1. As e dey for Malachi 3:16, which book Jehovah don de write, and wetin dey inside this book?

 FOR many-many years now, Jehovah don de write one special book. And e don write different-different people name for inside this book. The first person wey serve Jehovah well wey e name dey this book, na Abel. * (Luke 11:​50, 51) Since that time, Jehovah don add other people name for inside this book. And for this our time, e don write millions of people name for the book. For Bible, they call this book ‘book to remember people,’ “book of life,” and “scroll of life.” For this article, we go call-am “book of life.”​—Read Malachi 3:16; Rev. 3:5; 17:8.

2. Which people name dey the book of life, and wetin we fit do so that Jehovah go write our name for the book?

² This special book get the name of all the people wey de worship Jehovah, wey get deep respect for Jehovah and wey love e name. This people go get the chance to live forever. For this our time, if we want make Jehovah write our name for this book, we must get faith for the sacrifice wey Jesus don do so that we go fit be tight friend with Jehovah. (John 3:​16, 36) Whether we get the hope to live for heaven or for this earth, all of us want make Jehovah write our name for this book.

3-4. (a) If our name dey the book of life now, e mean say we go live forever? Explain. (b) Wetin we go talk about for this article and the next article?

 ³ All the people wey their name dey that book go live forever? The answer to this question dey wetin Jehovah tell Moses for Exodus 32:33. Jehovah talk say: “Anybody wey sin against me, I go clean e name comot from my book.” This one mean say Jehovah fit remove the name of people wey e don write inside this book, like say na pencil e first use write this name. (Rev. 3:​5, ftn.) We must make sure say our name remain inside that book until the time wey Jehovah go write-am permanent, like when person use ink write something.

⁴ This one fit make us ask some questions like, wetin Bible talk about people wey their name dey the book of life and people wey their name no dey there? Which time people wey their name dey this book go get life wey no go end? What about people wey no ever get the chance to learn about Jehovah before they die? E dey possible make Jehovah write their name for that book? We go answer this questions for this article and the next article.

WHICH PEOPLE NAME DEY THE BOOK OF LIFE?

5-6. (a) As e dey for Philippians 4:3, which group of people be part of the people wey their name dey the book of life? (b) When God go write their name permanent for the book of life?

⁵ Which people name they write inside this book of life? To answer this question, make we talk about five different group of people. The name of some people for this group dey the book of life, but the name of some people no dey.

⁶ The first group of people, na the people wey God don choose to rule with Jesus for heaven. Their name dey the book of life now? Yes. Just as apostle Paul tell the brothers wey  e work with for Philippi, the name of the anointed Christians wey Jehovah don choose to rule with Jesus, dey the book of life now. (Read Philippians 4:3.) But for their name to remain for this book, they must continue to serve Jehovah well. Then after they don receive their final mark, their name go dey permanent for this book. This one go happen before they die, or before great tribulation start.​—Rev. 7:3.

7. From wetin we understand for Revelation 7:16, 17, which time Jehovah go write the name of people wey go survive Armageddon, permanent for the book of life?

⁷ The second group of people na the great crowd wey be part of the other sheep. Their name dey the book of life now? Yes. Their name go still dey the book of life after Jehovah save them for Armageddon? Yes. (Rev. 7:14) Jesus talk say this people wey de behave like sheep “go get everlasting life.” (Matt. 25:46) But na just after Armageddon this people go get everlasting life? No. Their name go still dey the book of life but e go be like say na pencil Jehovah use write-am. For the One Thousand Years Wey Jesus Go Rule, ‘e go care for them as their shepherd, and e go lead them to the spring wey get the water of life.’ Na the people wey follow direction wey Christ go give and wey hold Jehovah tight for the final test, Jehovah go write their name permanent for the book of life.​—Read Revelation 7:​16, 17.

8. Which people name no dey the book of life, and wetin go happen to them?

⁸ The third group of people, na the people wey Bible call goat. God go destroy them for Armageddon. Their name no dey the book of life. Jesus talk say they go destroy them forever. (Matt. 25:46) Apostle Paul still tell us for Bible say: ‘Our Lord go judge this people, punish them and destroy them forever.’ (2 Thess. 1:9; 2 Pet. 2:9) Na the same thing go still happen to plenty people, right from the time of Abel, wey know wetin God want but wey decide to sin against the holy spirit. This people too no go live forever, but they go destroy them forever. E clear say God no go bring them back to life. (Matt. 12:32; Mark 3:​28, 29; Heb. 6:​4-6) Now, make we talk about two group of people wey God go resurrect for this earth.

PEOPLE WEY GOD GO RESURRECT

9. As e dey for Acts 24:15, which two group of people Jehovah go resurrect for this earth, and how this two group dey different from each other?

⁹ Bible talk about two group of people wey God go resurrect and wey go get the chance to live forever for this earth. Bible call them “righteous people” and “people wey no dey righteous.” (Read Acts 24:15.) The “righteous people” na the people wey serve Jehovah well when them dey alive. But the “people wey no dey righteous” na people wey no serve Jehovah when them dey alive. The truth be say, many things wey they do no good for Jehovah eye. As Jehovah go resurrect this two group of people, e mean say na the name of this two group dey the book of life? To answer this question, make we talk about each group, one by one.

10. Why Jehovah go resurrect “righteous” people, and which work some of them go join do that time? (Still check “Question Wey Some People Don Ask” for this Watchtower about resurrection for this earth.)

¹⁰ The fourth group of people na the “righteous people.” Before they die, Jehovah don write their name for the book of life. As they die, e cancel their name from that book? No, because they still dey “alive” for Jehovah eye. Bible talk say, Jehovah “no be God of people wey don die, but e be God of people wey dey alive, because all of them dey alive  for e eye.” (Luke 20:38) This one mean say, when God go resurrect the righteous people for this earth, their name go dey the book of life, but e go be like say e use “pencil” write-am. (Luke 14:14) We dey sure say some of this people go join work “as princes for all the earth” that time.​—Ps. 45:16.

11. Wetin the “people wey no dey righteous” go need to learn before Jehovah go write their name for the book of life?

¹¹ The last group wey we go talk about na the “people wey no dey righteous.” E fit be say this people no live the kind life wey Jehovah want before they die because they no know anything about Jehovah law. And because of this one, their name no dey the book of life. But Jehovah go resurrect them so that they go get the chance to do wetin go make their name enter inside that book. This “people wey no dey righteous” go need plenty help. Before they die, some of them really do wicked things no be small. So they go need to teach them how they go live their life the way Jehovah want. But how this one go happen? God go use e Kingdom direct the biggest teaching work wey never happen before for this earth.

12. (a) Who go teach this people wey no dey righteous? (b) Wetin go happen to people wey no gree follow wetin them de learn?

¹² Who go teach this people wey no dey righteous? Na the great crowd and the righteous people wey Jehovah go resurrect. Before Jehovah go fit write the name of this people wey no dey righteous for the book of life, they must first become Jehovah friend and promise to use their life serve Jehovah. Jesus Christ and the anointed Christians go dey heaven de check whether this people wey no dey righteous really de follow wetin them de learn. (Rev. 20:4) Any of them wey no gree follow wetin them de learn, no go continue to dey alive even if e don reach 100 years. (Isa. 65:20) Jehovah and Jesus sabi wetin dey our heart and they go make sure say nobody wey de cause problem go dey for that new world.​—Isa. 11:9; 60:18; 65:25; John 2:25.

 PEOPLE WEY GO RESURRECT GET LIFE AND PEOPLE WEY GO RESURRECT GET JUDGMENT

13-14. (a) Before this time, how we understand wetin Jesus talk for John 5:29? (b) Which important thing we suppose remember about wetin Jesus talk?

¹³ Jesus still talk about the people wey go resurrect and get life for this earth. For example, e talk say: “Time de come wey all the people wey dey inside grave wey God want remember go hear e voice and them go come out, people wey don do good go resurrect get life, and people wey don do bad go resurrect get judgment.” (John 5:​28, 29) Wetin this thing wey Jesus talk mean?

¹⁴ Before this time, the way we understand this verse be say Jesus de talk about wetin this people wey go resurrect go do after God don resurrect them. This one mean say some of this people go come back to life and de do good things, but others go come back to life and de do bad things. But e dey important make we remember say, Jesus no talk for this verse say this people wey God just resurrect go de do good things or go de do bad things. The wey e talk-am show say, na wetin they do before they die because e say people wey “don do good things” and people wey “don do bad things.” This one really make sense. Why we talk so? Because we don already learn say Jehovah no go allow anybody wey de do bad things to remain for that new world. So e clear say this people wey no dey righteous, go don do this bad things before they die. So, wetin Jesus mean when e talk say, some people go “resurrect get life” and some people go “resurrect get judgment”?

15. Which people go “resurrect get life,” and why?

¹⁵ The people wey do good things before they die, dey righteous and they go “resurrect get life” because their name don already dey the book of life. This one mean say the resurrection of the “good” people wey John 5:29 talk about, na the same thing as the resurrection of the “righteous people” wey Acts 24:15 talk about. This thing wey we just explain now agree with wetin Bible talk for Romans 6:7 wey talk say: “When person die, e don free from e sin.” So when this righteous people die, Jehovah forgive their sin. But, e no go ever forget all the good things wey they do when them dey alive. (Heb. 6:10) But this righteous people wey God go resurrect go need to continue to serve Jehovah well so that their name go remain for this book of life.

16. Wetin Bible mean when e say some people go “resurrect get judgment”?

¹⁶ What about the people wey do bad things before they die? Even though say Jehovah don forgive their sin as they die, they no serve Jehovah when them dey alive. And their name no dey the book of life. So, the resurrection of “people wey do bad things” na the same as the resurrection of “people wey no dey righteous” wey Acts 24:15 talk about. Na them Bible talk say go “resurrect get judgment.” * This one mean say, from heaven, Jesus go de check wetin this people wey no dey righteous de do. (Luke 22:30) Time go pass before Jesus go fit really know whether they qualify make God put their name for the book of life. Na only when this people wey no dey righteous change the way they de live their life before, and promise to use their life serve  Jehovah, before Jehovah go write their name for the book of life.

17-18. Wetin all the people wey God go resurrect for this earth need to do, and “wetin they do” as e dey for Revelation 20:12, 13?

¹⁷ For the 1000 years wey Jesus go rule, they go open new scrolls. And all the people wey God go resurrect whether them dey righteous or them no dey righteous, go need to obey the laws wey dey this new scrolls. Apostle John talk wetin e see for vision when e say: “I see the people wey don die, big and small, as they stand for front of the throne. And God open the scrolls. But e still open another scroll; na the book of life. And they use wetin dey inside the scroll judge the people wey don die according to wetin they do.”​—Rev. 20:​12, 13.

¹⁸ As Bible say they go judge this people according to “wetin they do,” na wetin they do before they die they go use judge them? No! Make we remember say when they die Jehovah don already forgive the sin wey they do before they die. So e mean say for this verse “wetin they do” no fit be the things wey they do before they die. But na the things wey they do after they don train them, for the new world. Even people wey serve Jehovah well like Noah, Samuel, David, and Daniel go need to learn about Jesus Christ and show say they get faith for the sacrifice wey e do. So, if this people wey serve Jehovah well go need to learn, how about the ones wey no even serve Jehovah at all!

19. Wetin go happen to people wey no gree follow this better chance wey Jehovah give them?

¹⁹ Wetin go happen to people wey no gree follow this better chance wey Jehovah give them? Revelation 20:15 talk say: ‘They throw anybody wey e name no dey the book of life, inside the big fire.’ True-true they go destroy them forever. So, we don see say e dey important make we make sure say our name dey the book of life and remain inside!

20. Which better work we go do for the One Thousand Years Wey Jesus Go Rule? (Check picture for front cover.)

²⁰ Many better things go happen for the One Thousand Years Wey Jesus Go Rule! One of the thing wey Jehovah people go do that time, na the biggest teaching work wey never happen before for this earth. But e go still be time wey Jesus go really check the way the righteous and the people wey no dey righteous go behave. (Isa. 26:9; Acts 17:31) How this teaching work go be? The next article go help us understand-am well and help us see how we go show say we really happy for this better arrangement.