Bible don talk before say “nation go de fight nation” and disaster go dey for “the last days of this world.” (Matthew 24:​3, 7) We don see how this things wey Bible talk happen for the 2023 service year. a But even with the plenty wars and natural disasters wey happen for around 100 countries, Jehovah Witness people still de show love. How them de do this one?

 For the 2023 service year, our brothers and sisters suffer from more than 200 types of disaster both natural one and the one wey human being cause. Jehovah Witness people spend pass ten million dollars b from the contribution wey our brothers and sisters make for the whole world to help the people wey this disaster affect. Apart from that one, our brothers and sisters still use money from their pocket to help other people for their area. Make we see how them use our money help our brothers and sisters wey this kind disaster don affect. We go use just two disaster as example.

 Some areas for Nigeria de always experience flood for some time of the year. But, for October 2022, Nigeria face the kind flood wey never happen for the past ten years. E pass 676,000 hectares (1,670,432 acres) of farmland wey the flood destroy, and e pass two million people wey the flood destroy their house and spoil their property. Quick-quick, Nigeria branch appoint Disaster Relief Committees to arrange how them go help and give encouragement to the brothers and sisters to make them strong.

•    7,505 publishers no get where them go stay again

•   860 house damage or destroy

•   Flood full 90 Kingdom Halls and one Assembly Hall

 Them spend pass $250,000 for this disaster wey happen. Them spend this money for:

•   Food like rice, beans, and noodles

•   Things wey them de use for house like mattress and mosquito nets

•   Repair or rebuild different-different house wey damage

 How them dey make sure say them use sense spend the money wey our brothers and sisters contribute? One way na as them first de check any house wey damage to know if them go fit repair-am. And if them go rebuild any house, them go build am for simple way like other ones wey dey the area.

 Our brothers and sisters wey receive this help really thank Jehovah. One sister talk say: “The flood scatter our life because e destroy all our farm and our house. We really happy when we see our brothers and sisters. Them come that same day to help us and give us better place wey we go stay. We happy well-well to receive food from the branch office. Body sweet us no be small to see how wetin John 13:​34, 35 talk, happen for our life. . . . True love really dey. Me and my family really thank the brothers from our heart as them come save us for the correct time.”

 Other people for the community notice our work. One community chief for Sabagreia, Bayelsa State, talk say: “Na plenty organization or church dey for the world, but na only Jehovah Witness don do something like this. . . . [Your] organization na one of the best for the world.”

 For February 2023, e pass 400 fire wey destroy things for Chile. E pass 430,000 hectares (1,062,553 acres) of land, and other important things wey the fire destroy. Na about 8,000 people run leave their house. After the disaster happen, quick-quick, the branch office start to arrange how to help.

•   222 publishers comot leave their house

•   20 house destroy

 Them spend pass $200,000 for this disaster wey happen. Them spend this money for:

•   Food and water

•   Fuel, things wey them de use clean, and medicines

•   Rebuild different-different house wey don scatter

 E shock one family to see say the fire don destroy their house, their business and everything wey them get. This one make the family no get work. Some days after the fire, e really pain one family to see how the fire don burn their house reach ground. But as them see say the brothers de help them build their house again, them no come de feel sad again. The love and care wey the brothers wey volunteer show really help them to cope. This one really touch the family and move them to join the brothers wey volunteer, to help them build another brother house.

 The work wey the volunteers do really touch many of our brothers and sisters. One brother talk say: “Jehovah arrangement for Disaster Relief Committee really dey wonderful. The day after the fire happen, the volunteers don already dey the place wey the thing happen to give them the things wey them really need. E de encourage us to read about how volunteers de help our brothers for other part of the world. But when e happen to you, e de dey different. You go value Jehovah organization more, how the brothers de copy Jehovah fine-fine character, and how them de make sure say we get wetin we really need to dey alive, serve Jehovah and to dey happy again. We See How Jehovah Really Show Us Love.”

 As the world de end, we go continue to see how disaster go de plenty more-more. (Luke 21:10, 11) Even with this one, we de see say Jesus our King wey really love us de use the Christian congregation to show say e dey with us “all the days go reach the last days of the world.” (Matthew 28:20) As you open hand contribute to support the work wey we de do for the whole world, for donate.pr418.com and other ways, with your time and power, show say you support the Kingdom and im King. We thank una for the way una continue to open una hand to support this work.