For the whole world, flood wey de scatter things de affect many people. See some report:

•   “For some days now, the rain wey don fall for the capital of China na im heavy pass for the last 140 years. Between Saturday and Wednesday, the flood wey the rain cause don high reach 744.8 millimeters or 29.3 inches.”​—AP News, August 2, 2023.

•   “Today Thursday na the second day wey Typhoon Khanun don bring heavy rain and strong breeze come the south side of Japan and e don kill at least two people. . . . For the mountain side of central Taiwan, them de expect say the strong breeze go make heavy rain wey go reach 0.6 meters wey be (2 feet) fall.”​—Deutsche Welle, August 3, 2023.

•   “Na the rain wey heavy pass wey don fall for Atlantic Canada area for the last 50 years cause the flood wey happen [for Nova Scotia] for weekend.”​—BBC News, July 24, 2023.

 Wetin Bible talk about this kind things?

 Bible let us know say this time wey we de live now na the “last days.” (2 Timothy 3:1) Jesus talk say for this our time, “people go see things wey go make them fear.” (Luke 21:11) Climate change na one of the main things wey de make weather change and e de cause different-different condition wey people no expect and wey really de put fear for their body.

 Bible tells us say many of the bad-bad things wey de make us fear wey de happen for this earth today, na wetin suppose make us get hope. Why we talk so? Jesus talk say: “When una see as this things de happen, make una know say the Kingdom of God don near.”​—Luke 21:31; Matthew 24:3.

 The things wey de happen de show say God Kingdom go soon de control natural things like how water de move go up and down for this earth.​—Job 36:27, 28; Psalm 107:29.

 To learn more about how God Kingdom go repair things wey don spoil for the earth, read the article “Who Will Save the Earth?”