Jehovah love to teach im people. Because of this one, Jehovah organization don start plenty schools wey fit train students to fit do the work wey them give them for Jehovah service. One of this school na the School for Kingdom Evangelizers (SKE). For some years now, Jehovah organization don improve wetin them de teach for the school and even the building where them de do the school. The main reason why them improve the school na to make-am dey easy for the instructors to teach and the students to learn. How your contribution de help us to fit do this one?

 For many years, them don de do the schools wey our organization get for Kingdom Halls and Assembly Halls. Why we come de build or repair more building join the ones wey we de use now for only schools wey our organization de do? Make we talk about three reasons.

 Need for more brothers and sisters. Christopher Mavor wey de help Service Committee of the Governing Body talk say: “Branch offices don tell us say them need more bothers and sisters to help for the preaching work. For example, for 2019, the branch office for Brazil talk say them need about 7,600 brothers and sisters wey don graduate from SKE to fit care for the work for their branch territory.” The branch office for United States talk say them need brothers and sisters wey be pioneers wey really qualify to fit train other brothers and sisters to do special metropolitan public witnessing, to preach for place wey plenty ship de park and to preach for prison. Need still dey for brothers wey go work with Local Design/⁠Construction Department and for Hospital Liaison Committees. Brothers and sisters wey don graduate from SKE fit help for this areas.

 Plenty brothers and sisters de apply for the school. The brothers and sister wey de apply for SKE for many branch office don plenty pass wetin the school building fit contain. For example, for Brazil, na about 2,500 brothers and sisters apply for SKE for just one year. Because them no get enough building to fit do the school, the branch office fit accept only 950 students.

 Better place wey the students go stay. When students attend the school for Kingdom Hall or Assembly Hall, them de normally stay for the house of brothers and sisters wey de live for the area where the Kingdom Hall or Assembly Hall dey. That arrangement de work well for country wey no de get plenty class every year. But for country where them de get plenty class, e fit no dey possible for the students to stay for the house of the brothers and sisters wey de live for that area for plenty months of the year. Na this one make them get buildings wey dey close to the classroom wey them build especially for the students to stay.

 To build school wey get one classroom, with house wey the students and their teachers go stay and wey still get place for other things, fit cost reach millions of dollars (U.S), this one still depend on the area and other things.

 Them de like to build the school for area wey dey quiet and dey far from big city but wey go dey easy for people to enter transport. Them de sofri choose area wey get plenty publishers wey go fit support and care for the school building and other things wey dey inside the building.

 The school buildings de get library, place to study, computers, printers and other things. Another thing be say, them de get dining room wey the instructors and the students fit chop together. Them de get enough area wey people fit relax and do exercise.

 Them de take time plan the way the classroom go be. Brother Troy wey de work with the Worldwide Design/⁠Construction Department for Warwick, New York, talk say: “We talk to the Theocratic Schools Department to help us design classrooms wey go dey easy for the students to learn. The brothers wey we talk to give us advice about how the classrooms go big reach and the way them suppose arrange-am, them still tell us about the kind light wey go dey inside-am and the audio and video equipment wey we go need.” Brother Zoltán wey be SKE Instructor for Hungary talk about the audio equipment wey them put for the classroom, e talk say: “When we first start, we no get any microphones for the students to use, so we de always remind them to talk loud. But now the problem don solve because them get microphone for each table.”

 How the better building don make the teachers and students feel? Angela wey attend SKE for Palm Coast, Florida, U.S.A talk say: “The place de make person mind come down. Them plan everything for here well, even the classrooms and our own rooms, so that we go put mind for wetin we de study and learn.” Csaba wey be teacher for Hungary really like the better chance wey the teachers and the students get to chop together. E talk say when them de chop together like that, “the students de tell us plenty things about themself and the things wey don happen to them for life. This one de give the teachers chance to know the students well. This one de help us know wetin we go focus on when we de teach the students so that them go really gain.

 The students and the teachers de see the better building as blessing wey come from Jehovah our “Teacher Wey High Pass.” (Isaiah 30:20, 21) One sister for Philippines wey attend SKE for one building wey them change to school talk say: “The way the school fine reach remind us say, we no be just students but we be Jehovah special visitors. E want make we enjoy ourself as we de take time study im Word.”

 We de fit build school buildings, repair them, and de care for them because of una contributions wey una de use donate.pr418.com make. We thank una well-well as una get open hand.