ALWAYS DE WATCH!
2023: Year Wey Worry-Worry Full—Wetin Bible Talk?
For 2023, wetin happen for the whole world really show say we de live for the time wey Bible call “last days.” (2 Timothy 3:1) See how the things wey de happpen now match with wetin Bible don talk say go happen for this our time.
Bible and Wetin De Happen for the Whole World
“War and news about war.”—Matthew 24:6.
“For many place for the world, fight-fight de plenty more-more.” a
Read the articles “Who Go Save the Common People?” and “Military Spending for the World Pass $2 Trillion.”
“Ground go de shake open for different-different place.”—Mark 13:8.
“From the time wey 2023 start, for the whole world, e don reach 13 times wey ground don shake open—earthquake wey serious pass grade 7. This one plenty pass the one wey don ever happen for inside one year since we start to de count-am.” b
Read the article “Ground Shake Open Kill Plenty People for Turkey and Syria.”
“People go see things wey go make them fear.”—Luke 21:11.
“The weather for this our time no just dey hot for the whole world, but e de boil.”—António Guterres, UN secretary-general. c
Read the article “Summer 2023 Global Heat Wave.”
“Food no go too dey.”—Matthew 24:7.
“2023: Na another year of worry-worry for people wey no easy to find food chop for their family.” d
Read the article “Global Food Crisis Fueled by War and Climate Change.”
“Serious hard time wey no go dey easy to handle.”—2 Timothy 3:1.
“One out of eight people for the whole world de suffer from mental problem.” e
Read the article “As Stress and Worry-Worry De Affect Young People More-More.”
Wetin fit happen for 2024?
Nobody know exactly wetin fit happen for 2024. But wetin de happen for the whole world de show say e no go tey God Kingdom, or im government for heaven, go comot all the government for this world and remove all the things wey de cause suffer-suffer and worry-worry.—Daniel 2:44; Revelation 21:4.
As we de wait make this one happen, anytime wey we de worry, we fit beg God make e help us. Bible talk say:
“Anytime wey I de fear, na you I de trust.”—Psalm 56:3.
How we fit show say we trust God? We de invite you to learn more about wetin Bible promise say go happen for future when suffer-suffer no go dey. Try our free Bible study program to see how you and your family fit gain from the things wey Bible promise.
a Foreign Affairs, “A World at War: What Is Behind the Global Explosion of Violent Conflict?” wey Emma Beals and Peter Salisbury write for October 30, 2023.
b Earthquake News, “Year 2023: Number of Major Earthquakes on Course for Record,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” October 10, 2023.
You May Also Like
ESSENTIAL BIBLE TEACHINGS
Wetin Be the Kingdom of God?
For all the time wey Jesus de preach for this earth, e teach people about the Kingdom of God pass any other thing. For plenty years now, followers of Jesus don de pray say make that Kingdom come.
THE ANSWER WEY BIBLE GIVE
I Fit Get Comfort From Bible
Things wey dey Bible don comfort many people wey de feel bad and de face problem.
