Jesus teach say make we get peace with other people. But one time, e tell e apostles say: “Make wuna no think say na peace I carry come for the earth; na sword I bring, no be peace. Because I come to divide. Man go dey against e papa, daughter against e mama, and daughter-in-law against e mother-in-law.” (Matt. 10:34, 35) Wetin Jesus mean?

No be say Jesus want separate family members from each other, but e know say the things wey e de teach go divide some family. So, people wey want become disciples of Christ and baptize go need to understand say sometimes, their family people fit no dey happy with their decision. Sometimes, their husband or wife or other family people fit dey against them, and this one fit make-am hard for them to do the things wey Christ de teach.

Bible de encourage Christians to make “peace with everybody.” (Rom. 12:18) But this thing wey Jesus teach fit be like “sword” for some families. This one fit happen when person for family accept the things wey Jesus de teach and other people for the family no gree accept or dey against-am. For that kind situation, the family people wey dey against the things wey Jesus de teach go become “enemies” of the person wey de learn the truth.—Matt. 10:36.

Sometimes, disciples of Christ wey de live with family people wey no de serve Jehovah go face things wey go make them choose who they go support whether na God or their family people. For example, family people wey no be Jehovah Witness fit force them to do some celebrations wey Bible no support. For that kind situation, they go need to decide who they go support. Jesus talk say: “Anybody wey get love for papa or mama pass for me no deserve me.” (Matt. 10:37) Wetin Jesus talk no mean say for e disciples to learn the truth, their love for their papa and mama go reduce. Instead, e teach them how to decide things wey dey important pass. If our family people dey against us as we de worship Jehovah, we go still love them, but we know say na our love for God go be number one.

The truth be say, we no de happy when our family people dey against us because we de serve Jehovah. But disciples of Jesus de remember the thing wey Jesus talk. E say: “And anybody wey no accept e torture stake and follow me, the person no qualify to be my disciple.” (Matt. 10:38) To talk-am for another way, Christians de see problem from their family people as part of the suffer wey Christ disciples go dey ready to endure. Even with the suffer, they still de hope say their good character go help their family members to change their mind and want learn more about Bible.—1 Pet. 3:1, 2.