1. How we suppose see the honor to pray to Jehovah?

 JEHOVAH wey make the heaven and earth allow us make we talk to-am for prayer, this one na really big honor. Just think-am: For prayer, we fit use any language tell Jehovah everything wey dey our mind anytime. We fit pray to Jehovah anywhere whether we dey for hospital or for prison, and we dey sure say our Papa for heaven go listen to us. We really thank Jehovah for this gift.

2. How King David show say e value the honor wey e get to pray to Jehovah?

² King David really value the honor wey e get to pray to Jehovah. E sing to Jehovah say: “Make my prayer be like incense wey they prepare put for your front.” (Ps. 141:1, 2) For David time, them de take time prepare the holy incense wey the priest de use for Jehovah worship. (Ex. 30:34, 35) As David talk about incense, e show say e want take time really think about wetin e go tell e Papa for heaven just as them de take time prepare incense. Na wetin we really want do be that so that our prayers go de make Jehovah happy.

3. How we suppose behave when we de pray to Jehovah, and why?

³ E good make we dey serious when we de pray and show say we get deep respect for Jehovah. Think about the wonderful things wey Isaiah, Ezekiel, Daniel, and John see for vision. Even though say the things wey they see dey different, all of them show one important thing. Their vision show say Jehovah na really great King. Isaiah “see Jehovah sitdown for one high throne.” (Isa. 6:1-3) Ezekiel see Jehovah wey sitdown on top one chariot, “and everywhere around-am just de shine, like rainbow.” (Ezek. 1:26-28)  Daniel see “Person Wey Don Dey Tey-Tey” wey wear white cloth, and fire de come out from e throne. (Dan. 7:9, 10) John see Jehovah wey sitdown for one throne and one fine rainbow wey the color be like emerald stone dey around the throne. (Rev. 4:2-4) When we think about the glory of Jehovah, e de make us know say na really big honor we get to really talk to-am for prayer. And this one de make us remember why e dey important to show deep respect when we de pray. But which things we fit talk for our prayer?

4. Wetin we learn about prayer from the things wey Jesus first talk for the prayer wey dey Matthew 6:9, 10?

⁴ Read Matthew 6:9, 10. For the Sermon on the Mount, Jesus teach e disciples how to pray the kind prayer wey go make God happy. After Jesus talk say, “make wuna de pray like this,” e come talk some important things wey connect with wetin Jehovah want do. E talk say make the name of Jehovah dey holy; make e Kingdom come wey go destroy all the enemies of God; and e still talk about the better things wey God go do for people for the earth for future. When we de pray about this things, we de show say the thing wey God want do dey important to us.

5. E bad to pray for the things wey we need?

⁵ For the next part of the prayer, Jesus show say no be bad thing to pray for the things wey we need. We fit beg Jehovah make e give us the food wey we need for the day, to forgive us our sins, to protect us from temptation, and to save us from the wicked one. (Matt. 6:11-13) When we beg-am for this things, we de show say we know say we need e help, and say we want do wetin e like.

6. Na only the things wey Jesus talk for the prayer wey e teach e followers we suppose pray about? Explain.

⁶ Jesus no want make e followers copy exactly the things wey e talk for the prayer wey e teach them. For other prayers wey Jesus pray, e talk about different things wey dey important to-am that time. (Matt. 26:39, 42; John 17:1-26) For the same way, we fit pray about anything wey  we de worry about. When we need to make decision about something, we fit pray make God give us sense and make us understand the thing well. (Ps. 119:33, 34) When we just want start any work wey hard, we fit pray make God give us deep sense, and help us to know wetin to do. (Prov. 2:6) Papa and mama fit pray for their children, children fit pray for their papa and mama, and all of us fit and suppose pray for our Bible students and for people wey we de preach to. But when we de pray, make we no only beg Jehovah to help us or beg-am for the things wey we need.

7. Why e good make we de praise Jehovah for our prayer?

⁷ Make we remember to praise Jehovah for our prayers. Na Jehovah be the number one person wey we suppose praise. E ‘good and e ready to forgive.’ And e still ‘de show mercy and de feel for people. E no de quick vex and e love wey no de fail plenty no be small and e really dey faithful.’ (Ps. 86:5, 15) True-true, we get better reason to praise Jehovah for who e be, and for the things wey e de do.

8. Wetin be some things wey we fit thank Jehovah for? (Psalm 104:12-15, 24)

⁸ Apart from say we go praise Jehovah for our prayers, we go still thank Jehovah for the better things wey e de give us. For example, we fit thank Jehovah for the fine-fine and wonderful colors wey we de see for flowers, for plenty different-different sweet food wey dey, and for better-better friends wey we get. Our Papa wey love us de give us this things and even many other things just to make us happy. (Read Psalm 104:12-15, 24.) And the one wey even dey important pass this ones na say we de thank Jehovah for the plenty things wey e de give us to make our faith strong and for the better hope wey we get for future.

9. Wetin fit help us de remember to thank Jehovah? (1 Thessalonians 5:17, 18)

⁹ E fit really dey easy for us to forget to thank Jehovah for all the things wey e de do for us. Wetin fit help you de remember  to thank Jehovah? You fit write list of some things wey you don ask Jehovah for prayer, and from time to time check-am to see how Jehovah don answer them. And then pray to thank Jehovah as e don help you. (Read 1 Thessalonians 5:17, 18.) Just think-am: When people thank us, this one de make us happy and feel say they love us. Na so e still be with Jehovah, when we remember to thank Jehovah as e answer our prayers, this one de make e heart glad. (Col. 3:15) Which other important reason we get to thank our God?

10. As e dey for 1 Peter 2:21, why we suppose thank Jehovah as e send Jesus come this earth?

¹⁰ Read 1 Peter 2:21. We suppose thank Jehovah say e send e special Son to teach us. When we study about the life of Jesus, e go make us know many things about Jehovah and how to make-am happy. When we show say we get faith for the sacrifice wey Jesus make, e go make us dey close to Jehovah and be e tight friend.—Rom. 5:1.

11. Why we de use Jesus name pray?

¹¹ We thank Jehovah say we fit use e Son name pray to-am. Jehovah de use Jesus give us the things wey we pray for. Na prayers wey they use Jesus name pray Jehovah de listen to and answer. Jesus explain say: “Anything wey wuna use my name ask for, I go do-am. This one go make the Father get praise because of the Son.”—John 14:13, 14.

12. Which other reason we get to thank Jehovah for e Son?

¹² Jehovah de forgive us our sins because of Jesus sacrifice. Bible talk say Jesus na our “high priest [wey] sitdown for the right hand side of the throne of God for heaven.” (Heb. 8:1) Jesus na “person wey de help us [wey] dey with the Father.” (1 John 2:1) We really thank Jehovah say e give us High Priest wey de understand our condition when we do mistake and “de beg for us”! (Rom. 8:34; Heb. 4:15) As e be say we get sin for body, if no be because of Jesus sacrifice we for no fit de pray to Jehovah. You go gree say no be small thing Jehovah do for us as e send e special Son to die for us. We no fit thank-am reach how we suppose to, for this special gift!

13. For the night before Jesus die, how e show say e love e disciples?

¹³ For the night before Jesus die, e use long time pray to e Father about e disciples say make E “protect them because of the wicked person.” (John 17:15) Jesus really love e disciples! Even though say Jesus be know the kind suffer wey e go soon face, e still worry about e apostles.

14. How we fit show say we love our brothers and sisters?

¹⁴ Like Jesus, no be only wetin de worry us we suppose de think about. Instead, we suppose de pray for our brothers and sisters all the time. When we do like that, we de show say we de obey wetin Jesus talk say make we love each other, and we still de show Jehovah say we really love our brothers and sisters. (John 13:34) If we pray for our brothers and sisters, e go really help them. Bible tell us say “the prayer of righteous person get power.”—Jas. 5:16.

15. Why e good make we de pray for our brothers and sisters?

¹⁵ Our brothers and sisters need our  prayers, because them de face plenty problems. We fit pray to Jehovah make e help them endure when them de sick, when things like heavy breeze scatter their house, when them de fight war for their area, when them de suffer them because them de worship Jehovah, or when them de face other problems. We fit still pray for our brothers and sisters wey love de move them to go help this kind people wey de face problem. If you know some brothers and sisters wey de face this kind problems, e go good make you de call their name when you de pray for them. We de show say we really love this brothers and sisters when we de beg Jehovah to help them endure.

16. Why e good make we pray for the brothers wey de care for the congregation?

¹⁶ The brothers wey de care for the congregation de like-am when we de pray for them, and our prayers de really help them. Na so e be for apostle Paul too. E talk say: “Still pray for me so that when I open my mouth, na the correct thing I go talk and make I no fear when I de talk about the holy secret wey e concern the good news.” (Eph. 6:19) Today too, many brothers de work hard to care for the congregation. When we de pray say make Jehovah bless their work, we de show say we love them.

17-18. Na which different-different time they fit call us say make we pray, and wetin we suppose put for mind?

¹⁷ Sometimes they fit call us say make we pray for other people. For example, sister wey de conduct Bible study fit tell sister wey de work with-am say make e pray. The sister wey follow-am come fit no know the student well, so e go better make e pray for the end of the study. This one go help-am know wetin e go talk about the student for prayer.

¹⁸ When they call brother say make e pray for meeting for field service or for congregation meeting, which things e suppose put for mind? The brother suppose remember why them de do that meeting. E no good make e de correct the  brothers or de make announcement when e de pray. For many congregation meetings, na five minutes they say make they use for song and prayer, so the brother wey de pray, especially for the beginning of the meeting no need to “talk plenty.”—Matt. 6:7.

19. Wetin go make us ready for the day of Jehovah judgment?

¹⁹ As Jehovah day for judgment don near, e really dey important make we de always pray. Na this one make Jesus talk say: “No sleep, and make you de beg God for prayer everytime so that you go fit escape from all this things because they must happen.” (Luke 21:36) If we de pray all the time, our faith go dey strong, and e go make us ready for the day of Jehovah judgment.

20. How our prayers fit be like incense wey de smell well?

²⁰ Wetin we don talk for this article? We no de play with the opportunity wey Jehovah give us to pray to-am. The thing wey dey important pass wey we suppose to pray for, na the things wey concern wetin Jehovah get for mind. We still de thank Jehovah for e Son wey e send to die for us, for e Kingdom wey de rule, and we still de pray for our brothers and sisters. Jehovah still want make we pray for the things wey we need, like food and things wey we need to make our faith strong. When we take time think about the things wey we go talk for prayer, we de show say we value the big opportunity wey we get to pray to Jehovah. The things wey we go talk go be like incense wey de smell well, wey Jehovah like, and wey “de make-am happy.”—Prov. 15:8.