The videos for our regional conventions de touch our heart and them de help us really understand the things wey Bible de teach. For the 2020 “Always Dey Happy”! Regional Convention, they show 114 videos. The 43 talks wey the Governing Body members and their helpers give na part of this number. You don ever wonder how the work to make this videos plenty reach? Or how much money we need to spend to fit do the videos?

 Almost 900 brothers and sisters from different part of the world give their time and use their hand-work support this arrangement. When we count the time wey they don spend for this project after two years, we see say e don reach almost 100,000 hours. Part of this time wey we count na the 70,000 hours wey they use to make the 76 minutes Bible drama wey the title na Nehemiah: “The Joy Wey Jehovah De Give De Protect Wuna.”

 As wuna fit don know, we go need to spend plenty money to care for our brothers and sisters wey don come to support the work, and to give them all the machines, the tools, the buildings and other things wey they go need to finish the work.

 Jared Gossman wey de work with Audio/Video Services talk say, “The Teaching Committee of the Governing Body really want make we de show different-different place and cultures for our videos. This na because we get brothers and sisters for different part of the world and we want make our videos show-am. To fit do this one, 24 teams for 11 different countries work together for this project. We go really need plenty money, planning and cooperation for this project to work.”

 To fit do many of our videos, we go need some special machines and setting for the area wey they go do the film. For example, na inside the studio for Mount Ebo wey dey near Patterson, New York for America, we do the drama Nehemiah: “The Joy Wey Jehovah De Give De Protect Wuna.” Because we want make the film really be like say na for Bible time they do-am, and we no want over spend money, the brothers use plank design something wey e go resemble how the walls of Jerusalem de be for Bible time. Each part of the plank wall tall reach six meters (20 ft). They use foam cover the plank, come paint-am for way wey e go make-am be like say na stone wall. This “walls” dey easy to move, since na just plank they be. So we fit make film for inside that one studio and e go be like na different-different place we use. Even so, to make all the things wey we go need to fit do the film for only this drama, we go need to spend almost 55,500,000 francs or 36,000,000 naira. a

 Now wey we don know how they produce the regional convention program for this year, e make us really value the program more. We dey sure say all the work wey we don do to produce the convention program go move people for the whole world to praise Jehovah. We thank wuna for the way wuna de contribute for donate.pr418.com and other ways to support the work wey we de do for the whole world.