1. Wetin Jehovah want make we do today?

 FOR this our time, Jehovah want make we preach the good news about the Kingdom for the whole earth. (Mark 13:10; 1 Tim. 2:3, 4) Na Jehovah get the work, and the work dey important sotey e choose e Son wey e really love to direct the work. We dey sure say as Jesus de direct the preaching work, we go do-am reach how Jehovah want, before the end go come.—Matt. 24:14.

2. Wetin we go talk about for this article?

² For this article, we go see how Jesus de use e “faithful and discreet slave” to teach us Bible and to arrange e disciples as them de do the preaching work now more than any other time. (Matt. 24:45) We go still learn wetin each of us fit do to support Jesus and the faithful slave.

3. Wetin Jehovah give Jesus power to do?

³ Jesus de direct the preaching work. How we know this one? Small time before Jesus go heaven, e talk with some of e disciples for one mountain wey dey Galilee. E tell them say: “They don give me all the power for heaven and for earth.” Then e talk again say: “So make wuna go make disciples of people for the whole world.” (Matt. 28:18, 19) That one mean say one of the things wey Jehovah give Jesus power to do na to direct the preaching work.

4. How we know say Jesus de direct the preaching work?

⁴ Jesus talk say they go do the preaching work for “the whole world” and e still talk say e go dey with e disciples “all the days until the time when this world go end.” (Matt. 28:20) This things wey Jesus talk show say e go continue  to direct the preaching work go reach this our time.

5. How we de help make wetin Psalm 110:3 talk happen?

⁵ Jesus no fear say maybe enough workers no go dey to preach the good news for the last days. E know say this thing wey Bible talk for the book of Psalms go happen: “Your people go ready to support with all their heart for the day wey you go carry your army go fight.” (Ps. 110:3) If you de preach, e show say you de support Jesus and the faithful slave, and you de help make wetin Bible don talk happen. The preaching work de move well, but we still de face some problems.

6. Wetin be one problem wey we de face today as we de preach the good news?

⁶ One problem wey we de face as we de preach the good news na say people dey against us. People wey don leave Jehovah and dey against the organization, leaders of lie-lie religion, and people for politics don tell people lie-lie about our preaching work. If people for our family, people wey we de work with, or other people wey we know, believe the lie-lie wey this people de talk, they fit try to make us stop to serve Jehovah and stop to de preach. For some countries, our enemies de talk things wey go make our brothers fear, them de attack them, de arrest them, or even put them for prison. We no surprise say people de behave like this. Jesus talk say: “All the nations go hate wuna because of my name.” (Matt. 24:9) Since people hate us like this, na proof say Jehovah dey happy with us. (Matt. 5:11, 12) Na Satan de make this people dey against us. But Jesus get power pass Satan! As Jesus de support us, we fit preach the good news to people wey come from all the nations. Make we see wetin show say this one na true.

7. Wetin show say the thing wey Bible talk for Revelation 14:6, 7 de happen?

⁷ Another problem wey we de face as we de preach the good news na say we de meet people wey de speak different-different language. For the vision wey Jesus show apostle John, e talk say for this our time, that problem no go stop us to preach the good news. (Read Revelation 14:6, 7.) We de preach to many people as we fit so that they go get the chance to listen to the Kingdom message. How we de do that one? Today, people for the whole world fit read our books for jw.org website because we don translate them for different-different language wey pass 1,000! Governing Body gree say make they translate Enjoy Life Now and Forever! book, for language wey pass 700! And na this book be the main book wey we de use study Bible with people. We still de make videos wey people wey no de hear fit use learn Bible. And we de make our books for the way blind people go fit read-am. Them de call-am braille. We de see as the thing wey Bible talk de happen. People “from all the language wey the nations get” de learn how to speak the “pure language” wey be the truth from Bible. (Zech. 8:23; Zeph. 3:9) Na Jesus Christ de direct all this work.

8. Wetin don happen because of the preaching work wey we de do?

⁸ For this our time, people wey pass 8,000,000 wey come from 240 lands dey for Jehovah’s organization. And plenty-plenty people de baptize every year! But wetin dey important pass the  number of people na the better-better character wey the people don try to get, wey Bible call, “the new character.” (Col. 3:8-10) Before-before, many of this people de put hand for sex wey no clean, de fight-fight, de hate people from other place them, and they no de joke with their own country. But now they don change, they no de do that kind thing again. Wetin Bible talk for Isaiah 2:4 de happen. They no de “learn war again.” As we de work hard to get the new character, e de make people like to come Jehovah’s organization, and we de show say we de follow Jesus as e de lead us. (John 13:35; 1 Pet. 2:12) Why we de fit do this one? Na because Jesus de help us.

9. According to Matthew 24:45-47, wetin Jesus talk say go happen for the time of the end?

⁹ Read Matthew 24:45-47. Jesus talk say for the time of the end, e go use one “faithful and discreet slave” wey go de use Bible teach us. So we expect say that slave go really de work hard for this our time. And na so e just be. Our leader Jesus de use this small group of anointed brothers help Jehovah servants and those wey de study Bible with them to understand Bible well. This one be like “food for the correct time.” This brothers no de look their self like say na them de control the faith of others. (2 Cor. 1:24) Instead, they know say na Jesus Christ be the “leader and commander” of e people.—Isa. 55:4.

10. Which of the books wey dey the picture you study wey help you start to serve Jehovah?

¹⁰ Since 1919, the faithful slave don write different-different books wey give new people the first chance to learn about God. For 1921, the slave write one book wey the title na The Harp of God so  that new people go use-am start to learn Bible small-small. As time de go, they don write more books. Which of this books help you learn about our Papa for heaven and love-am? Na “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, Wetin Bible Fit Teach Us?, or Enjoy Life Now and Forever!, wey be the new book wey we get now? They write all this books to help us teach people Bible. And for the time wey they write each of them, we see say na just wetin we need for that time be that.

11. Why e dey important make all of us learn Bible well?

¹¹ No be only new people suppose to learn deep things for Bible. All of us suppose to learn the deep things. Apostle Paul write for Bible say: “Strong food na for mature people.” E still talk say if we de do wetin we learn from Bible, e go help us “know the difference between good and bad.” (Heb. 5:14) For this time wey we de live, e fit really dey difficult for person to obey Jehovah because plenty people de do bad things. But Jesus de make sure say they use different-different things teach us so that our faith go dey strong. And all this things wey them de use teach us de come from Bible. Na the faithful slave Jesus de use teach us all this things.

12. Like Jesus, how we don show say we de respect God name?

¹² Like Jesus, we de really respect the name of God. (John 17:6, 26) For example, for 1931, we get one new name from Bible, wey be Jehovah’s Witnesses. As we do like that, we show how the name of God dey important to us reach, and say we want make they know us with that  name. (Isa. 43:10-12) And since October of that year, God name de always appear for the front cover of the Watchtower. Apart from this one, for the New World Translation of the Holy Scriptures they put God name for all the place wey e suppose dey for Bible. But for many Bibles wey church people translate, you no go see Jehovah name at all, they comot-am from their Bible!

13. Wetin make you dey sure say Jesus de use “the faithful and discreet slave” today? (John 6:68)

¹³ Jesus don use “the faithful and discreet slave” gather e followers put for one organization for this earth, so that people go fit de serve God for correct way. Wetin you think about the organization? Maybe you go talk the same thing wey apostle Peter tell Jesus, e talk say: “Who we want go meet? Your talk de give everlasting life.” (John 6:68) Where we for dey now if no be Jehovah wey bring us come e organization? Jesus de use this organization give us everything wey we need to fit hold Jehovah tight. E still de train us so that we go fit preach well. Apart from that one, e de help us learn how to get “the new character,” so that we go fit de make God happy.—Eph. 4:24.

14. How you don gain for this time wey coronavirus sickness dey because you dey part of Jehovah organization?

¹⁴ Jesus de always give us better advice when we de face serious problem. We see that one as we don gain from the way Jesus direct us when the COVID-19 sickness start. Many people for the world no know wetin to do when that sickness start, but Jesus make sure say e use Governing Body tell us wetin to do so that we  go dey safe. They tell us say make we de wear face mask when we dey with other people and make we no de too near each other. They remind the elders say make they always de check brothers and sisters for their congregation to make sure say they get food and de do things wey go make them de worship Jehovah well. (Isa. 32:1, 2) And they still de encourage us and de tell us other things wey we go do for the Governing Body update videos wey we de watch.

15. How Governing Body talk say make we de do our meeting and preaching work for the time of COVID-19, and wetin be the results?

¹⁵ For the time of COVID-19, they still tell us for clear way how we go de do our congregation meeting and our preaching work. Quick-quick, we start to de use Internet and videos do our meetings, assemblies and conventions. Letter and telephone come be the main things wey we de use preach. Jehovah bless the work. Many branch them don talk say the number of their publishers don really increase. True-true, many people don get fine-fine experience for this time.—Check the box “ Jehovah De Bless Our Preaching Work.”

16. Wetin we dey sure say go happen?

¹⁶ Some people fit don think say the organization take the COVID matter too serious. But we don see-am plenty times say sense really dey the things wey the organization de tell us. (Matt. 11:19) And as we de think about the way Jesus de direct e people with love, this one de make us dey sure say no matter wetin happen tomorrow, Jehovah and Jesus go dey with us.—Read Hebrews 13:5, 6.

17. How you de feel as you know say na Jesus de lead us?

¹⁷ We really dey happy say na Jesus be our leader! We dey the organization wey everybody dey as one, no matter the culture, the place wey they come from, or the language wey them de speak. Them de teach us Bible well and de train us how to do the preaching work. Them de teach us how to get the new character, and we de learn how to love our brothers and sisters. We get every reason to boast say na Jesus be our leader!