect pass any other thing, because na the heart life de come from.” (Prov. 4:23) Think of wetin we need to  do to protect the heart wey we get for inside our body. We need to always chop better food, de always do exercise, and we no go de do things wey fit spoil our body. We de do this kind thing too to protect the heart wey Bible talk about. For example, we de read Bible everyday, we de prepare for meeting, attend meeting, and give comments. Our faith de strong more-more when we de always do our best for the preaching work. And we no go put hand for anything wey fit spoil the way we de think, like to de watch bad-bad film and get bad friends.

16. How the thing wey Proverbs 23:4, 5 talk de really help us today?

¹⁶ Make the things wey you get dey enough for you. Bible advice us say: “No de kill yourself because you want get money. . . . When you try to see-am with your eyes, e no go dey there. E go grow wings like eagle and fly go up.” (Prov. 23:4, 5) Person fit lose e money and property anytime. But rich people and poor people today de over worry theirself about how to make money. Because of this one, them de always do things wey de spoil their name, their friendship with people, and even their body. (Prov. 28:20; 1 Tim. 6:9, 10) But correct sense de help us make we no worry ourself too much about money. And this one go help us make we no get long-throat, instead we go dey okay with wetin we get and we go dey happy.—Eccl. 7:12.

17. How we fit show say we de “use sense talk,” as e dey for Proverbs 12:18?

¹⁷ Think before you talk. If we no dey careful, we fit cause big problem with the thing wey we de talk. Bible talk say: “Wetin person no use sense talk be like when they use knife chuk person. But wetin they use sense talk de make person well.” (Prov. 12:18) We de make peace dey when we no de gossip about the mistakes of other people. (Prov. 20:19) If we want make wetin we talk de cool people for heart, and no cause them pain, make we always de study Bible, and allow the things wey we de study control our heart. (Luke 6:45) When we de think deep about wetin dey inside Bible, the things wey we de talk go be like “the place  wey sense de pour come out from.” Wetin we de talk go always de encourage other people.—Prov. 18:4.

18. When we de do wetin dey Proverbs 24:6, how this one fit help us for our preaching work?

¹⁸ De follow direction. Bible give us better advice wey fit help us. E talk say: “Direction wey sense dey, go help you fight your war. And you go succeed when plenty people advice you.” (Prov. 24:6, ftn.) How this verse de help us to make the way we de preach and teach de better? Instead of us to preach and teach for our own way, make we try de follow the examples wey they give us. We de get direction wey sense dey, for our meetings. For there, we de learn from the talk and demonstration wey brothers and sisters wey get experience de give from Bible. Apart from that one, Jehovah‘s organization de give us different-different books and video wey fit help people understand Bible. You de learn how to use this things well?

19. How the sense wey Jehovah de give de make you feel? (Proverbs 3:13-18)

¹⁹ Read Proverbs 3:13-18. We really dey happy for the better advice wey dey inside Bible. How our life for be if Bible no dey? For this article, we don see some examples of correct sense wey dey the book of Proverbs. The truth na say, the whole Bible get better advice from Jehovah. Make we make up our mind to always follow the correct sense wey Jehovah de give. Plenty people for the world no de see the sense wey God de give as something wey dey important. But we dey sure say “people wey hold [correct sense] strong go dey happy.”