1. Wetin we dey sure of, and why?

 WHEN you see how problem plenty for the world, e de hard you to believe say things go better one day? For example, people for family no de love each other as before. Plenty people love only theirself, and they like fight-fight. Many people no de trust people wey de rule them. But this things wey de happen fit make you dey sure say things go better. Why? Because people de do exactly how Bible say they go de do for “last days.” (2 Tim. 3:1-5) Anybody wey de talk true go gree say this thing wey Bible talk de happen. And this one show say Jesus don de rule as King of God Kingdom. But this one na just one of the prophecies wey talk about the Kingdom. Now, we want talk about other prophecies wey don happen for this our time, and this one go make our faith strong more-more.

2. Wetin we go talk about for this article, and why?

² For this article, we go talk about (1) prophecy wey help us know when God Kingdom start to rule, (2) prophecies wey help us know say Jesus don become King of God Kingdom for heaven, and (3) different-different prophecies wey talk about how they go destroy the enemies of God Kingdom. Just as tailor de sew different-different pieces together to make fine cloth, na so the different-different prophecies wey we go talk about go help us understand where we dey for Jehovah timetable.

3. Wetin the prophecy wey dey the book of Daniel 7:13, 14 make us dey sure about the King of God Kingdom?

³ The prophecy wey dey Daniel 7:13, 14 make us dey sure say na Jesus be the correct Person to rule God Kingdom. People from every country go dey happy to “serve-am,” and no other person go replace-am. Another prophecy for the book of Daniel talk say Jesus go start to rule when one period of time wey Bible call seven times don end. E dey possible to know when Jesus start to rule?

4. Explain how Daniel 4:10-17 help us understand the year wey Christ start to rule as King of God Kingdom. (Still check footnote.)

⁴ Read Daniel 4:10-17. The “seven times” stand for 2,520 years. That period start for 607 B.C.E. when Babylon people comot the last king wey sitdown for Jehovah throne for Jerusalem. E end for 1914 C.E. when Jehovah appoint Jesus Christ as King of God Kingdom. b And na e be the “person wey get the right according to law.”—Ezek. 21:25-27.

5. Wetin be one way wey we fit gain from the prophecy about the “seven times”?

⁵ How we fit gain from this prophecy? When we understand the prophecy about the “seven times,” e go make us dey sure more-more say Jehovah de do wetin e promise when the time reach. Just as Jehovah fix time wey e Kingdom go start to rule and e really start to rule that time, na so e go still make sure say all the other things wey e talk go happen, and e go happen for the time wey e fix. Jehovah day “no go late!”—Hab. 2:3.

6. (a) Wetin we de see for the earth today wey show say Jesus don de rule for heaven? (b) How the prophecy wey dey Revelation 6:2-8 show say the thing wey Jesus first talk go really happen?

⁶ Before Jesus finish e work for earth, e talk some things wey go happen for the world wey go help e disciples know say e don de rule as King for heaven. Some of the things wey e talk na say war go dey, food no go plenty, and ground go de shake de open for different-different place. E still talk say different-different sickness go de spread “from one place go other place,” and the COVID-19 sickness na one example. This things na part of wetin Bible call “the sign” wey show say Jesus don de rule. (Matt. 24:3, 7; Luke 21:7, 10, 11) More than 60 years wey Jesus don go back to heaven, e give apostle John another proof wey show say this things go happen. (Read Revelation 6:2-8.) All this things don happen since 1914 when Jesus start to rule.

7. Why trouble come dey for the earth when Jesus start to rule?

⁷ Why things come bad more-more when Jesus start to rule as King? Revelation 6:2 tell us one important thing. The first work wey Jesus do when e start to rule as King na to fight war. Who e fight? Na Satan and e demon Jesus fight. According to Revelation chapter 12, Jesus win Satan. E come throw Satan and e demons come this earth. Satan over vex. Because of that one, e come face people,  and na this one bring “trouble for the earth.”—Rev. 12:7-12.

8. As we see say the things wey Bible talk about the Kingdom de happen, how we fit gain from that one?

⁸ How we fit gain from this prophecies? The things wey de happen for the world and the way people character de change de help us know say Jesus don de rule as King. So when we see people de do wicked things and de show say they no care about other people, make we no vex because of that one, instead make we remember say na wetin Bible talk de happen so. True-true God Kingdom de rule now! (Ps. 37:1) And things fit bad pass like this for the world as Armageddon don really near. (Mark 13:8; 2 Tim. 3:13) We really thank our Papa Jehovah as e help us know the reason why many problems dey the world.

9. How the prophecy for Daniel 2:28, 31-35 talk say the last world power go be, and when e start to rule?

⁹ Read Daniel 2:28, 31-35. We see say this thing wey Bible talk don de happen. Wetin Nebuchadnezzar see for e dream na wetin go happen for “the final part of the days” after Jesus don start to rule. The world power wey Bible talk say go be the last one, wey the feet of “iron and clay” stand for, go be among Jesus enemies for the earth. This world power don de rule already. Na when Britain and America join together for World War I they come start to rule as that world power. The image wey Nebuchadnezzar see for dream still show say e get two things wey make this world power different from other ones wey don dey before.

10. (a) Wetin Daniel prophecy talk about the Britain and America world power wey de really happen today? (b) Wetin we need to dey careful make e no affect us? (Check the box “ Dey Careful Make the Clay No Affect You!”)

 ¹⁰ The first thing be say, for the image wey Nebuchadnezzar see, the things wey stand for the other world powers na things like gold and silver. But the one wey stand for this last world power wey be Britain and America na iron wey they mix with clay. The clay stand for people. (Dan. 2:43) As we de see-am today, the way people de behave for election time, the way them de fight for their right, de protest up and down, and de form different-different groups, this one de make-am hard for this world power to do the things wey e want really do.

11. As Britain and America World Power de rule, how that one make us dey sure more-more say we de live for the time of the end?

¹¹ The second thing be say, as Bible talk-am, the Britain and America world power wey the feet of the image stand for, go be the last world power. No government for this earth go replace-am. Instead, God Kingdom go destroy-am and other bad government for the world for Armageddon. c—Rev. 16:13, 14, 16; 19:19, 20.

12. Which other thing dey for Daniel prophecy wey de give us hope and make our mind calm down?

¹² How we fit gain from this prophecy? Daniel prophecy give us another proof say we de live for the time of the end. E don pass 2,500 years wey Daniel talk for Bible say after Babylon, four other world powers go dey wey their rule go really affect servants of God. E still talk say Britain and America World Power go be the last one. This one de give us hope and make our mind calm down say small time, God Kingdom go destroy all the government for this world and start to rule the whole earth.—Dan. 2:44.

13. Wetin the “eighth king” and “ten kings” wey Revelation 17:9-12 talk about stand for, and how this thing wey Bible talk don happen?

¹³ Read Revelation 17:9-12. They destroy many things and kill many people for World War I. Because of this one, another thing wey Bible talk say go happen for the last days really happen. The different-different government for the world come de think of wetin they go do so that peace go dey. So for January 1920, they come form one group wey they call League of Nations. But for October 1945, they come form another group to replace-am, they call-am United Nations. Bible call this group “eighth king,” but no be world power e be. Because if different-different government no join the group, e no go get power. And for Bible, they call those different-different government “ten kings.”

14-15. (a) Wetin Revelation 17:3-5 talk about “Babylon the Great”? (b) Wetin people wey de support lie-lie religion de do now?

¹⁴ Read Revelation 17:3-5. Jehovah spirit help apostle John see one vision. For that vision, e see one prostitute wey Bible call “Babylon the Great,” and e represent all the lie-lie religion for the world. How the thing wey John see for that vision de happen today? E don tey wey lie-lie religion de support the different-different government wey dey for this world. But small time, Jehovah go put-am for the heart of the different-different government to “do wetin e get for mind.” Wetin go come happen? The different-different government wey Bible call the  “ten kings” go turn against all the lie-lie religion for this world and destroy them.—Rev. 17:1, 2, 16, 17.

¹⁵ How we know say the time wey they go destroy Babylon the Great don near? One thing wey go help us answer that question na to remember how the city of Babylon dey for Bible time. One of the things wey de protect the city that time na one big river wey them de call Euphrates. The book of Revelation talk say all the plenty-plenty people wey de support Babylon the Great be like “water” wey de protect-am. (Rev. 17:15) But e still talk say the water go dry, and this one mean say many-many people no go support lie-lie religion again. (Rev. 16:12) This thing wey Bible talk de happen today because some people don leave lie-lie religion, they come de put mind for other things to help them solve their problems.

16. How we de gain as we understand wetin Bible talk about United Nations and the way they go destroy Babylon the Great?

¹⁶ How we fit gain from this prophecies? As they form the United Nations and as  some people de leave lie-lie religion, e really show say we de live for the last days. Even though say the people wey de support lie-lie religion de comot small-small, e no mean say na wetin go destroy-am be that. As we don talk-am before, Jehovah go put-am for the heart of the “ten kings” wey be the different-different government wey de support the United Nations to ‘do wetin E get for mind.’ This different-different government go destroy lie-lie religion quick-quick and e go surprise everybody for the world. d (Rev. 18:8-10) When they go destroy Babylon the Great, the whole world go really feel-am. E fit even make things hard, but servants of God go happy for two reasons. The two reasons be say: They go don wipe out lie-lie religion forever, and the time wey they go take save us from this wicked world go don near.—Luke 21:28.

17-18. (a) How we fit continue to make our faith strong more-more? (b) Wetin we go talk about for the next article?

¹⁷ The Prophet Daniel talk say “correct knowledge go really plenty.” And e don really plenty! We don understand the things wey Bible talk about our time. (Dan. 12:4, 9, 10) As we see say the things de happen the way Bible talk say e go be, e de make us really respect Jehovah and e Word the Bible. (Isa. 46:10; 55:11) So continue to take time study Bible well and help other people be tight friend with Jehovah. When you do this one, your faith go de strong more-more, Jehovah go protect all the people wey trust-am with all their heart, and e go give them “peace wey no go end.”—Isa. 26:3.

¹⁸ For the next article, we go talk about the things wey Bible talk say go happen for Christian congregation for the time of the end. We go learn say this prophecies still show say we de really live for the last days. We go see other proof wey show say Jesus wey be our King de lead e people today.