For 30 years wey don pass now, many people don feel say things de go well and de better more-more for other countries. But things wey de happen now no agree with wetin them think.

•   “As people de complain because of the war wey de happen for Gaza, na so another problem de happen for the border wey dey between Israel and Hezbollah for Lebanon.”​—Reuters, January 6, 2024.

•   “With im soldiers wey de attack from many place and im nuclear program wey them just start again, Iran de challenge the countries wey dey the West for another level​—as Russia and China don de support them.”​—The New York Times, January 7, 2024.

•   “Russia never stop to throw bomb wey still de cause serious problem for Ukraine.”​—UN News, January 11, 2024.

•   “As China economy and military power de grow, Taiwan de do wetin go make people praise them, and the way things de go between China and U.S fit make-am easy for fight-fight to happen.”​—The Japan Times, January 9, 2024.

 Bible talk anything about the way the world take scatter as we de see today? E go cause another world war?

 Bible no talk about one particular war wey we de see today. But, e talk about the war wey full everywhere for this our time, and wey de “comot peace from the earth.”​—Revelation 6:⁠4.

 The book of Daniel talk say “for the time of the end,” different-different government wey get power go de “struggle” for who strong pass. This struggle go make them de spend plenty money or property, and de show their strong military power.​—Daniel 11:​40, 42, 43.

 Bible show say the condition of the world go bad well-well before e go better. Jesus talk say “serious trouble go dey. The kind one wey never dey before since the world start.” (Matthew 24:21) That “serious trouble” go lead to one war wey Bible call Armageddon. Bible talk say Armageddon na “the war of the great day of God the Almighty.”​—Revelation 16:​14, 16.

 But Armageddon go save human being, no be to destroy them. Na this war God go use take end all human government, wey don cause many wars wey spoil plenty things. To know how Armageddon go bring peace wey no go end, read the articles:

•   “Wetin Be the War of Armageddon?”

•   “Armageddon Na Good News!”