For 1 Corinthians 15:8, Paul talk say: “But na me e appear to last, just like pikin wey e mama born when time never reach.” Before-before we talk say for this verse, e fit be say Paul de talk about wetin happen to-am when e see the vision of Jesus for heaven. E just be like say God give Paul the honor to resurrect as spirit, even before that kind thing start to happen. This kind resurrection to spirit life, start to happen hundreds of years after e happen to Paul. But after we don study this verse more, we see say we need to change the way we don explain-am before.

For this verse, na true say Paul de talk wetin happen to-am when e become Christian. But wetin e mean when e talk say e be like “pikin wey e mama born when time never reach”? This one fit mean plenty things, but make we talk about some of them.

The way e become Christian happen quick-quick and e cause-am pain. When mama born pikin when the time never reach, e de surprise people. When Saul (wey e name change to Paul) de go Damascus to punish the Christians for there, e no ever expect say e go see the vision of Jesus wey don resurrect go heaven. Paul really surprise when e become Christian. And e still surprise the Christians for Damascus wey e want go punish. Another thing be say wetin happen to Paul make-am no fit see for sometime. This one cause-am pain, shock, and e really fear.​—Acts 9:1-9, 17-19.

E become Christian “when nobody expect-am”. For the original Greek language, the word wey they translate as “pikin wey e mama born when time never reach,” fit still mean “to born pikin when e no be the normal time.” For The Jerusalem Bible, this verse talk say: “I just be like pikin wey e mama born when nobody expect-am.” Jesus don already go back to heaven before Paul become Christian. After Jesus resurrect, e appear to the people wey Paul talk about for verse 5-7, before e go back to heaven. But by that time, Paul never become Christian, so e no see Jesus before e go back to heaven. (1 Cor. 15:4-8) Jesus give Paul the favor to see-am after e resurrect but na when e no expect-am. This one make Paul be like “pikin wey e mama born when e no be the normal time.”

The way Paul talk about e self show say e dey humble. Some people wey don study book well talk say the way Paul talk about e self for 1 Corinthians 15:8, just be like say e no reach to be anything. If na wetin Paul get for mind be that, wetin e talk show say e no reach to be apostle. In fact, the next thing wey e talk show say this one fit be true, e talk say: “Because na me small pass among the apostles, and I no reach person wey people go call apostle, because I suffer the congregation of God. But with God favor I be wetin I be.”​—1 Cor. 15:9, 10.

So e fit be say Paul de talk about the way e become Christian when Jesus appear to-am. E happen quick-quick, and e no expect-am, and the time when e happen, just be like say no be the normal time. Or say e no reach to see that kind vision of Jesus. No matter wetin Paul get for mind, wetin happen that day really dey important to-am. E really make-am believe and dey sure say God don bring Jesus back to life. No wonder when e de preach to people about the resurrection of Jesus, e de like talk about wetin happen to-am for road that day.​—Acts 22:6-11; 26:13-18.