Your body don start to fail you and e de worse? E mean say you go understand how e de be. E fit really stress your mind, the way you de feel or even affect the money wey you de get. Wetin fit help you to cope? Wetin you fit do to help family member or friend wey serious sickness don catch-am? Even though say Bible no be textbook about medicine, e get fine-fine advice wey fit help you manage yourself for the best way.

•   Go see doctor wey fit treat you

   See wetin Bible talk: “People wey dey strong no need doctor, but na sick people need-am.”​—Matthew 9:12.

   Wetin e mean: If you need treatment, go meet doctor to treat you.

   Try this one: Go see the best doctor wey fit treat you for your area. Sometimes, e de really make sense to talk to more than one doctor. (Proverbs 14:15) When you de talk to people wey fit treat you, make you talk your problems clear, for way wey they go understand. Dey sure say you understand them and say them too really understand the things wey you don explain about how body de do you. (Proverbs 15:22) Know the kind sickness wey you get and learn about the different-different ways to treat-am. When you sabi wetin the sickness fit cause, you go dey ready to manage the problem well and you go fit decide well about how to take care of yourself.

•   De do things wey go make your body strong

   See wetin Bible talk: “Exercise good for your body.”​—1 Timothy 4:​8, Contemporary English Version.

   Wetin e mean: If you de do things wey go make your body dey strong, like exercise, e go really help you.

   Try this one: Get plan for exercise wey you go de do every time. De chop well, and de sleep well. Even though say you still de try to understand how your body de behave now, people wey be experts talk say e go really help you if you de do everything wey you fit do to make sure say you take care of yourself well. But, still make sure say anything wey you choose to do no go affect your body for bad way and e no go affect the treatment wey them de give you.

•   Ask other people for support

   See wetin Bible talk: “Real friend de show love all the time, and na brother wey you fit trust when problem dey.”​—Proverbs 17:17.

   Wetin e mean: Your friends fit help you cope when things really dey hard.

   Try this one: Talk to friend wey you trust and wey you feel free to talk to about your problems. This one fit help you cope with the stress wey the sickness de cause for you. Your family members and friends fit really want help you, but they no know wetin they go do. So talk to them and help them understand wetin they fit do to help you. No expect too much and always tell them thank you for the things wey they do for you. Another thing na say, your friends fit de visit you every time and want stay with you because they love you and they want help you, so you fit need to make them know how much time you get to spend with them and the time wey they fit come visit you.

•   No de think say you no go ever dey strong

   See wetin Bible talk: “When person de always get joy for e heart, that one na good medicine, but person wey e spirit don weak no go get power.”​—Proverbs 17:22.

   Wetin e mean: When you get-am for your mind say your body go strong, e fit help you manage the way you de feel and cope with your sickness.

   Try this one: As you de try manage your new condition, de think about the things wey you fit do, no be the ones wey your power no reach. No de compare yourself with other people or with the way you de fit do things before your sickness start. (Galatians 6:4) Set target wey you fit reach. This one fit help you get fine things to think about tomorrow. (Proverbs 24:10) De do things for other people as your power reach. As you de give people wetin you get or de help them, you go dey happy and you go fit control bad thinking.​—Acts 20:35.

 Bible teach us say Jehovah God a fit help person cope with e sickness. Na true say we no go de expect say miracle go happen and we go just dey strong, but people wey de worship God fit get help for this ways:

 Peace: Jehovah fit give us ‘the peace wey God de give . . . wey pass anything wey person fit understand.’ (Philippians 4:​6, 7) This peace, or peace of mind, fit help person no de over worry. God de give this kind peace to any person wey pray to tell God all the problems wey de make e heart heavy.​—1 Peter 5:7.

 Good sense: Jehovah fit give us good sense to decide well. (James 1:5) Person fit get that kind good sense when e de learn about and follow the fine advice for Bible.

 Better hope about the future: Jehovah don promise say time de come when “nobody go talk say: ‘I de sick.’” (Isaiah 33:24) The hope wey this promise give us don help many people, even people wey get serious sickness, to de think about the time wey their body go dey strong, instead of to just de worry about their problem.​—Jeremiah 29:​11, 12.