“When I be small girl, my senior brother de always beat me and de talk to me anyhow everyday. After I don marry, my husband mama continue to treat me for bad way. My husband mama and papa treat me like say I be slave. Because of this one, I de always think of to kill myself.”—Madhu, a India.

 World Health Organization talk say: “People de treat women for bad way for the whole world.” Some people de beat women and some still de use force touch them or sleep with them. World Health Organization still talk say na almost one out of every three women don face this kind thing for their life.

 If this kind thing don happen to you, you fit de fear say anywhere wey you go person fit talk to you anyhow, beat you, or use force touch or sleep with you. If people de abuse or treat you for bad way because you be woman, you fit de feel say plenty people no de see women like say them get value. But women really dey important to God?

 Bible talk say: “Na man and woman [God] make.” —Genesis 1:27.

 Wetin e mean: Na man and woman God make. God no want make them de respect only men, e still want make them de respect women. Another thing be say, God want make husband “love im wife as e love imself.” God no want make husband de provoke or de control their wife, and e no want make husband even use harsh words or beat their wife. (Ephesians 5:33; Colossians 3:19) E clear say God really want make women dey safe.

 “When I be small girl, some of my family people be de touch me for bad way. When I dey 17 years, my oga for work talk say e go sack me if I no gree sleep with-am. Even when I don grow, my husband, my papa and mama, and my neighbors no de respect me. After some time, I come learn about Jehovah, b the Person wey create everything. E de treat women with respect. This one make me dey sure say God really love me and say I get value for im eye.”—Maria, Argentina.

 Bible talk say: “One friend dey wey dey close pass brother.”—Proverbs 18:24.

 Wetin e mean: Better friend go support you. If e dey possible, talk about how you de feel to person wey you fit trust.

 “For 20 years I no tell anybody say them don touch me for bad way. Because of this one, I no dey happy, I de always worry and de feel sad. When I finally talk to person wey ready to listen to me, my mind really come down.”—Elif, Türkiye.

 Bible talk say: “Make una throw everything wey de worry una give-am, because e de care about una.”—1 Peter 5:7.

 Wetin e mean: When you de pray, God de really listen. (Psalm 55:22; 65:2) Because e care about you, e fit help you understand how you dey important reach.

 “As I de learn about Jehovah, this one heal all the pain wey I de feel for my heart. Now I fit tell God for prayer everything wey dey my mind and how I de feel. Jehovah be like better friend wey really understand how I de feel.”—Ana, Belize.

 Bible talk say: “Jehovah . . . go judge for correct way for children wey no get papa and for people wey them de treat for bad way, so that ordinary man for this earth no go ever make them fear.”—Psalm 10:​17, 18.

 Wetin e mean: God go soon end the bad way people de treat other people and e go still end the wicked and bad things wey people de do to women.

 “E de make my mind come down as I learn say Jehovah go soon end the bad way people de treat women and young girls. E don really give me peace of mind.” —Roberta, Mexico.

 To learn more about how the Bible de give hope, why you fit trust the promise wey dey inside Bible, and how Jehovah Witness de use Bible take encourage people today, ask for free visit.

 Download this article, the one wey you fit print.