E don pass 130 years now wey Jehovah Witness people for this our time don de gather to do convention every year. Each convention de get more than 40 different talks and e still de get music, interviews, and videos. For people wey attend to really gain from the program, them suppose “hear and see” everything well. (Luke 2:20) How them de use your contribution to make sure say everybody wey attend go gain from the convention no matter where them come from?

 Plenty stadium for country wey things de work well, de get their own things wey them de use play audio and show video. But when we rent place for convention, why we de put our own things wey we de use play audio and show video? Brother David wey de work for our World Headquarters Broadcasting Department, talk say: “Some of the place wey we de rent na where them make for people to only come sitdown for about six hours to listen to wetin de happen. For example, for some stadium, them de use their sound system to make short announcement and to play short music. Their video screen de show game score, advertisement, and game wey them don play before. But our own different. We want make people wey come the convention watch long videos and hear everything wey them talk from the platform well.”

 Since each place wey them choose to do convention different from each other, them must get their own special things wey them go use play audio and show video. If them don choose where them go do the convention, Broadcasting Department for our branch office go decide where the people wey go attend the convention go sitdown base on the number of people wey de come, or the number of people wey the place fit carry. The brothers go decide where them go put sound speakers and big-big television, how them go connect them, and how many things them go need so that everybody go see and hear everything well.

 But if na convention wey them go use different-different language, the kind things wey them go use play sound and show video go even dey hard to arrange. If them go interpret the program for another language, the people wey de interpret go first see and hear wetin them want interpret, and after, them go use another radio send wetin them de interpret to people wey understand that language. Because of this special equipment, them fit play video for everybody for the same time, even if e reach eight different-different language wey them de interpret the program. Brother David talk say: “E no easy to sabi use this things wey them de use play sound and show video, and them go really need to train the people wey volunteer to operate them.”

 Plenty branch office get enough things wey them de use play audio and show video for convention every year. For this kind branch office, the brothers de arrange how to carry this things from one convention go the next one. For example, e pass $200,000 a wey United States branch de spend every year just to move this things go different-different convention. This one de reduce the amount of money wey we for use buy and care for more sound and video things. Brother Steven wey de direct the brothers wey de care for things wey we de use play audio and show video for convention for Canada, talk say: “The brothers de make sure say no nut, bolt, wire, and any other part loss, we de pack them well and ready them for the next convention.”

 To rent the things wey we de use play audio and show video de cost well-well, and sometimes this things no be original and the people wey get them no de care for them well. Because of that one, we de normally buy the things wey we need. For now, one big screen wey them de use for inside hall wey the size na five by three meters (16 by 10 feet), de cost about $24,000, and even one single microphone wire wey long reach 15-meter (50-feet) de cost about $20. So Broadcasting Department de work with Purchasing Department to “check how much” them go spend before them buy anything. (Luke 14:28) Them de ask say, how many people go gain from this things wey we de use play audio and show video? Na to buy new one go better pass? We get enough space wey we go keep this things? And we still get people wey them don train and the tools wey them need to take care for this things?

 To make sure say the things wey we de use play audio and show video go last for long time, we de always repair them so that we no go waste money wey them don contribute. When we want move this things from one place go another place, we de arrange them for box wey go protect them so that them no go quick spoil, and we still de repair them when them get problem.

 People wey no be Jehovah Witness de surprise, and de happy when them see say the things wey we de use play audio and show video make sense no be small. For example, for one convention, one person wey de work for one of the biggest radio and television station for the world like the high quality of the things wey e see. Brother Jonathan wey talk with-am and wey de help arrange the things wey we de use play audio and show video, talk say: “E really surprise when e come know say everybody wey de work with us na people wey just volunteer theirself, no be say them really sabi the work. E talk say e go take their company five days to connect this things wey we use only one day and half take connect.” For another convention, one man wey be manager for the place wey we use do the convention, talk say: “Many expert for music and video don use this place before, but I never see people wey really sabi wetin them de do reach the way una de do-am.”

 How you don gain from the things wey we de use play audio and show video for our convention? You fit de feel like Brother David wey de live for England wey talk say: “I dey 88 years now and I don go plenty convention for my life. But now e don dey easy pass before to fit put mind for wetin them de teach us. Thank you for the fine-fine videos, e de make the convention de move fast-fast and the message just de clear and everything arrange well.” Brother Micheal wey de live for Nigeria talk say: “Because our brothers no de struggle again make them hear wetin the speaker de talk or see the videos, this one de make them no comot mind when the program de go on.”

 As you de go this year Regional and Special Convention wey the title na, “Preach the Good News”! take small time think about everything wey we don do to help you fit enjoy the convention well. We happy say una contribution, even the ones wey una make for donate.pr418.com, de help make this things happen. Una do well!