For October 9, 2024, the World Wildlife Fund release one report wey fit make person worry about how the things wey human being de do de affect animals. E talk say: “For 50 years wey don pass (1970-2020), the number of animals wey dey don reduce, sotey if them share-am into four na only one part remain.” The report still talk say: “We fit talk say wetin go happen for the next five years go help us know how life for this Earth go be for future.”

 E dey clear why this report de shock many people when them hear-am. We love the earth and we no de happy say animals for this earth de suffer. We de feel like this because God make us to care for animals.​—Genesis 1:​27, 28; Proverbs 12:⁠10.

 So you fit de ask yourself say, ‘We go fit protect the animals for this earth? Wetin Bible talk?’

 No matter how we try reach to save the animals, na only God fit really protect them. Bible talk for Revelation 11:​18, say God go “destroy the people wey de spoil the earth.” That verse teach us two things:

1.  1. God go stop people make them no destroy the earth finish.

2.  2. God go soon do wetin e talk. How we take know? Because for this our time people de do bad-bad things wey go destroy the animals pass before.

 Wetin God go do to solve this problem? E go use im government rule the whole earth. (Matthew 6:10) That government go get people wey de obey, wey them don teach and train to fit care for animals and protect them.​—Isaiah 11:⁠9.