1. Wetin Jehovah do just after Adam and Eve sin? (Genesis 3:15)

 JUST after Adam and Eve sin, Jehovah use one important prophecy give their children hope. The thing wey e talk dey for Genesis 3:15.—Read-am.

2. Why this prophecy dey important?

² The prophecy dey for the book of Genesis wey be the first book for Bible. But all other books for Bible connect to this prophecy for some way. Just as cover of book de hold all the page wey dey the book together, na so the thing wey dey Genesis 3:15 hold all the Bible books together as one message. And the message na say, God go send one savior wey go destroy Satan and all e followers. b This one go be big blessing for people wey love Jehovah!

3. Wetin we go talk about for this article?

³ For this article, we go answer this questions about the prophecy for Genesis 3:15 wey be: Who the prophecy de talk about? How the prophecy go happen? And how we de gain from this prophecy?

4. Who be “the snake,” and how we know this one?

⁴ The prophecy for Genesis 3:14, 15 de talk about one “snake,” the “pikin” of the snake, one “woman,” and the “pikin” of the woman. Bible help us to know wetin each of them mean. c Make we first talk about “the snake.” The snake no be real snake because snake no fit understand  the thing wey Jehovah talk for garden of Eden. This one show say no be animal Jehovah talk to. Na something wey high and get sense pass animal. So, who e be? Revelation 12:9 explain who the snake be. For there, Bible talk for clear way say “the original snake” na Satan the Devil. But which people be the pikin of the snake?

5. Na who and who be the pikin of the snake?

⁵ Bible de use the word pikin to talk about person wey copy another person sotey, e just be like say na e pikin e be. So the pikin of the snake na those bad angels and the people for earth wey de copy Satan to dey against Jehovah God and E people. So wetin we de talk be say, the bad angels wey leave their work for heaven for Noah time, and all the people wey de behave like Satan their papa for this earth, na them be the pikin of the snake.—Gen. 6:1, 2; John 8:44; 1 John 5:19; Jude 6.

6. Why we fit talk say no be Eve be “the woman”?

⁶ What about “the woman,” who e be? E no fit be Eve. Why we talk like that? Make we talk about one reason. The prophecy talk say the pikin of the woman go “scatter” the head of the snake. As we don talk-am before, the snake na Satan and no Eve pikin for this earth get the power to scatter Satan. Na another thing go fit scatter Satan.

7. As e dey for Revelation 12:1, 2, 5, 10, who be the woman wey Bible talk about for Genesis 3:15?

⁷ The last book of the Bible wey be the book of Revelation talk who be the woman wey Genesis 3:15 talk about. (Read Revelation 12:1, 2, 5, 10.) No be ordinary woman e be! Bible talk say the  moon dey under e leg, and e wear crown wey they make with 12 stars for e head. The pikin wey e born no be ordinary pikin, na the Kingdom of God. Na heaven the Kingdom dey, that one mean say na heaven the woman dey too. So the woman represent the part of Jehovah organization wey dey for heaven, and na the good angels dey for that organization.—Gal. 4:26.

8. Na who make up the main part of the pikin of the woman, and na from which time e be like that? (Genesis 22:15-18)

⁸ Bible tell us who be the main part wey make up the pikin of the woman. Na for Abraham family Bible talk say the pikin go come from. (Read Genesis 22:15-18.) And as Bible talk-am e really happen because na Abraham family Jesus really come from. (Luke 3:23, 34) But as e be say the pikin of the woman go scatter Satan the Devil, no be ordinary power of person for earth e suppose get. E power suppose pass that one. So when Jesus dey 30 years old, Jehovah come use holy spirit anoint-am as e special Son. As Jehovah use holy spirit anoint Jesus, e come be the main part wey make up the pikin of the woman. (Gal. 3:16) After Jesus die and come back to life, God “use glory and honor reward-am” and give-am “all the power for heaven and for earth.” And e still give-am the power “to destroy all the work wey Devil don do.”—Heb. 2:7; Matt. 28:18; 1 John 3:8.

9-10. (a) Which other people be part of the pikin of the woman, and na which time this one de happen? (b) Which other thing we go learn?

⁹ But apart from Jesus, other people go dey among the people wey make up the pikin of the woman wey Bible talk about. Apostle Paul talk who this part of the pikin be when e tell Christians wey they anoint wey be Jew and the ones wey no be Jew say: “If na Christ get wuna, wuna really be Abraham pikin, people wey go get wetin they promise.” (Gal. 3:28, 29) When Jehovah use holy spirit anoint Christian, that person go become part of the pikin of the woman. So na Jesus Christ and the 144,000 wey go rule with Jesus make up the pikin of the woman. (Rev. 14:1) All of them de think and do like their Papa, Jehovah.

¹⁰ Now wey we don know who and who Genesis 3:15 de talk about, we go learn wetin Jehovah don already do to make this prophecy happen and how we de gain from the prophecy.

11. As Bible talk say they go wound the pikin of the woman for “leg,” how that one happen?

¹¹ As e dey for the prophecy wey Genesis 3:15 talk about, the snake go wound the pikin of the woman for “leg.” That thing happen when Satan use Jew and Rome people kill the Son of God. (Luke 23:13, 20-24) Just as wound for leg fit make person no fit waka for some time, na so Jesus no fit do anything when e die and dey grave for about three days.—Matt. 16:21.

12. How they go take scatter the head of the snake, and when that one go happen?

¹² For the prophecy wey dey Genesis 3:15 to happen, e mean say Jesus no go continue to dey for grave. Why we talk like that? Na because the prophecy talk say the pikin of the woman go scatter the head of the snake. This one mean say the  wound wey the snake give Jesus for leg go need to heal. And na so e happen! After Jesus die, for the third day, Jehovah bring-am back to life as spirit person wey no fit die again. When God time reach, Jesus go destroy Satan! (Heb. 2:14) Jesus Christ and the people wey go rule with-am go wipe all the enemies of God wey dey the earth comot, na them be the pikin of the snake.—Rev. 17:14; 20:4, 10. d

13. As this prophecy de happen, how we de gain?

¹³ If you don baptize and de serve Jehovah now, e mean say you de gain from this prophecy. When Jesus come this earth, e copy all e Papa character. (John 14:9) As we learn about Jesus, this one don help us know Jehovah God and love-am. And Jesus de direct the Christian congregation today, we de gain from the thing wey e de teach us and the way e de lead us. E don teach us how we go live our life for the way wey Jehovah like. And as the snake wound Jesus for leg, all of us fit gain from that one. How? As Jesus come back to life, Jehovah accept e blood as the correct sacrifice wey de make us “clean from all sin.”—1 John 1:7.

14. How we know say time go pass before the prophecy wey Jehovah talk for Eden go happen?

¹⁴ Wetin Jehovah talk for the garden of Eden show say some time go pass before everything wey Jehovah talk for the prophecy go happen finish. E go take time for the woman to born the pikin as Bible promise, for the Devil to gather e supporters, and for the two groups to become enemy. We de gain from this prophecy because e de warn us say this world wey Satan de control go hate servants of Jehovah. After, Jesus give e disciples this kind warning too. (Mark 13:13; John 17:14) We don see say that part of the prophecy de really happen, especially for the 100 years wey just pass now. How?

15. Why the people of the world don hate God servants pass before, but why we no suppose fear Satan?

¹⁵ After they don make Jesus King for heaven for 1914, e pursue Satan from heaven. Now Satan dey for this earth de wait till they go destroy-am. (Rev. 12:9, 12) But no be say Satan just fold hand de wait. E de vex, and e de attack God people. (Rev. 12:13, 17) And na this one make people for the earth don hate God servants pass as they hate them before. But we no get any reason to fear Satan and e people. Instead, make we get the kind trust wey apostle Paul get. E write say: “If God dey our side, who go dey against us?” (Rom. 8:31) We fit use all our heart trust Jehovah because many of the things wey Genesis 3:15 talk say go happen don already happen.

16-18. How Curtis, Ursula, and Jessica don gain as they understand wetin dey Genesis 3:15?

¹⁶ The thing wey Jehovah promise for Genesis 3:15 fit help us cope with any problem wey we get. One brother wey e name na Curtis wey be missionary for Guam, talk say: “I don face some problems for my life wey for affect my friendship with Jehovah. But as I think deep  about the prophecy for Genesis 3:15, this one don help me to continue to trust my Papa for heaven.” Brother Curtis de wait for the time wey Jehovah go end all the problem wey we de face.

¹⁷ One sister wey e name na Ursula wey de live for Bavaria, talk say as e understand wetin Genesis 3:15 talk, this one really help-am dey sure say Bible na really word of God. E see say all the other prophecies for Bible connect with this prophecy, and e really like that thing. E still talk say: “When I learn say Jehovah do something quick-quick to give us hope, that thing really touch me.”

¹⁸ One sister wey de live for Micronesia wey e name na Jessica, talk say: “I still de remember how I feel when I understand say wetin I de learn na the real truth for Bible. I learn say wetin Bible talk for Genesis 3:15 de really happen. That one don help me see say the kind life wey we de live today no be the kind life wey Jehovah want for us be that. The prophecy don still help me believe more-more say if we de serve Jehovah we go live happy life now, and mouth no fit talk how life go sweet reach for future.”

19. Why we fit dey sure say the last part of the prophecy go happen?

¹⁹ We don see say the things wey Genesis 3:15 talk de happen now. We don know who be the pikin of the woman and who be the pikin of the snake. Jesus wey be the main part wey make up the pikin of the woman don well from the wound for e leg, and now e don be King for heaven wey no go ever die again. And Jehovah don almost choose the people wey go rule with Jesus finish. As e be say the first part of the prophecy don happen, we really dey sure say the last part of the prophecy wey talk say they go scatter the head of the snake go happen too. Mouth no fit talk how God servants go happy reach when they don comot Satan kpatakpata! Before that time reach, make you continue to endure. We fit trust our God, e no go ever fail us. E go use the pikin of the woman to bring plenty-plenty blessing to “all country for this earth.”—Gen. 22:18.