For May 19, 2022, e pass 75 high-level officials wey tell the United Nations Security Council say, ‘the food wey don de scarce before because of COVID-19 and the weather wey de change, don worst pass before because of the war for Ukraine.’ After small time, The Economist still announce say ‘because of the war, this world wey don already get many problems, go still suffer serious hunger.’ Bible don first talk-am say this kind serious hunger go happen for our time. But Bible still help us see how we fit manage all this problem.

•   Jesus don talk-am before say: “Nation go fight nation, kingdom go fight kingdom, food no go plenty.”—Matthew 24:7.

•   The book of Revelation talk about four horsemen. One of them represent war. The one wey de follow-am represent hunger, time wey e go really hard to get food and food go really cost well-well. “I see black horse, and the person wey sitdown ontop, hold balancing scale for hand. I hear voice wey sound like person voice, . . . E talk say: ‘Them go buy one quart of wheat with money for one day work! Them go still buy three quarts of barley with money for one day work.’ ”—Revelation 6:5, 6, Contemporary English Version.

 This thing wey Bible don talk about food don de happen for this our time wey Bible call “last days.” (2 Timothy 3:1) To learn more about “last days” and the four horsemen wey Revelation talk about, watch the video The World Don Change Since 1914 and read the article “The Four Horsemen—Who Are They?”

•   Bible get better advice wey fit help us manage any hard condition wey we de face, whether na the price of food wey de go up or na when food no dey. See some examples for the article “How to Live on Less.”

•   Bible still give us hope say things go better. E promise say time de come when “food go plenty for everywhere for the earth” and everybody go get plenty food to eat. (Psalm 72:16) To learn more about the hope wey Bible give us about the future and why we fit trust am, read the article “A Real Hope for a Better Tomorrow.”