Some people de drink more alcohol when work plenty for their neck, when them dey alone or when they just feel dull. You de drink pass as you suppose drink? If your answer na yes, how you fit control-am make you no be like slave to alcohol? See some things wey you fit do.

•  How much alcohol person suppose drink?

•  How you go know if you don de over drink?

•  Five points wey fit help you make you no over drink

See wetin Bible talk: “No dey among people wey them de drink too much wine.”​—Proverbs 23:20.

Think-am: Bible no talk say e bad to drink alcohol for the correct amount. (Ecclesiastes 9:7) But, e talk say difference dey between to drink for the correct amount, to over drink, and to drink sotey you drunk. (Luke 21:34; Ephesians 5:18; Titus 2:3) Even if you no drunk, if you over drink alcohol, you fit start to make bad decisions or do things wey no good for your body or spoil your friendship with other people.​—Proverbs 23:29, 30.

Plenty organization wey de make laws know say difference dey between to drink alcohol and to over drink-am. So many times, to make people no over drink, them de talk the amount of alcohol wey person fit drink for one day and how many days person go fit drink alcohol for one week. a But alcohol de affect people for different ways. Sometimes, the best thing na make person no drink-am at all. World Health Organization talk say:

“Even one bottle or two fit dey too much for you​—for example:

• When you de drive or de work with machine.

• When you get belle or de breast feed pikin.

• When you de use some kind medicine.

• If you get some kind sickness.

• If you no fit control the way you de drink.”

See wetin Bible talk: “Make we check the way we de do things, make we take time check-am well.”​—Lamentations 3:40.

Think-am: You fit protect yourself from the bad way wey alcohol de affect person if you de always check the way you de drink and change-am if you see say need dey to change. Check whether any of this things de happen to you. E fit help you know whether alcohol don de control you.

• Na alcohol de make you dey happy. You de always think say if you want relax yourself, or enjoy yourself, you must drink. Or you de drink because you no want de think about your problems.

• You de drink now pass as you de drink before. You de drink plenty times now. You de take alcohol wey e strong pass the ones wey you de drink before, even so, you de drink plenty before you start to feel-am for body.

• Alcohol wey you de drink don cause problems for you with your family, or for your work. For example, you de spend money for alcohol pass wetin de enter your pocket.

• You de make bad decisions when you don drink, like to drive, to swim or to go de work with machine.

• Other people don talk to you about the way you de drink. But when they tell you, you go defend yourself. You de try to hide make people no see say you de drink, or you de lie about the amount of alcohol wey you don drink.

• E hard for you to stop. You don try to stop to de drink or to reduce the amount wey you de drink, but you no fit.

1. Get plan.

See wetin Bible talk: “When people work hard, their plans go surely succeed.”​—Proverbs 21:5.

Try this one: Choose the days for the week wey you go drink alcohol. Set the amount wey you go drink for those days. Set at least two days every week wey you no go drink alcohol at all.

One organization for U.K. wey de teach people how to control alcohol talk say “If you no want make alcohol de control your life, the best thing na make you no de drink-am every day, de always take some break.”

2. Do the thing wey you don plan.

See wetin Bible talk: “Make wuna still finish wetin wuna don start to do.”​—2 Corinthians 8:11.

Try this one: Know the different-different size of drinks and know how many percent of alcohol dey inside so that you go fit measure the amount wey you go drink well. Find drinks wey you like and wey no get any alcohol, and put-am for where your hand go fit reach-am anytime.

The U.S. National Institute on Alcohol Abuse and Alcoholism talk say, “small-small change wey person de make about alcohol fit go far to help-am make e no suffer some problems wey alcohol de cause.”

3. No stop to do wetin you don decide.

See wetin Bible talk: “Make wuna ‘Yes’ be yes and make wuna ‘No’ be no.”​—James 5:12.

Try this one: If person give you alcohol when you don decide say you no go drink, dey ready to tell the person “No” for way wey show respect.

The U.S. National Institute on Alcohol Abuse and Alcoholism talk say “If you de quick reject-am when person want give you alcohol, you no go quick de over drink.”

4. Always think about how the thing wey you don decide go benefit you.

See wetin Bible talk: “The way any matter end better pass the way e start.”​—Ecclesiastes 7:8.

Try this one: Write the reasons why you want de control the amount of alcohol wey you go drink. For your list, add things like, e go help you de sleep well, your body go gain, you go fit de manage your money well, and your friendship with people go better. If you de talk to people about the things wey you don decide, talk more about how you go gain instead of how e go hard you.

5. Ask God for help.

See wetin Bible talk: “For everything I get the power because God de give me power.”​—Philippians 4:13.

Try this one: If you de worry about the way you de over drink alcohol, pray to God and tell God say make e help you. Tell God make e give you power and make you fit control yourself. b And take time to study and find the fine-fine advice wey fit help you for e Word, the Bible. If God dey for your side, you go fit control the way you de drink alcohol.