1. Which special things go happen for the One Thousand Years Wey Jesus Christ Go Rule?

 THE day wey God go start to bring people back to life for this earth for the One Thousand Years Wey Jesus Christ Go Rule go really sweet no be small! Everybody go really want see their people wey don die. Na wetin Jehovah want too. (Job 14:15) Think of the kind joy wey people for the whole earth go get when they see their people come back to life again. As we don learn for the article before this one, “righteous people” wey God don write their name for the book of life go “resurrect get life.” (Acts 24:15; John 5:29) Maybe plenty of our people wey don die go dey among the people wey go come back to life for this earth just after Armageddon. * Another thing na say “people wey no dey righteous,” like people wey no get enough chance to know Jehovah or to serve-am well before they die, go “resurrect get judgement.”

2-3. (a) As e dey for Isaiah 11:9, 10, wetin go be the biggest teaching work wey go happen for the whole earth? (b) Wetin we go talk about for this article?

² They go need to teach all this people wey go come back to life. (Isa. 26:9; 61:11) Na that time the biggest teaching work wey never happen before for this earth go happen.  (Read Isaiah 11:​9, 10.) Why we talk so? One reason na say, the people wey no dey righteous wey go come back to life go need to learn about Jesus Christ, the Kingdom, the sacrifice of Jesus Christ, and why the name of Jehovah dey important and why e be say na only Jehovah get the right to rule. Even the righteous people wey go come back to life go need to learn about the things wey Jehovah don de teach e people small-small about wetin e want do for this earth. Some of this people wey serve God well, die long time before the whole Bible complete. The people wey no dey righteous and the people wey dey righteous go get plenty things to learn.

³ For this article, we go talk about this questions: How this teaching work wey big pass go happen? How the way people go behave because of the teaching work go show whether they go write their name for the book of life forever or they no go write-am? The answers to this questions dey important to us for this our time. As we go learn, some wonderful things wey Bible talk for the book of Daniel and Revelation say they go happen, go help us really understand wetin go happen when people wey don die come back to life. Make we first talk about the special things wey go happen wey Daniel 12:​1, 2 talk about.

4-5. Wetin Daniel 12:1 talk about the time of the end?

⁴ Read Daniel 12:⁠1. The book of Daniel show the way wonderful things go happen one by one for the time of the end. For example, Daniel 12:1 talk say Michael, wey be Jesus Christ, “de stand for [God’s] people.” This thing wey Daniel talk start to happen for 1914 when God choose Jesus as King of E Kingdom for heaven.

⁵ But, they still tell Daniel say Jesus go “stand up” for “time of serious suffer . . . and this kind one never happen since they form any nation until that time.” This “time of serious suffer” na the “great tribulation” wey Matthew 24:21 talk about. Jesus go stand up, or do something to defend servants of God, when this time of serious suffer don end. And this one na for Armageddon. The book of Revelation talk say this people na the “plenty people wey come out of great tribulation.”​—Rev. 7:​9, 14.

6. Wetin go happen after plenty people survive great tribulation? Explain. (Still check “Question Wey Some People Don Ask” for this Watchtower wey talk about the people wey God go bring back to life for this earth.)

⁶ Read Daniel 12:2. Wetin go happen after the plenty people survive this time of serious suffer? Before, we think say Daniel 12:2 de talk about the plenty work wey servants of God do after enemies of the truth nearly stop the preaching work for 1918. * But, the way we understand-am now na say this one de talk about people wey go come back to life for the new world wey de come. Why we talk like that? Job 17:16 still use the word “dust” and this one mean the same thing as “Grave.” This one mean say Daniel 12:2 de talk about people wey God go bring back to life after the last days don end and after the war of Armageddon.

7. (a) How e be say some people wey don die go come back and “get life wey no go end”? (b) Wetin go make this resurrection better pass most of the ones wey happen for Bible time?

⁷ But wetin Daniel 12:2 mean when e talk  say some people wey don die go come back and “get life wey no go end”? This one mean say, people wey go come back to life and know, or continue to know, and obey Jehovah and Jesus for the 1,000 years go get life wey no go end at last. (John 17:3) This resurrection go better pass most of the resurrection wey happen for Bible time. (Heb. 11:35) Why e be like that? Na because the people wey come back to life that time still die again.

8. How e be say some people go come back to life and “suffer shame and disgrace”?

⁸ But no be everybody wey go come back to life go gree accept the teaching from Jehovah. The book of Daniel talk say some people wey go come back to life “go suffer shame and disgrace forever.” Because they go show say they get stronghead and dey against Jehovah, God no go write their name for the book of life and they no go get life wey no go end. Instead, they go get “disgrace forever,” and this one mean say God go destroy them. So Daniel 12:2 de talk about wetin go finally happen to everybody wey go come back to life, according to wetin they do after they come back to life. * (Rev. 20:12) Some people go get life wey no go end and other people no go get.

9-10. Which other thing go happen after great tribulation, and who “go shine like bright sky”?

⁹ Read Daniel 12:3. Which other thing go happen after the “time of serious suffer” wey de come? Apart from wetin Daniel 12:2 talk, verse 3 still talk about something wey go happen after great tribulation.

¹⁰ Who “go shine like bright sky”? The thing wey Jesus talk for Matthew 13:43 go help us get the answer. E talk say: “That time, the righteous people go really shine like sun for the Kingdom of their Father.” Other verse them for that chapter show say Jesus de talk about “the sons of the Kingdom,” wey be e anointed brothers, wey go rule with-am for the Kingdom for heaven. (Matt. 13:38) So we fit talk say Daniel 12:3 de talk about the anointed ones and the work wey they go do for the One Thousand Years Wey Jesus Christ Go Rule.

11-12. Which work the 144,000 anointed Christians go do for the 1,000 years?

¹¹ How anointed Christians go help “many people to do wetin correct”? Anointed Christians go work well with Jesus to direct the teaching work wey they go do for this earth for the 1,000 years. The 144,000 anointed ones no go only rule as kings but they go still be priests. (Rev. 1:6; 5:10; 20:⁠6) So they go help to “heal the nations”​—and small-small, they go help everybody to dey perfect again. (Rev. 22:1, 2; Ezek. 47:12) This one go really make anointed ones glad no be small!

¹² Who go dey among the “many people” wey they go help to do the correct thing? Part of them go be people wey go come back to life and people wey go survive Armageddon and maybe any pikin wey they go born for new world. When the 1,000 years don end, everybody wey go dey for earth that time go dey perfect. So na which time God go write their name permanent for the book of life, like when person use ink write something instead of pencil?

13-14. Wetin all the people wey dey perfect for earth go need to do before they go fit get life wey no go end?

¹³ We must remember say even though say person dey perfect, this one no mean say the person don already get life wey no go end. Remember the example of Adam and Eve. They be dey perfect, but they need to show say they obey Jehovah before e go give them life wey no go end. But the sad thing be say, they no gree obey God.​—Rom. 5:12.

¹⁴ How life go be for people for this earth when the 1,000 years don end? Everybody go don dey perfect. Na all this perfect people go use all their heart support the way Jehovah de rule forever? Or some of them go be like Adam and Eve​—wey no gree obey Jehovah even as them dey perfect? This questions go need answers, but how?

15-16. (a) Which time everybody for earth go get the chance to show say them de support Jehovah? (b) Wetin go be the result of this final test?

¹⁵ They go put Satan for prison for the 1,000 years. That time e no go fit deceive anybody again. But when the 1,000 years don end, they go release Satan from the prison. So e go try to deceive perfect people. For that time of test, all perfect people for the earth go get the chance to really show whether they respect the  name of God and they support the way e de rule. (Rev. 20:7-10) The thing wey each person go do that time go show whether God go write e name for the book of life forever.

¹⁶ Bible tell us say some people no go obey Jehovah just like Adam and Eve and they no go support the way Jehovah de rule. Wetin go happen to them? Revelation 20:15 tell us say: “They still throw anybody wey e name no dey the book of life, inside the big fire.” True-true, God go destroy this stronghead people forever. But the perfect people wey go pass this final test go plenty pass the people wey no go pass the test. Na after this test God go write their name permanent for the book of life.

17. Wetin the angel tell Daniel say go happen for our time? (Daniel 12:4, 8-10)

¹⁷ E really sweet to think about this things wey go happen for future! But, one angel still tell Daniel some important things wey go happen for this our time, wey be “the time when the end don near.” (Read Daniel 12:​4, 8-10; 2 Tim. 3:1-5) The angel tell Daniel say: “The truth go dey for everywhere.”  True-true na servants of God go really understand the things wey the book of Daniel talk say go happen for future. The angel still talk say for this time, “wicked people go de do wicked things, and no wicked person go understand.”

18. Small time, wetin go happen to wicked people?

¹⁸ For this our time, e fit be like say wicked people no de get punishment for the wicked things wey them de do. (Mal. 3:14, 15) But small time, Jesus go judge people wey Bible call goat and separate them from the people wey Bible call sheep. (Matt. 25:31-33) This wicked people no go survive great tribulation, and they no go come back to life to live for new world. Their name no go dey the “book” wey God de use “to remember people” wey Malachi 3:16 talk about.

19. Wetin we need to do now, and why? (Malachi 3:16-18)

¹⁹ Na now be the time wey we suppose show with the things wey we de do say we no dey among wicked people. (Read Malachi 3:16-18.) Jehovah de gather people wey e de see as “special property.” This one mean say Jehovah really value them. True-true, we want make Jehovah see us like that too.

20. Wetin be the last thing wey God promise Daniel, and why e de hungry you to see when that promise go happen?

²⁰ True-true, we de live for time wey wonderful things de happen. E no go tey again, more wonderful things go happen. Small time, we go see how God go destroy all the wicked people and remove all bad things. After that one, we go see how the thing wey Jehovah promise Daniel go happen. E promise-am say: “When time reach, you go stand up and you go get wetin them keep for you.” (Dan. 12:13) You really want see the time when Daniel and your people wey don die go “stand up” again? If na so, make you do your your best now to serve God well, and you fit dey sure say Jehovah go write your name for the book of life forever.