For different-different place for this world, people de fight and attack other people because of politics, and this one de make people for the whole world de worry.

•   For 2023-2024 election for Mexico, them kill 39 politician and this one na the number of people wey high pass wey them don kill for politics matter for that country. Because people still de fight and attack other people, this one make people fear and no put mind for the election.

•   For Europe people de fight and attack other people because of politics matter and this one de happen well-well. For May 15, 2024, them try to kill the prime minister of Slovakia but them no succeed.

•   For July 13, 2024, them try to kill Donald Trump wey be president before for United States but them no succeed, and this really shock people for the country no be small.

 Why plenty people de fight and attack other people because of politics matter? E go ever end? Wetin Bible talk?

 Bible don talk-am say for this our time wey be “last days,” many people go like to de do things wey go make people de fight-fight and hate each other.

•   “For last days, serious hard time wey no go dey easy to handle, go dey. People . . . no go de talk thank you, no go de hold people tight, . . . no go want get any agreement with people, . . . them go really wicked, . . . them go turn against their friends, them go de do strong-head, them go de carry body up.”—2 Timothy 3:1-4.

 Bible still talk say for this last days, people go de fight against government and serious katakata go dey because of politics matter. (Luke 21:9) But all this problem no go last forever.

 Bible teach us say God go use im own government wey dey heaven, replace all human being government.

•   “God for heaven go start kingdom wey . . . go destroy and end all this kingdom and na only that Kingdom go remain forever.”—Daniel 2:44.

 God Kingdom go make people live together as one and make peace dey for the whole world.

•   The Person wey go rule for God Kingdom na Jesus Christ, and Bible call-am “Prince of Peace.” E go make sure say we enjoy “peace [wey] no go finish.”—Isaiah 9:6, 7.

•   Even now, people wey go dey that Kingdom don de learn how to live in peace with people. Na this one make Bible talk about them say: “Them go use their sword make plowshare and them go use their spear make pruning shear. Country no go carry sword fight other country, and them no go learn war again.”—Isaiah 2:3, 4.

 To learn more, read this article “Wetin God Kingdom Go Do?” and watch this video Wetin Be the Kingdom of God?