For different part of the world, government don give law say make people stop to de gather together and make they no de stand near each other. Jehovah Witness them don decide say even though they no go stop to de worship God together as congregation, they go obey this government law. To do this one, them de use some applications wey people fit use to do video call, like Zoom, to do their meetings.

 The Governing Body talk say make we use part of the contribution money buy Zoom accounts for congregations, so that we go fit de use-am do our meetings everytime for safe way. This arrangement don really help some congregations wey they no get money to buy video call account. Some video call account de cost like 8,000 francs (CFA) – 11, 000 francs (CFA) or 5,000 naira – 7,000 naira or e fit even pass. Before, this congregations de use free video call accounts for Internet, but this free accounts no dey safe and e no de allow plenty people to connect to the meeting. All the congregations wey de use this Zoom account wey the organization don buy de enjoy the simple and safe setting wey the application get and as plenty people de fit connect to the meeting everytime. Till now, we don get pass 65,000 congregations for more than 170 countries wey de use this video call accounts.

 Kairagi Congregation dey for one place wey them de call Manado, for North Sulawesi for Indonesia. Them de use the free video call account before, but now, they don de use the Zoom account wey the organization don buy. Brother Hadi Santoso talk say: “Even brothers and sisters wey they no really sabi use phone or computer de enjoy meeting now, because they no need to de connect many times for one meeting again.”

 Brother Lester Jijón, Jr. na elder for Guayacanes Oeste Congregation for Guayaquil, Ecuador. E talk say: “Because many of the brothers and sisters no too get money, some congregations no go fit buy Zoom account wey everybody for congregation go fit connect at the same time. Now, we thank the organization say we don get Zoom account wey everybody go fit connect at the same time. And we even dey free to invite other people to join our meetings and we no go fear say the number of people wey connect go plenty pass wetin the account fit take.”

 Johnson Mwanza na elder for Ngwerere North Congregation for Lusaka, Zambia. E talk say: “Many brothers and sisters don talk-am again and again say, ‘as the organization don buy Zoom account, e no only make us dey close to our brothers and sisters, but e don make us feel-am say Jehovah really love us and e de care for us.’”

 The organization de save money to use when problem happen to brothers and sisters. Na this money they use to buy the Zoom accounts. This money na from the contributions wey we de get to support our work. We de get many of this contributions from donate.pr418.com. We thank wuna for all wuna contributions, as e de really help us to support our brothers and sisters anytime wey problem dey.​—2 Corinthians 8:14.