For Sunday, November 20, 2022, them finish the meeting wey world leaders and experts de do to talk about matter wey concern bad weather. Them de call this meeting “COP27 United Nations Climate Change Conference”. Even though say this leaders and experts make important decision to give money to poor-poor country to manage the problems wey bad weather don cause, many people talk say this one no fit solve the problem.

•   António Guterres wey be the United Nations secretary-general talk for November 19, 2022 say: “I happy say we don decide to keep money wey we go use help poor country cope with problems wey bad weather de cause. But e clear say this one no dey enough . . . Our earth be like person wey de really sick, wey them rush go hospital go see doctor.”

•   Mary Robinson, wey be former president of Ireland and former UN High Commissioner for Human Rights, talk for November 20, 2022 say: “The weather for the world bad well-well and soon e go worse pass as e be sotey e go affect everybody for this earth.”

 Young people de really worry about how our earth go be for future. But, nations for the world fit really work together to do wetin them promise, to solve the problem wey bad weather de cause for the earth? Wetin Bible talk?

 The Bible tell us say even as people for government work hard to solve the problem wey bad weather de cause, them no go fit comot the problem finish. See two reasons why e be like that:

•   “Them no fit make something wey don twist straight.”​—Ecclesiastes 1:⁠15.

   Wetin e mean: Governments for the world no go fit do everything wey them want do because, God no make human being to rule theirself. (Jeremiah 10:23) Even if the governments for the world come together, them no go fit ever solve the problems wey dey this world, no matter how them try reach.

•   “People go de love theirself, go like money too much, . . . them no go want get any agreement with people.”​—2 Timothy 3:​2, 3.

   Wetin e mean: Bible don talk say many people today go de only think about theirself and them no ready to work together to make things better for everybody.

 The truth be say, the future of our earth no dey any government hand and the promise wey them de make. God don give us correct person wey go rule the world and na Jesus Christ. Bible talk about-am say:

•   “The government go dey for im hand. Im name go be Wonderful Counselor, Mighty God, Eternal Father, Prince of Peace.”​—Isaiah 9:⁠6.

 Jesus na the King of God Kingdom, or God government wey dey for heaven. (Matthew 6:10) E get the power, the sense, and e really want care for our earth and the people wey dey this earth. (Psalm 72:​12, 16) When Jesus de rule, e go use this government for heaven destroy all the people wey “de spoil the earth.”​—Revelation 11:18; Isaiah 35:​1, 7.

 To learn more about the best way to stop bad weather wey de destroy things, read the article “Climate Change and Our Future​—What the Bible Says.”