Every year, them de invite some special full-time servants from different part of the world to attend the Watchtower Bible School of Gilead, wey them de do for the Watchtower Educational Center for Patterson, New York. a For this school, the students de learn how they fit de better for the different work wey them de do for Jehovah organization. This training de help them to make the congregations and branch office them for different part of the world to dey strong.

 Gilead na school wey people from different countries de attend. For example, for 2019, they do the 147th class. Na 56 students attend the class and they come from 29 countries. The student wey de attend Gilead school don dey for special full-time service. Some of them na Bethelites, circuit overseers, missionaries, or special pioneers.

 The organization de prepare for the school long time before the students come. For example, the World Headquarters Travel Department (WHQ Travel) de buy aeroplane ticket for people wey they don invite to come the school. For the 147th class of Gilead, the money wey them be pay for each student to come from their country to Patterson and go back na about 427,000 Naira or 577,000 Franc. Students wey de come from Solomon Islands de enter four aeroplane to reach Patterson and after they go enter three aeroplane when them de go back to their country. That journey de take some days. The aeroplane money for one student na about 1,234,000 Franc or 914,000 Naira. To save money, WHQ Travel department de use computer check, to know when the price of the ticket no too cost. And even after they don book ticket, they get computer program wey go still de check even after many months, to know if the price don come down. WHQ Travel department still de use the free aeroplane bonus wey brothers don contribute to buy ticket.

 Plenty of the students need visa before they fit allow them enter United States. To fit do this one, the World Headquarters Legal Department de help them get student visa. The visa and the money wey them de use register for each student na about 203,000 Naira or 274,000 Franc.

 How we de gain from the training wey this students de get? Hendra Gunawan na elder for Southeast Asia. E dey for one congregation wey one husband and wife wey graduate from Gilead school dey. E talk say: “Before, our congregation no get regular pioneers. But after this husband and wife wey come from Gilead come, the way them de put body for the work and dey ready to preach affect people for the congregation for fine way and some even start to pioneer. Later, one sister for our congregation even go School for Kingdom Evangelizers!”

 Sergio Panjaitan dey Bethel for Southeast Asia. E de work with one brother and some sisters wey don go Gilead. E talk say: “The way they train them for Gilead no be just blessing for them; na still blessing for us. They don learn plenty things! They no de do like say them dey important pass other people, instead them de encourage us with the things wey they don learn. And we go still encourage other people with the things wey they tell us.”

 How we de get all this money to fit arrange for this school? Na from the contributions wey people de give to support our work for the whole world. One way wey them de give this contribution na with donate.pr418.com. We thank wuna as wuna de use all wuna heart contribute. Wuna contribution de support this school wey get students from different part of the world.